5. Mose 19
19
De Friestäda
(4Mo 35,9-28)
1Wan de Har jun Gott ieescht haft de Velkja utjerot von daut Launt woont hee junt jeft, un jie junt ieescht en dee Städa un Hiesa tus jemoakt haben, 2sell jie dree Städa besondasch betieekjnen en daut Launt woont de Har jun Gott junt jeft toom besiedlen. #5Mo 4,41-43 3Jie sellen daut Launt en dree Deels endeelen rom dee besondre Städa, un Wäaj no de Städa moaken. Dan wan irjent wäa eenen Mensch toom doot veuasoakt haft, kaun hee no eent von de Städa ranen.
4Dit es eene Jeläajenheit fa däm dee eenen Mensch toom doot veuasoakt haft, daut dee no dee Staut ranen kaun un sien Läwen vesechren. Irjentwäa dee sienen Noba gaunz onen Aufsecht toom doot veuasoakt un noch nienich eenen Groll jäajen däm jehaut haft, doaf no eent von dise Städa ranen un läwen. 5Toom Biespel, wan jie äara twee em Woolt nengonen Holt to haken, un wan eenem dan biem haken de Akjs vom Stäl flicht un däm aundren doot schleit, dan doaf dee, derch wäm de Doot jekomen es, no eent von dise Städa ranen un sien Läwen raden. 6Wan doa mau eene Staut soo betieekjent wia, dan kunn daut sennen daut de Wajch too lank wia fa däm Maun to ranen. Dee waut am schuldich hoolen, kunnen am dan noholen un doot schlonen, wan hee sikj aun dän Doot nich veschulcht haud un noch nienich eenen Groll jäajen däm jehaut haud. 7Doawäajen sell jie dree Städa soo betieekjnen.
8De Har jun Gott haft june Vodasch daut opp eenen Eit vesproaken, daut hee june Jrensen woat wieda un wieda rut saten, un junt woat aul daut Launt jäwen, woont hee june Vodasch vesproaken haft. 9Daut wia opp de Bedinjunk, daut jie däm Harn junen Gott wudden goot sennen, en däm daut jie väasechtich aul dise Jebooten hoolen, dee ekj junt vondoag oppjäw, un emma opp siene Wäaj gonen. Wan jie daut Launt kjrieen, dan sell jie noch dree aundre Städa soo betieekjnen. 10Dit es doatoo daut jie nich däm oschuldjen daut Läwen nämen, en daut Launt woont de Har jun Gott junt jeft, un jie schuldich wieren, däm sien Läwen to nämen.
11Wan, oba, een Mensch eenen Groll jäajen wäm haft, un hee plont woo hee däm trafen woat un däm soont aundoonen, daut dee doavon stoawen woat, un dan no eent von dise betieekjende Städa rant, 12dan sellen de Leidasch en dee Staut von wua hee kjeem, däm gonen von doa holen. Un see sellen am aun deejanje äwajäwen, dee sien Doot rajchen wellen, soo daut dee am ombrinjen kjennen. 13Lot junt daut nich leet doonen om dän. Jie sellen Israel rein hoolen von dee, waut schuldich sent von eenen oschuldjen Mensch doot moaken. #5Mo 21,8-9
Äwa Jrenslienjes un Zeijen
14Wan jie en daut Launt woont de Har jun Gott junt jeft aunjesiedelt sent, dan sell jie nich eenen Jrens Tieekjen wiedasaten, dän de Väavodasch lang trigj jesat haben. #5Mo 27,17
15Bloos een Zeij es nich jenuach om eenen Mensch schuldich to moaken fa irjent waut schlajchtet, wuaväa hee beschulcht woat. Doa motten twee ooda dree Zeijen sennen om eenem schuldich to finjen. #4Mo 35,30; 5Mo 17,6; Joh 8,17; 2Kor 13,1; Heb 10,28 16Wan irjent wäa sull met eene beese Aufsecht jäajen eenen aundren zeijen, 17dan sellen beid, dee wäa vekloacht woat un dee wäa de Kloag väabrinjt, ver däm Harn no de Priesta ooda de Rechta, dee dan em Aumt sent, komen. 18De Rechta woaren de Sach dan krakjt noseenen, un wan daut dan rut kjemt daut de Vekjläaja een onopprechtja Zeij jewast es, 19dan saul däm bestroft woaren, soo aus de vekloagda wudd bestroft sennen, wan hee schuldich jefungen wort. Soo sell jie daut, waut ojjerajcht es, ut june Medd oppriemen. 20Aulemaun woat dan hieren waut met däm wort, un woat sikj ferchten. Un kjeena woat soont dan noch wada doonen. 21Lot junt daut nich leet sennen om soonen. De Strof saul een Läwen fa een Läwen, een Uag fa een Uag, eene Tän fa eene Tän, eene Haunt fa eene Haunt, un een Foot fa een Foot sennen. #2Mo 21,23-25
Currently Selected:
5. Mose 19: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.