5. Mose 29
29
Däm Harn sien Bunt met Israel en Moab
1Un Moses roopt daut gaunze israelitische Volkj toop un säd to an: Jie haben selfst jeseenen waut de Har to dän ägiptischen Kjennich un siene aunjestalde en daut gaunze Launt deed. #2Mo 19,4 2Jie sagen de schlemme Ploagen, un de Tieekjens un Wunda dee de Har äwa an brocht. #5Mo 4,34; 7,19 3Doch bat vondoag haft de Har junt nich soorajcht een Vestentnis jejäft, äwa daut waut jie jeseenen un jehieet haben. #5Mo 5,26 4Vieetich Joa leid ekj junt derch de Wiltnis, un june Kjleeda aun jun Kjarpa sent nich vefollen un daut Footich es nich derchjeschieet. #5Mo 8,4 5Dee gaunze Tiet hab jie nich Broot jejäten un nich Wien ooda stoakjet to drinkjen jehaut. Aul dit wia doatoo daut jie kloa seenen sullen, daut ekj de Har jun Gott sie. 6Un aus wie bat dise Städ kjeemen, kjeemen de Kjennich Sihon, von Heschbon, un de Kjennich Og, von Baschan, ons entjäajen. Oba wie schluagen dee, #4Mo 21,21-35 7un neemen äa Launt en, un deelden de Stam Ruben, Gad, un dän haulwen Manasse Staum daut too. #4Mo 32,1-42 8Nu siet väasechtich un hoolt junt aun de Väaschreften von disen Bunt, soo daut jie junt nopp buaren kjennen en aules waut jie doonen.
9Vondoag sto jie aula ver däm Harn junen Gott, jie Leidasch enne Stam, de aunjeseene Mana, de aunjestalde em Volkj, un aule Mana, 10jie Kjinja, un Frues, un uk de framde dee mank junt wonen un jun Holt haken ooda jun Wota droagen. #Jos 9,27 11Jie aula sent hia om eenen Bunt met däm Harn junen Gott to moaken, eenen Bunt met de Vespräakjungen un Bedinjungen, dee hee vondoag opp junt lajcht. 12Met disen Bunt woat de Har jun Gott daut foadich moaken, daut jie sien Volkj sent, un daut hee jun Gott es, soo aus hee Abraham, Isaak un Jakob daut vesproaken haft. 13Jie, dee jie hia stonen, sent nich de eensje, waut disen Bunt met de Vespräakjungen un Bedinjungen met däm Harn moaken. #1Mo 17,7; 5Mo 5,3 14De Bunt es met junt, dee jie hia ver däm Harn junen Gott stonen, un krakjt soo goot met june Nokomen, dee hia noch nich sent.
15Jie weeten noch woo ons daut en Ägipten jinkj, ooda uk aus wie derch de veschiedne Velkja äare Jäajenden reisden. 16Jie sagen, waut fa oppscheiselje Dinja dee hauden, äare Jetta von Holt un Steen, un von Selwa un Golt. 17Paust opp daut kjeen Maun ooda Fru, kjeene Famielje ooda Staum dee hia vondoag es, woat von däm Harn onsen Gott wajchdreien, un dan aundre Jetta deenen. Daut wudd soo sennen aus wan doa eene Wartel wia, dee eene betre ooda jeftje Stud äwadäl brocht. #5Mo 32,32; Hos 10,4; Amos 6,12; Heb 12,15 18Mucht doa kjeena hia vondoag sennen, dee dit Vespräakjen opp sikj nemt un doch meent daut aules woat goot gonen, wan hee uk sienen ieejnen stieekopjen Wajch jeit. Daut wudd Schoden brinjen opp daut jewessade un uk opp daut drieeje Launt. 19De Har woat soonen Mensch nienich vejäwen; hee vedrajcht soont nich un woat sienen hetsjen Oaja loten opp däm komen, un aules waut en dit Buak jedreift es woat sikj opp am bewiesen. De Har woat däm Mensch ombrinjen. #5Mo 28,15-68 20De Har woat krakjt opp däm, von aule Menschen en Israel, grooten Schoden brinjen, soo aus daut en dit Buak vom Jesaz jeschräwen steit. 21Un en lotre Jennerazionen woaren june Kjinja un uk de framde von aundre Lenda seenen woo de Har ons enne Grunt jebrocht haft un waut von lieden hee opp daut Launt jebrocht haft. 22De Ieed oppe Flekja woat met Schwäwelblitt un Solt vedorwen sennen. Kjeena woat doa waut saten un doa woat nuscht waussen, nich emol Krut. Daut woat sennen aus Sodom un Gomorra, ooda Adma un Zebojim aus dee vestieet worden derch däm Harn sienen rietenda Oaja. #1Mo 19,24 23Dee waut daut seenen, woaren froagen: Wuarom haft de Har soont jedonen, un wuarom haft hee soonen grooten Oaja opp an jebrocht. 24Un de Auntwuat woat sennen: Daut es wiels see dän Bunt met däm Harn, äare Vodasch äaren Gott, tosied saden, dän Bunt dän hee met an muak aus hee an ut Ägipten rutbrocht. 25See kjieeden sikj dan no aundre Jetta un deenden dee. See bäden Jetta aun, dee see nich verhäa kjanden, un von woone de Har an nich jelieet haud. 26Un doa derch brochten see däm Harn sien Oaja opp äa Launt, un jieda Schoden dee en dit Buak steit. 27De Har wia sea doll un gaunz root hinjare Uaren, un en sienen hetsjen Oaja, reet hee an ut äa Launt rut un schmeet an en een framdet nenn wua see uk noch vondoag sent.
28Doa es soont waut de Har ons Gott nich openboa jemoakt haft, un daut aula jehieet am auleen, oba daut Jesaz waut hee ons openboa jemoakt haft, daut jehieet ons un onse Kjinja opp aule Tieden, un doatoo jehieet daut wie daut hoolen. #5Mo 32,34
Currently Selected:
5. Mose 29: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.