1. Korinta 13
13
Jeräakjent sennen: de jratste Gow
1Wan ekj met Menschen un Enjel Sproaken räden kunn un oba nich Leew haud, wia ekj nuscht mea aus een Bimmel ooda eene Kjlinjaschal. 2Un wan ekj eene Profeetengow haud un wist aule Jeheemnisen un haud aule Erkjantnis un haud eenen Gloowen, Boaj to vesaten, un oba nich leeftolich wia, dan wia daut met mie noch nuscht. #Mat 7,22; 17,20 3Wan ekj aules waut ekj hab de oame jeef un mienen Kjarpa hanjeef to vebrennen, #13,3 Eenje oole Schreften sajen mienen Kjarpa hanjeef daut ekj jeieet wort. un dee Menschen nich goot wia, dan holp mie daut nuscht. #Mat 6,2
4Leew es jeduldich, Leew es frintlich, Leew woat nich iewrich, Leew es nich ieejenkoppich un pucht sikj nich. 5Leew es nich ojjeschekjt, es nich nosikj, see lat sikj nich vebetren, un es nich nodroagent. #Flp 2,4 6Leew freit sikj nich to daut waut orrajcht es, see freit sikj oba to daut waut woa es. #Reema 12,9 7Leew vedrajcht aules, see jleeft aules, see hopt aules, jeduldich drajcht see aules. #Spr 10,12; Mat 18,21-22; Reema 15,1
8Leew haft kjeen Enj. De Gow, profeetisch to räden, woat opphieren, daut räden en Tungen woat opphieren, un besondre Erkjantnis kjrieen woat opphieren. 9Ons weeten es stekjawies, un ons profeetisch räden es stekjawies. 10Wan oba daut komen woat, waut volkomen es, dan es daut nich mea stekjawies. 11Aus ekj een Kjint wia, don räd ekj aus een Kjint, un docht aus een Kjint, un äwaläd aus een Kjint. Aus ekj oba een Maun wort, läd ekj auf, waut kjinjrich wia. 12Nu es daut soo aus wan wie en eenen muzhajen Spieejel kjikjen un nich kloa seenen kjennen. De Tiet kjemt oba wua wie kloa seenen woaren. Noch vesto ekj mau stekjawies, oba dan woat mie aules kloa woaren, soo kloa aus Gott mie nu aul kjanen deit. #4Mo 12,8; 1Kor 8,3; 2Kor 5,7
13Nu bliewen ons Gloowen, Hopninj un Leew, dise dree, oba daut jratste von dise es de Leew. #1Tess 1,3; 1Joh 4,16
Currently Selected:
1. Korinta 13: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.