5. Mose 2
2
Derch Edom, Moab un Amon
1Met de Tiet wong wie om un jinjen enne Wiltnis nenn oppem Wajch no daut Schelpmäa, soo aus de Har ons jesajcht haud. Dan bleew wie een langet stoot opp veschiedne Städen en de Boaj bie Seir. #4Mo 21,4 2Dan säd de Har to mie: 3Jie sent lang jenuach en dise Boaj jewast. Nu got emol nom Nuaden. 4Un hee bestald uk noch: Jie woaren boolt derch de Seir Boaj von Edom gonen wua jun Frintschoft, de Nokomen von Esau, wonen. Dee woaren sikj fa junt enjsten, un soo paust opp, #4Mo 20,14 5daut jie junt nich met dee zanken. Ekj woa junt kjeent von dee äa Launt jäwen, nich emol soo väl aus toom eene Schoo Sol nopp saten. Dän Seir Boajch hab ekj Esau jejäft, daut hee doa wonen kaun. #1Mo 36,8 6Jie derwen Äten un Wota von dän kjeepen, daut jie to äten un to drinkjen haben. 7Vejät nich woo de Har jun Gott junt jesäajent haft en jieda Dinkj waut jie en dise Tiet jedonen haben. Hee haft no junt oppjepaust wiel jie derch dise groote Wiltnis jinjen, un es nu dise 40 Joa met junt jewast, un jie haben aules jehaut waut junt fäld. #4Mo 14,33
8Dan trock wie wieda von ons Frintschoft, de Nokomen von Esau dee en Seir wonen, un wie veleeten dän Wajch en daut groote Tol, un jinjen wajch von Elat un Ezjon Geber un jinjen en de Rechtunk von de Moab Wiltnis. 9Un de Har säd to mie: Striet junt nich met de Lied en Moab, de Nokomen von Lot. Fangt uk kjeenen Kjrich aun met an, wiels ekj woa junt nuscht von äa Launt jäwen toom doa aunsiedlen. De Jäajent von Ar hab ekj Loot siene Nokomen jejäft daut see doa wonen kjennen. #1Mo 19,36-37 10(To eene Tiet wonden de Emita en Ar. Daut wia een grootet Volkj un de Menschen wieren jrata jewossen aus de riesje Anakita. #5Mo 1,28 11De Emita, dee disen Nomen von de Moabita kjrieejen, wieren to eene Tiet, soo aus de Anakita, aus Refaita bekaunt. 12De Horita wonden to eene Tiet en Seir, oba Esau siene Nokomen juagen dee doa wajch, un brochten an om, un neemen daut Launt en, krakjt soo aus Israel daut Launt enneem woont de Har an jeef.) #1Mo 14,6 13un de Har säd: Nu got äwa dän kjlienen Riefa dee Sered heet. Un wie jinjen doa derch. #4Mo 21,12 14De gaunze Tiet, von dan aus wie Kadesch Barnea veleeten, bat wie derch däm Sered jinjen, wieren 38 Joa. Un en dee Tiet wieren aul onse kjrichsfäje Mana, dee ut Ägipten kjeemen, utjestorwen, soo aus de Har an vesproaken haud. #4Mo 14,34 15De Har haud doano jeseenen, daut jieda latsta von dee jestorwen wieren. #4Mo 16,31-32; 21,6; 25,3-5
16No däm, daut dee kjrichsfäje Mana aula utem Volkj jestorwen wieren, 17säd de Har to mie: 18Vondoag sell jie bie Ar, en de Jäajent von de Moabita derchgonen, #4Mo 21,13.15 19un dan woa jie no de Amonita äa Launt komen. Striet junt nich met dee, un moakt nich Kjrich met dee. Ekj woa junt kjeent von daut Launt jäwen, waut ekj Loot siene Nokomen jejäft hab. #1Mo 19,38 20(Dise Jäajent es uk bekaunt aus de Jäajent von de Refaita. Dee wonden doa to eene Tiet. De Amonita nanden dee Samsumita, 21un daut wia een grootet Volkj, un dee wieren uk groot jewossen, soo groot aus de Anakita. Oba de Har leet de Amonita de Macht äwa de Refaita haben un an utroden, soo daut see doa wonen kunnen. 22De Har haud fa Esau siene Nokomen, dee nu en Seir wonen, krakjt soo de Horita utjerot, daut de Edomita doa nu wonen. 23Un daut Launt velenjd däm Mäa, wua de Awita en äare Darpa wonden, bat soo wiet sieden aus Gaza, wort von de Kaftorita enjenomen. De Kaftorita wonen doa noch.) #1Mo 10,14; Jos 13,3
De Siech äwa däm Amorita Kjennich
(4Mo 21,21-30)
24Aus wie derch Moab wieren, säd de Har: Got derch daut Arnon Tol. Un doa hab ekj junt dän Amorita Kjennich Sihon, dee Kjennich en Heschbon es, jejäft. Moakt Kjrich met däm, un moakt daut Launt junt. 25Von hia wieda woa ekj de Lied voll Angst un Forcht fellen. Aule waut nu wieda von junt hieren, woaren sikj enjsten fa junt. #2Mo 23,27
26Dan aus wie enne Kedemot Wiltnis wieren, schekjt ekj Mana no Kjennich Sihon en Heschbon un boot am Frädens Bedinjungen aun: #4Mo 21,21-26 27Lot ons derch jun Launt trakjen. Wie woaren jlikj derch gonen un nich rajchtsch ooda linkjsch vom Wajch rauf gonen. 28Wie woaren fa ons Äten un Wota waut wie brucken met Jelt betolen. Lot ons bloos derch dien Launt gonen, 29soo aus Esau siene Nokomen en Seir un de Moabita en Ar deeden, bat wie äwarem Jordan gonen, en daut Launt nenn, woont de Har ons jeft. 30Oba de Kjennich Sihon von Heschbon jeef ons nich Frieheit derch sien Launt to gonen. De Har jun Gott haud däm sien Jeist aufjehoat un am jäajenaun enjestalt. De Har deed daut soo, daut hee ons daut Launt kunn en onse Macht jäwen, soo aus daut noch bat vondoag es. #2Mo 4,21 31Un de Har säd to mie: Kjikjt emol. Ekj hab däm Kjennich Sihon un sien Launt en june Macht jejäft. Trakjt doa nenn un besiedelt daut. #Jos 10,12; Jer 24,8; Reema 1,24; 4,25; 8,32 32Dan kjeem de Kjennich Sihon un aul sien Häa ons entjäajen, daut see bie Jahaz met ons kjriejen wullen. 33Oba de Har ons Gott jeef ons de Macht äwa am, un wie schluagen am, un siene Säns, un aul siene Mana doot. 34Wie neemen uk jieda Staut en un vedorwen dee, un brochten aule Menschen doabennen om. Kjeena wort veschoont. 35Aules waut wie neemen wia daut Vee un soone Sachen aus ons wieetvoll wieren. 36De Har ons Gott jeef ons jieda Staut von Aroer oppe Kaunt vom Arnon Tol, un de Staut em Tol, bat soo wiet aus Gilead en onse Macht. Kjeene Staut haud Mieren, dee too stoakj fa ons wieren. #Jos 13,9; 2Sam 24,5 37Oba wie jinjen nich en de Amonita äare Jäajent velenjd däm Jabok Riefa, ooda no de Städa oppe Boaj, ooda no irjent eene aundre Städ, dee de Har ons Gott ons veboden haud.
Currently Selected:
5. Mose 2: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.