5. Mose 3
3
De Siech äwa Kjennich Og von Baschan
(4Mo 21,33-35)
1Dan wieda, jinj wie nuaden no Baschan. Un de Kjennich Og von Baschan kjeem ons entjäajen met aul siene Mana un kjriejd met ons bie Edrei. #4Mo 21,33-35 2Un de Har säd to mie: Hab nich Angst fa däm. Ekj hab am, un aul siene Menschen un sien Launt, en june Macht jejäft. Doot met disem krakjt soo aus jie met däm Amorita Kjennich Sihon deeden, dee en Heschbon wond. 3Un de Har jeef ons Kjennich Og un siene Menschen en onse Macht un wie brochten dee aula om. Wie leeten nich eenen Mensch äwa. 4Wie neemen aul äare Städa en, un leeten nich eene äwa. Doa wieren 60 Städa en de gaunze Argob Jäajent woone däm Kjennich Og von Baschan jehieeden. 5Aul dise Städa hauden Mieren un Puaten, un Stangen toom de Puaten veschluten. Un buta dise Städa wieren doa noch een Deel Darpa onen Mieren. 6Un aulawäajen vedorw wie dee Städa un brochten aul de Mana, Frues un Kjinja om, krakjt soo aus wie en de Städa hauden dee Kjennich Sihon von Heschbon jehieeden. 7Wie neemen emma daut Vee un waut ons noch wieetvoll wia. #5Mo 20,13-18 8Wie neemen dan daut Launt von de twee Amorita Kjennichs oosten vom Jordan. Daut wia de gaunze Jäajent vom Arnon Riefa bat däm Hermon Boajch. #(8 und 9)5Mo 4,48; 1Chr 5,23; Psa 29,6 9De Hermon Boajch woat von de Sidonia Sirjon jenant, un von de Amorita Senir. 10Wie neemen aul daut Launt en, woont däm Kjennich Og von Baschan sient jewast wia, de Städa opp daut Huachlaunt, un de Jäajent von Gilead un von Baschan, soo wiet oosten aus de Städa Salcha un Edrei. 11De Kjennich Og wia de latsta von de Refaita äwajebläwen. Dee haud een steenanet Soakj, daut twee Meeta breet un äwa vea Meeta lank wia. Eena kaun daut vondoag noch en Raba, de Amonita Staut, seenen.
Daut Launt oosten vom Jordan woat enjedeelt
(4Mo 32,1-42)
12Aus wie daut Launt enneemen, jeef ekj däm Staum Ruben un däm Staum Gad de Jäajent bat soo wiet sieden aus Aroer aum Arnon Riefa, un de halft von de Boaj bie Gilead met de veschiedne Städa waut doa wieren. 13Dän haulwen Staum Manasse jeef ekj daut äwaje von Gilead un daut gaunze Baschan wua Og wia Kjennich jewast. (De Argob Jäajent von Baschan nanden see emma Refaim.) 14Jair, een Maun ut Manasse, kjrieech de gaunze Argob, ooda Baschan Jäajent, bat aun de Jrens von Geschur un Maacha. Hee nand de Darpa doa de “Jair Darpa”, soo aus dee bat däm vondoagschen Dach noch bekaunt sent. 15Ekj jeef de Nokomen von Machir em Staum Manasse de Jäajent von Gilead. 16Un de Stam Ruben un Gad jeef ekj de Jäajent von Gilead bat aum Arnon Riefa. De Riefa es de siedne Jrens un de Riefa Jabok de nuadne Jrens. De Jabok es uk een Poat von de Jrens met de Amonita. 17Aun de wastne Kaunt jinkj äa Launt en daut groote Tol bat aum Jordan Riefa, un rieekjt von daut Kinneret Mäa bat daut Solt Mäa, daut en daut groote Tol es. Un nom Oosten han rieekjt daut bat aun däm Boajch Pisga. #Jos 11,2; 19,35; Mrk 6,53 18Un ekj säd junt dan: De Har jun Gott haft junt daut Launt jejäft, daut jie doa wonen kjennen. Aul june Armeejunges sellen daut ieeschte äwa dän Jordan gonen, un dan daut äwaje vom Volkj. 19Bloos june Frues un de Kjinja un jun Vee, un jie haben een Deel Vee, sellen en de Städa bliewen dee ekj junt aul toojedeelt hab. 20Got un halpt de äwaje Israeliten daut Launt entonämen, daut de Har jun Gott junt wasten vom Jordan jeft. Wan see doa ieescht aunsiedlen kjennen, dan kaun een jiedra no siene Städ gonen. 21Un ekj säd Josua to dee Tiet: Du hast jeseenen waut de Har to dee beid Kjennichs deed. Hee woat krakjt soo doonen to aul de Kjennichrikjs en woone jie noch nengonen woaren. #4Mo 27,18.22 22Enjst junt nich fa dee. De Har jun Gott es deejanja, dee fa junt ensteit. #5Mo 1,29-30
Wuarom Moses nich en daut vesproakne Launt gonen kunn
23Om dee Tiet bäd ekj iernstlich: 24Har, ons Har, ekj weet daut du noch mau aunjefongen hast mie dee groosoatje un wundavolle Dinja to wiesen, dee du doonen west. Doa es sest kjeen Gott enne Himmel ooda oppe Ieed, dee soone Macht eewen kaun aus du. 25Lot mie doch han gonen un daut goode Launt seenen jantsied vom Jordan, dee schmocke Boaj un de Libanon Jäajent. 26Oba de Har wia sturr met mie wäajen junt, un hee horcht nich emol no mie. Hee säd eefach: Sie tofräd, un räd nich noch een mol to mie wäajen dit. #4Mo 20,12 27Go opp däm Pisga Boajch un kjikj nom Wasten un nom Nuaden, nom Sieden un nom Oosten, un bekjikj die waut du seenen kaust. Oba du woascht nienich äwarem Jordan gonen. 28Oba laj Josua daut krakjt väa, un spräakj am Moot too. Hee saul väaren ver dit Volkj gonen un daut Launt ennämen daut du seenen kaust. #5Mo 31,3.7 29Un soo kjeem daut, daut wie en daut Tol, jäajen Bet Peor bleewen.
Currently Selected:
5. Mose 3: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.