5. Mose 23
23
Wäa en de Vesaumlunk komen doaf
1En Maun saul nich Jeschlajchtsvekjia met sien Voda siene Fru haben; hee saul äare Dakj nich aufdakjen. #3Mo 18,8; 2Sam 16,22 2Een Maun däm siene Hooden en sienen Sak vedorwen sent ooda däm sien Jeschlajchtsjlett auf es, saul nich enne Vesaumlunk ver däm Harn komen. #Jes 56,3-4; Apost 8,27 3Een Mensch, dee derch Ehebruch es to Welt jekomen, saul nich enne Vesaumlunk ver däm Harn komen un siene Nokomen uk nich bat de tieende Jennerazion. #Esra 9,1—10,17
4Kjeen Amonita ooda Moabita saul enne Vesaumlunk ver däm Harn komen, uk bat de tieende Jennerazion sellen dee nich enne Vesaumlunk komen. #1Mo 19,37-38 5Daut es wäajen see junt nich met Broot un Wota entjäajen kjeemen, aus jie hinjawäajes wieren oppem Wajch von Ägipten. Un uk wäajen see dän Bieleam, Beor sien Sän von Petor en Mesopotamien aunneemen om eenen Fluch opp junt to spräakjen. #4Mo 22,5-6 6Oba doch de Har jun Gott horcht nich no Bieleam un veendad dän Fluch to een Säajen fa junt, wiels de Har jun Gott junt goot es. 7Doot nienich waut om an to halpen ooda an rikj to moaken. #Esra 9,12
8Jie sellen eenen Edomita nich veachten. See sent doch june Breeda. Uk eenen Ägipta sell jie nich veachten, wiels jie en äa Launt framde wieren. 9Dee äare Nokomen derwen vonne dredde Jennerazion aun enne Vesaumlunk ver däm Harn komen.
Daut Kjrich Loaga rein hoolen
10Wan jie aus een Häa jäajen june Fiend gonen, sell jie junt von jieda beese Sach rein hoolen. 11Wan doa irjent een Maun orrein talt, wiels hee sikj enne Nacht derch een Droom naut jemoakt haft, dan saul hee buta daut Loaga gonen un doa bliewen #3Mo 15,18 12bat däm Owent. Dan saul hee sikj met Wota wauschen, un wan de Sonn unja es doaf hee trigj em Loaga komen.
13Jie sellen buta daut Loaga eene Städ haben, wua jie hangonen wan junt needich es. 14Droacht eenen Stock aus een Poat von jun Jereetschoft, soo daut jie kjennen een Loch moaken un jun Aufgank veschoawen. 15De Har jun Gott es met junt em Loaga om junt Schutz to jäwen, un junt von dän Fient to raden; doawäajen sell jie daut Loaga rein un heilich hoolen. Lot daut nich väakomen, daut hee waut jemeenet em Loaga finjt un sikj von junt wajch dreit. #3Mo 26,12
Veschiedne Väaschreften
16Wan een Sklow von sien Wieet wajchrant un no sest wäm kjemt, sell jie am nich trigj no däm Wieet jäwen. 17Hee saul mank junt wonen opp de Städ wua hee well. Jie sellen am nich daut Läwen schwoa moaken. #Fil 12-16
18Kjeene israelitische Mejal saul eenen Huarendeenst doonen fa eenen Aufgott. Kjeen israelitischa Maun saul aus een Huara deenen fa eenen Aufgott. #Hos 4,14; 1Kjen 14,24; 2Kjen 23,7 19Jie sellen nich dän Vedeenst von eene Hua ooda von eenen Huara en däm Harn junen Gott sien Hus brinjen aus een Poat von eene Gow, dee hee däm Harn vesproaken haft. Soont wudd oppscheislich fa däm Harn sennen. #Opb 22,15
20Jie sellen nich Entras nämen, wan jie junen Noba Jelt ooda to äten, ooda irjent sest waut lieen, soo daut de Har jun Gott junt säajnen kaun en daut Launt, wua jie nengonen doa to wonen. #2Mo 22,24; 3Mo 25,36 21No eenen framden derw jie opp Entras utlieen, oba nich no eenen von jun Volkj. Dan woat de Har jun Gott junt säajnen kjennen en aules waut jie doonen, wan jie en daut Launt nenn komen, woont de Har junt jeft, daut jie doa läwen woaren.
22Wan jie däm Harn junen Gott waut vesproaken haben, dan hoolt daut nich trigj un lot daut nich vetrakjen daut jie daut jäwen. De Har jun Gott woat onbedinjt jun Poat von junt velangen, un daut wudd eene Sind fa junt sennen, wan jie daut trigjhilden. #4Mo 30,3 23Oba jie brinjen kjeene Schult opp junt, wan jie am kjeen Vespräakjen moaken. 24Hoolt aules waut jie jesajcht haben, un doot aules waut jie däm Harn junen Gott friewellich vesproaken haben, wan jie daut een mol jesajcht haben.
25Wan wäa en sienen Noba sien Wiengoaden jeit, kjenn jie doa soo väl äten aus jie wellen, oba plekjt junt nuscht en eenen Korf nenn. 26Wan wäa en sienen Noba sien Jeträajd Flekj jeit, doaf hee met de Henj waut plekjen, oba hee doaf nich met eene Sans doa nenn schnieden. #Mat 12,1
Currently Selected:
5. Mose 23: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.