5. Mose 24
24
Äwa daut Eheläwen
1Wan een Maun eene Mejal nemt un befriet sikj met ar, un wan hee no däm waut schaundhauftet aun ar finjt, un ar nich mea haben well, dan kaun hee een Scheedungsbreef utschriewen, un ar dän jäwen un ar wajch schekjen, soo daut see wajchjeit. #Mat 5,31-32 2Wan dan een aundra Maun sikj dee friet, 3un dis tweeda Maun ar nich jefelt, dan kaun hee ar en Scheedungsbreef schriewen, ar dän jäwen un ar wajchschekjen. Wan äa tweeda Maun ar wajchschekjt ooda hee stoaft, 4dan doaf äa ieeschta Maun ar nich trigj nämen aus siene Fru. See es dan orrein fa am. Soont wudd däm Harn sea jäajenaun sennen. Brinjt nich soone Schult opp daut Launt, woont de Har jun Gott junt aus een Oafgoot jeft. 5Een Maun dee noch nich lang befriet es saul nich met de Armee gonen ooda irjent eene Veauntwuatunk met dee haben. Hee saul een Joa frie sennen von soone Oppgow un tus bliewen, daut hee de Fru jlekjlich moakt, dee hee sikj jenomen haft. #5Mo 20,7
De oame un behindade äa rajcht
6Wan jie wäm waut lieen, dan sell jie nich siene Hauntmäl ooda sien bowaschta Molsteen aus Birj aunnämen, wiels dan wudd jie sien Läwen aus Birj nämen.
7Wan een Israelit sienen Noba met Jewault nemt un däm aus een Sklow brukt, ooda dän aus een Sklow vekjaft, dan saul dee waut am met Jewault jenomen haft, doot jemoakt. Soo sell jie soone Sind von mank junt utroden. #2Mo 21,16
8Paust sea opp wan doa wäa leprakrank es, daut jie krakjt soo doonen aus de levitische Priesta von junt velangen. Soo aus ekj dee väajesajcht hab, soo sell jie onbedinjt doonen. #3Mo 13,1—14,47 9Vejät nich waut de Har jun Gott hinjawäajes to Mirjam deed, aus jie von Ägipten kjeemen. #4Mo 12,10-15
10Wan jie eenen Noba waut lieen, sell jie nich en sien Hus nengonen om daut Jebirjde auftoholen. 11Jie sellen buta daut Hus luaren bat hee daut Jebirjde rutbrinjt. 12Un wan hee oam es, dan sell jie nich en daut Jebirjde schlopen. 13Wan de Sonn unjajeit, sell jie am de Dakj trigjbrinjen soo daut hee doabennen schlopen kaun, un hee die säajnen kaun. Soont wudd eene jerajchte Sach ver däm Harn junen Gott sennen. #2Mo 22,25; 5Mo 6,25; Hiob 22,6; Amos 2,8
14Jie sellen een Oabeida, de oam un schlajcht auf es, nich kjwälen ooda daut Läwen schwoa moaken, eendoont auf daut een Israelit es, ooda een framda, dee en jun Launt un en june Städa wont. #3Mo 19,13; Jak 5,4 15Tol däm aule Dach ea de Sonn unjajeit ut, wiels hee es oam un räakjent doamet. Wan jie daut nich doonen, dan kunn hee däm Harn aunroopen jäajen junt, un jie wudden schuldich sennen fa de Sind.
16Vodasch sellen nich dootjemoakt fa äare Kjinja äa Vegonen, un Kjinja sellen nich dootjemoakt fa äare Vodasch äare Schult. Een jiedra saul fa siene ieejne Sinden bestroft woaren. #2Kjen 14,6
17Jie sellen nich eenen framden ooda een Weisenkjint sien rajcht vedreien, ooda eene Wätfru äare Kjleeda nämen aus Birjschoft. #2Mo 22,20.21; 23,6.9 18Jie sellen doaraun denkjen, daut jie emol Sklowen en Ägipten wieren un daut de Har jun Gott junt von doa frie muak. Daut es wuarom jie dit Jeboot hoolen sellen. #5Mo 5,15
19Wan jie june Arnt nenbrinjen, un jie doa eene Goaw vejäten, dan got nich trigj no dee. Lot daut fa de framde, de Weisen, un de Wätfrues. Dan kaun de Har jun Gott junt säajnen en aules waut jie doonen. #3Mo 19,9-10 20Wan eena een Oliewenboom schleit toom de Bäaren aufschedren, dan schlot de Asta nich toom tweeden mol. De äwaje sent fa de framde, de Weisen, un de Wätfrues. 21Wan jie de Wiendruwen oppnämen en june Wiengoades, sell jie nich noch gonen noläsen. Dee sent fa de framde, de Weisen, un de Wätfrues. 22Jie sellen doaraun denkjen, daut jie emol Sklowen en Ägipten wieren. Daut es wuarom jie dit Jeboot hoolen sellen.
Currently Selected:
5. Mose 24: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.