2. Korinta 9
9
Help fa aundre Christen
1Daut wudd aul toom äwajen sennen, wan ekj junt noch äwa dän Deenst aun de heilje schreef. 2Ekj weet, woo wellich jie sent to halpen, un ekj hab junt aul bie dee von Mazedonien jeloft un jesajcht, daut dee von Korint un doa runtom aul tojoa reed wieren, to halpen. Jun goodet Biespel haft de mieeschte aundre uk Moot jemoakt toom jäwen. #2Kor 8,19 3Nu schekj ekj de Breeda han, om secha to moaken, daut et nich mau ladje Wieed wieren, wuamet ekj junt jeloft hab. Ekj schekj dee han, daut jie reed sent, soo aus ekj jesajcht hab. 4Wiels, wan von de Mazedonien wäa metkjeem, un seenen must daut jie nich reed wieren, must wie, om nich to sajen jie, dan nich met ons vetruen en junt toschaund woaren? 5Doawäajen docht ekj, daut wudd goot sennen, wan de Breeda aul verutkjeemen. Dee wudden dan met junt de groote vesproakne Gow reed moaken. Daut saul eene jesäajende Gow sennen, dee wellich jejäft es, un nich bemott.
Gott jeft, un dan kjenn wie jäwen
6Denkjt doaraun: Wäa spoasom seit, woat uk spoasom arnten. Wäa oba met volle Henj utstreit, woat rikjlich arnten. #Spr 11,24-25; 19,17 7Een jiedra saul daut, waut hee sikj em Hoat väajenomen haft, met Freiden jäwen un nich bemott. Gott es dee goot, dee met Freid jäwen. #Reema 12,8 8Un Gott kaun moaken, daut jie von aule Jnodengowen rikjlich haben, daut jie to aule Tiet von aules jenuach haben, un noch rikjlich goodet doonen kjennen. 9Daut steit jeschräwen:
“Hee haft sien Sot utjestreit un haft de oame jejäft.
Hee woat emma jerajcht bliewen.” #Psa 112,9
10Un hee, dee däm Seimaun Sot toom seien un Broot toom äten jeft, woat uk junt met Sot vesorjen un daut sikj vemieren loten. Hee woat daut goode, waut jie doonen, to eene rikje Arnt woaren loten. #Hos 10,12 11Jie woaren no aule Sieden han rikj jemoakt, daut jie riew utdeelen kjennen. Soo woaren väle Gott fa de Gowen danken, dee wie an vemedlen. 12Derch disen Deenst, dän jie met jun jäwen doonen, sorj jie nich mau fa daut, waut de heilje brucken, oba uk doafäa, daut väle Gott danken. 13Väle woaren Gott danken, daut jie derch disen truen Deenst bewäsen haben, daut june Woakjen un jun Gloowens Bekjantnis met däm Evangelium von Christus stemmen. 14Un wiels Gott junt butajeweenlich groote Jnod bewäsen haft, haben see een velangen no junt un woaren fa junt bäden. 15Wie danken Gott fa siene groote Gow, dee met Wieed nich to beschriewen es!
Currently Selected:
2. Korinta 9: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.