5. Mose 26
26
Äwa daut ieeschte von de Arnt
1Wan jie ieescht en daut Launt nenn trakjen, woont de Har jun Gott junt aus een Oafgoot jeft, un jie daut ennämen un daut junt moaken, 2dan sell jie emma waut von daut ieeschte, waut jie von daut Launt arnten, en eenen Korf saten, un doamet no de Städ gonen, dee de Har jun Gott wält, daut hee doa aunjebät saul. #2Mo 23,19; 3Mo 2,14 3Brinjt daut no däm Priesta dee doa em Aumt steit un sajcht to am: Ekj jäw däm Harn mien Gott vondoag miene Aunerkjanunk, daut ekj en daut Launt nenn jekomen sie, woont de Har miene Vodasch opp eenen Eit vesproaken haft. 4Un de Priesta woat dan junen Korf nämen, un dän verem Aultoa fa däm Harn junen Gott saten, 5un jie sellen dan ver däm Harn junen Gott sajen: Mien Voda wia een Aramäa, dee noanich tus wia. Un hee jinkj no Ägipten met weinich Menschen un bleef doa aus een framda, oba hee wort doa een aunjeseenet Volkj von väl Menschen. #(5-9) 5Mo 6,20-25; Jos 24,2-13; Psa 78,1-72; 105,1-45; 136,1-26 6De Ägipta behaundelden ons sea schlajcht. See muaken ons unja schwoare Oabeit lieden. 7Dan roopt wie däm Harn, onse Vodasch äa Gott, aun, un de Har horcht no ons, un hee sach woo wie oabeiden un lieden musten, un woo wie unjadrekjt worden. 8Un de Har leid ons ut Ägipten met eene stoakje Haunt un een Oarm dee nich meed wort. Hee jeef Tieekjens un deed Wunda woone de Ägipta sea enjsten. 9Un hee brocht ons no dise Städ un jeef ons dit Launt wua Malkj un Honnich rant. 10Un nu brinj ekj von daut ieeschte vonne Arnt von daut Launt, daut de Har mie jejäft haft. Un dan sat de Frucht han ver däm Harn junen Gott un bät am aun. 11Dankt däm Harn junen Gott fa aules waut hee junt un june Famielje jejäft haft. Un lot de Leviten un de framde, dee met junt wonen, uk en daut Fast deelnämen. #5Mo 16,11.14
12Jieda dreddet Joa es een Joa toom een Tieendel aufjäwen aun de Leviten, de framde, de Weisen, un de Wätfrues, soo daut dee sikj kjennen saut äten en june Jäajent. #5Mo 14,27-29 13Wan jie daut jedonen haben, dan sajcht ver däm Harn junen Gott: Ekj hab daut Poat waut ekj die jeweit hab aufjejäft aun de Leviten, de framde, de Weisen, un de Wätfrues, krakjt soo aus du mie daut väajesajcht hast. Ekj hab uk kjeent von diene Jebooten äwaträden ooda hinjaloten. 14Von daut waut die jeweit wia, hab ekj nich jejäten soogoa aus ekj em Truastaunt wia, un ekj hab nuscht doavon wiedajejäft wiels ekj orrein wia, un ekj hab nuscht doavon aus een Opfa fa de Vestorwne jejäft. Ekj sie die, Har mien Gott, jehuarsom jewast, un ekj hab krakjt soo jedonen aus du mie jeboden hast. #4Mo 19,14-15; Hes 24,17.22; Hos 9,4 15Kjikj rauf opp ons, von diene heilje Städ em Himmel, un säajen ons Israeliten, dee wie dien Volkj sent, en daut Launt woont du ons jejäft hast, doano aus du onse Vodasch opp een Eit vesproaken hast, een Launt wua Malkj un Honnich rant.
16De Har jun Gott jeft junt vondoag daut Jeboot daut jie aul dise Jesazen un Räajlen hoolen sellen. Bemieecht junt met Hoat un Seel dee vollens to hoolen. 17Jie haben vondoag däm Harn aus junen Gott aunerkjant. Jie haben vondoag vesproaken, daut jie siene Jebooten un Väaschreften un Räajlen hoolen woaren, un daut jie däm Harn jehorchen woaren. 18Un de Har haft junt vondoag aunerkjant aus sien ieejnet Volkj, daut aul siene Jebooten hoolen woat, 19un daut Volkj woont hee mea Aunerkjanunk, un Preis un Iea jäwen woat, aus irjent een aundret Volkj waut hee jemoakt haft. Un jie woaren een heiljet Volkj fa däm Harn junen Gott sennen, soo aus hee jesajcht haft. #5Mo 28,1
Currently Selected:
5. Mose 26: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.