5. Mose 30
30
De Wol tweschen Läwen un Doot
1Jie woaren beides de Säajnungen un dän Fluch, dän ekj junt vondoag väajesat hab, beläwen, un dan woat de Har junt en veschiedne Lenda vestreien. Wan jie dan wada aun disen Bunt denkjen, 2un junt no däm Harn junen Gott kjieren, jie met Kjinja toop, un jie dan met Hoat un Seel jehuarsom sent to aul daut, waut ekj junt vondoag väajesajcht hab, #3Mo 26,40; 5Mo 4,30 3dan woat de Har jun Gott junt wada trigjäwen waut junt jewast es. Hee woat sikj äwa junt erboarmen, un junt wada von mank aul de Lenda toopsaumlen, wua hee junt vestreit haud. #Hes 16,53; Jer 29,14; 32,37; Amos 9,14 4Un wan june vestreide uk enne wietste Akj oppe Ieed sent, doawäajen woat de Har jun Gott junt doch von doa toopsaumlen un trigjbrinjen. #5Mo 28,64; Neh 1,9 5De Har jun Gott woat junt en daut Launt nenn brinjen, woont june Vodasch äat wia, daut jie doa kjennen aunsiedlen. Un dan woat hee junt jäwen, daut jie woaren bäta auf sennen un een jratret Volkj sennen aus waut june Vodasch wieren. 6Un de Har jun Gott woat junt vom Hoat jehuarsom moaken, un jie un june Nokomen woaren däm Harn junen Gott met daut gaunze Hoat un met de gaunze Seel goot sennen. Soo woa jie wiesen daut jie mie jehieren, krakjt soo aus jie daut met daut beschnieden bewiesen, un jie woaren oppe Lenjd een goodet Läwen haben. #5Mo 10,16; Jer 4,4; Hes 11,19; Reema 2,29 7Dan woat de Har jun Gott aul dän Schoden un Fluch opp june Fiend brinjen, dee jäajen junt wia un junt bedrekjt. 8Jie woaren dan wada aul de Väaschreften von däm Harn junen Gott hoolen, dee ekj junt hia vondoag jejäft hab. 9De Har jun Gott woat junt Erfolch jäwen en aules waut jie doonen, hee woat june Flekja un Goades fruchtboa moaken. De Har woat sikj wada freien daut hee junt rikj moaken kaun, soo aus am daut Freid muak daut hee june Vodasch rikj moaken kunn. 10Dit woat doaderch komen, daut jie am jehuarsom sent un aul de Jesazen hoolen, dee en dit Buak von Lieren sent. Oba jie motten junt met jun gaunzet Hoat un met june gaunze Seel no am kjieren.
11Daut Jeboot waut ekj junt vondoag jäw es nich too schwoa fa junt, daut es nich ommäajlich fa junt to hoolen. 12Daut es nich wäa weet woo huach, daut eena froagen woat, wäa kaun doa han un ons daut brinjen, daut wie daut hieren un doonen kjennen. #Reema 10,6-8 13Daut es uk nich aun de aundre Sied vom Mäa, soo daut wäa froagen woat, wäa kaun äwa daut Mäa gonen un ons daut brinjen, soo daut wie daut hieren un doonen kjennen. 14Nä, daut Wuat es gaunz dicht bie. Jie haben daut en dise Wieed, un en jun Hoat, soo daut jie daut utläwen kjennen.
15Horcht emol. Ekj sat junt vondoag ver eene Wol. Well jie Läwen un Erfolch, ooda Doot un beeset. #5Mo 11,26 16Ekj velang vondoag von junt, daut jie däm Harn junen Gott woaren goot sennen, daut jie am woaren jehuarsom sennen, un daut jie siene Jebooten, Jesazen un Väaschreften hoolen woaren. Doot daut soo daut jie kjennen Erfolch haben un jrata woaren, un soo daut de Har jun Gott junt säajnen kaun en daut Launt, wua jie nu nengonen woaren daut entonämen. 17Oba wan jie woaren vom Harn wajch dreien un am nich jehorchen, un woaren met gonen met dee waut aundre Jetta aunbäden un deenen, 18dan saj ekj junt nu aul, dan woa jie omkomen. Dan woa jie nich lang läwen en daut Launt aun jantsied vom Jordan wua jie nu han gonen daut junt to moaken. #5Mo 8,19 19Ekj jäw junt vondoag de Wol, auf jie Läwen ooda Doot haben wellen, auf jie dän Säajen ooda dän Fluch haben wellen. Un ekj kroag dän Himmel un de Ieed daut see sellen de Zeijen sennen. Doawäajen wält nu Läwen, waut junt un june Nokomen woat goot gonen. #5Mo 4,26 20Siet däm Harn junen Gott goot, jehorcht daut waut hee sajcht, un hoolt junt bloos aun am. Daut woat junt een langet Läwen jäwen en daut Launt woont de Har Abraham, Isaak un Jakob met een Eit vesproaken haft.
Currently Selected:
5. Mose 30: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.