5. Mose 18
18
De Priesta äa Poat
1De levitische Priesta, de gaunza Staum Levi, saul kjeen Stekj Launt oawen en Israel. See sellen gaunz von de Opfa un aundre Gowen läwen dee däm Harn jejäft woaren. #4Mo 18,8-20; 5Mo 10,9; 1Sam 2,28; 1Kor 9,13 2See sellen kjeen Stekj Launt oawen. De Har selfst es äa Oafgoot, soo aus hee an daut vesproaken haft.
3De Stekja dee de Priesta haben sellen, wan een Stekj Vee ooda een Schop jeopfat woat, sent de Schulren un daut Unjamul, de Sieden vom Kopp, un de Moag. 4Dee sellen uk daut ieeschte Poat von daut Jeträajd, dän nieen Wien, de Olieweneelj, un de Woll, wan jie daut Schop toom ieeschte mol schäaren, kjrieen. #2Mo 23,19 5De Har jun Gott haft Levi un siene Nokomen von ut aul de Stam jewält, daut see sellen emma reed sennen däm Harn to deenen.
6Een Levit von irjent eene Staut en Israel doaf emma, wan hee well no dee Städ gonen, dee de Har wälen woat, #Rech 17,7; 19,1 7un doa en däm Nomen vom Harn sienen Gott deenen, krakjt soo aus aundre Leviten, dee doa ver däm Harn deenen. 8Dee saul krakjt soon Stekj kjrieen aus de aundre Priesta, krakjt eendoont waut hee sest noch kjricht von siene Famielje.
Gott jeft daut Volkj Profeeten
9Wan jie en daut niee Launt nenn komen woont de Har jun Gott junt jeft, sell jie junt nich dee oppscheiselje Sitten von de Enwona lieren. 10Kjeena saul sienen ieejnen Sän ooda siene ieejne Dochta aus een Opfa vebrennen. Kjeena saul derch Tieekjens sajen, waut noch emol woaren woat, ooda von Hakjsen forschen, #3Mo 18,21; 19,26.31 11met de Jeista räden, een Fluch opp eenen aundren saten, ooda von vestorwne Menschen no Rot froagen. #3Mo 20,27; 1Sam 28,3-20 12Soont sent bie däm Harn aules oppscheiselje Dinja, un wäajen soone oppscheiselje Dinja woat de Har jun Gott, de Velkja ver junt utem Launt rut joagen. 13Jie sellen däm Harn junen Gott met daut gaunze Hoat tru sennen. #1Mo 6,9; 17,1
14En de Lenda wua jie nengonen woaren, doonen de Menschen werkjlich derch Tieekjens sajen waut noch emol woaren woat un von de Jeista forschen, oba de Har jun Gott lat junt soont nich doonen. 15De Har jun Gott woat junt von mank june Lied eenen Profeet, soonen aus ekj sie, jäwen. Horcht no däm. #4Mo 12,6-8; Joh 1,45; 6,14; 7,40; Apost 3,22; 7,37 16Jie fruagen no daut, biem Horeb Boajch aun dän Dach aus jie doa vesaumelt wieren. Jie säden to däm Harn junen Gott: Lot ons nich wada de Stemm von däm Harn onsen Gott hieren, ooda dit groote Fia seenen, daut wie nich doavon omkomen. #2Mo 20,19; Heb 12,19 17Dan säd de Har to mie: Daut es goot daut see soo räden. #5Mo 5,25 18Ekj woa an eenen Profeet, soonen aus die, jäwen von mank äare Menschen, un ekj woa am miene Wieed en sien Mul jäwen, un hee woat an aules sajen waut ekj am oppjäw to sajen. #2Mo 4,12; Jes 6,8; Jer 1,9; Mat 10,19 19Un deejanja dee nich woat no daut Wuat horchen woont hee en mienen Nomen sajcht, von däm woa ekj velangen daut hee selfst to mie auntwuaten woat.
20Un wan irjent een Profeet sikj woacht eene Bootschoft to jäwen, dee ekj nich von am velangd, ooda eene Bootschoft em Nomen von aundre Jetta jeft, dee saul stoawen. 21Wan jie noch emol wundren, woo jie weeten kjennen auf de Bootschoft von irjent eenen Profeet von mie es ooda nich, 22dan hoolt em denkj, daut wan een Profeet em Harn sienen Nomen rät un daut nich soo utkjemt, dan es daut nich eene Bootschoft vom Harn. Dan haft de Profeet daut opp sikj selfst jenomen soont to sajen, un jie brucken junt nich no am rechten. #Jer 23,14; 28,1-17; Hes 13,3-16
Currently Selected:
5. Mose 18: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.