5. Mose 28
28
De Säajen fa Jehuarsome
(3Mo 26,3-13; 5Mo 7,12-15)
1Wan jie däm Harn junen Gott woaren jehuarsom sennen, un woaren aul siene Jebooten hoolen, dee ekj junt vondoag jäw, dan woat de Har jun Gott junt aus een Volkj huach äwa aule aundre Velkja saten. #5Mo 26,19 2Wan jie däm Harn junen Gott jehorchen woaren, dan woaren aul dise Säajnungen opp junt komen:
3De Har woat june Staut un jun Flekj säajnen. #(3-6) 1Mo 49,25-26 4De Har woat june Famielje met väl Kjinja säajnen, un june Flekja met goode Arnten, un jun Vee met väl junge. 5De Har woat junen Spikja un junen Väarot enne Kjäakj säajnen. 6De Har woat junt säajnen, wan jie wajchgonen un wan jie no Hus komen. #Psa 121,8
7De Har woat june Fiend, dee jäajen junt komen, toschaund moaken; dee woaren von eene Rechtunk jäajen junt komen un en säwen Rechtungen von junt flichten. 8De Har woat junt en june Stalinjen säajnen, un en aules waut jie junt äwanämen. Hee woat junt en daut Launt, woont de Har jun Gott junt jeft, säajnen. #3Mo 25,21 9De Har woat sikj junt sien jeweidet Volkj moaken, soo aus hee junt vesproaken haft, wan jie de Jebooten von däm Harn junen Gott hoolen woaren un no siene Väaschreften haundlen woaren. #2Mo 19,5-6 10Dan woaren aule Velkja oppe Ieed seenen, daut dit Volkj däm Harn sienen Nomen drajcht, un see woaren sikj ver junt ferchten. 11De Har woat junt een goodet wiedakomen jäwen met väl Kjinja, väl Vee un goode Arnten en daut Launt woont de Har june Vodasch met een Eit vesproaken haft, junt to jäwen. 12De Har woat sienen grooten Väarot em Himmel opmoaken un to de rajchte Tiet Räajen jäwen un de Oabeit säajnen, dee jie junt väanämen. Jie woaren no väle Velkja utlieen un von kjeene borjen. #5Mo 15,6 13De Har woat junt een Leida mank de Velkja moaken un nich eena dee hinjaraun jeit. Jie woaren junt oppbuaren un nich raufbuaren, wan jie däm Harn junen Gott siene Jebooten, dee ekj junt vondoag jäw, hoolen woaren. Siet väasechtich daut jie dee utfieren, 14un nich eenen Wajch ooda dän aundren von daut Wuat, daut ekj junt vondoag jäw wajchgonen woaren, om aundre Jetta notogonen un to deenen. #5Mo 5,29.32
De Fluch fa de Onjehuarsome
(3Mo 26,14-39)
15Wan jie oba nich jehuarsom woaren sennen, un däm Harn junen Gott siene Jebooten nich krakjt hoolen woaren, dee ekj junt vondoag jäw, dan woaren aul dise Schoden opp junt komen un junt dolschlonen: #Dan 9,11
16Doa woat een Fluch opp june Staut un opp june Flekja sennen. 17Doa woat een Fluch opp june Spikjasch un jun Väarot enne Kjäakj sennen. 18Doa woat een Fluch opp june Kjinja un opp waut jun Launt drajcht sennen, un uk opp de junge mank jun Vee un june Schop. 19Doa woat een Fluch opp junt sennen, wan jie wajchgonen un wan jie no Hus komen.
20Wan jie schlajchtet doonen un nich no däm Harn horchen woaren, dan woat een Fluch opp junt komen, daut jie nich weeten woaren aun waut jie sent, un woaren gaunz vedrislich woaren en aules waut jie väahaben. Hee woat plazlich Schoden opp junt schekjen, daut aules vedorwen woat sennen un jie omkomen. 21De Har woat Krankheiten mank junt brinjen bat jie gaunz utstoawen von daut Launt, woont jie gonen entonämen. 22De Har woat junt met wankende Krankheiten, met Schwolst, un met Feeba ploagen. Hee woat junt met heetet un drieejet Wada un met stoakjen Wint schlonen, soo daut jie grooten Schoden lieden, un hee woat de Flekja befaulen loten, daut aules vedorwen woat sennen un jie omkomen. 23De Himmel woat kjeen Räajen jäwen, un de Ieed woat soo hoat aus Iesa sennen. #5Mo 11,17 24De Har woat junt Stoff un Saunt enne Loft jäwen enne Städ Feichtichkjeit, bat jie gaunz enne Grunt jebrocht sent. 25De Har woat june Fiend de Macht äwa junt jäwen; jie woaren von eene Rechtunk an opptoo gonen, un en säwen Rechtungen von an wajchranen. Aule Velkja oppe Ieed woaren sikj veschrakjen äwa waut to junt woaren woat. 26Wan jie stoawen woaren de Väajel un wille Tieren komen un von june Doodes fräten, un kjeena woat dee wajchschechren. 27Un de Har woat junt Schwäaren jäwen, soo aus hee de Ägipta jeef. Hee woat junt met Schlemsen un opne Hut un Jäakj ploagen, waut doa nich bäta woaren woat. #2Mo 9,9 28Hee woat jun Denkjen vewerren, junt blint moaken, un jie woaren nich weeten wua han to dreien. 29Jie woaren rombeislen aus een blinja, wan daut uk medden em Dach es. Junt woat nuscht jlekjen. Emma wada woaren see junt unjadrekjen un bestälen, un kjeena woat junt halpen. #Jes 59,10 30Du woascht Velafnis haben un dan woat een aundra Maun met de Fru ligjen. Du woascht die een Hus buen, un doa nienich bennen wonen; du woascht die eenen Wiengoaden aunplaunten un nienich de Frucht doavon schmakjen. #Jes 65,22 31Du woascht tookjikjen woo see dien Vee schlachten, oba du woascht doa nich von to äten kjrieen. Du woascht tookjikjen woo see june Äsels wajchschlapen, un dee woaren nich trigjkomen no junt. Diene Schop woaren see no june Fiend jäwen, un kjeena woat junt halpen. 32Jie woaren seenen woo see june Säns un Dajchta woaren aun aundre Velkja vesklowen. Dach fa Dach woa jie junt meed hielen fa dän, oba jie woaren doa nuscht met doonen kjennen. 33Een Volkj woont junt framd es, woat de Arnt fa woone jie jeschauft haben, von june Flekja oppnämen. Jie woaren dän tietäwa doljehoolen un unjadrekjt woaren. #Rech 6,3 34Jie woaren gaunz vezoagen met daut waut jie seenen. 35De Har woat junt schlajchte Schwäaren jäwen aun de Been un äwa däm gaunzen Kjarpa, un doa woat kjeen Rot halpen. 36De Har woat junt un junen Kjennich, dän jie woaren äwa junt saten, en een Launt nenn brinjen wua jie un june Vodasch noch nienich jewast sent. Doa woa jie framde Jetta deenen, dee von Holt un Steen jemoakt sent. #5Mo 4,28 37Mank dee Velkja, wua de Har junt woat hannämen, woa jie vespott woaren un see woaren sikj wundren un woaren eene Saj moaken von woo schlajcht junt daut jegonen haft. #1Kjen 9,7; Jer 24,9 38Jie woaren een Deel Sot oppe Stap nopp droagen, oba jie woaren mau weinich arnten, wäajen de Graushoppa daut aules vefräten woaren. #Micha 6,15 39Jie woaren Wiengoades aunplaunten un dee besorjen, oba jie woaren kjeen Wien von dee to drinkjen kjrieen, un kjeene Wiendruwen doavon äten, wiels dee woaren vonne Warm vefräten woaren. 40Aulawäajen en june Jäajent woa jie Oliewengoades haben, oba jie woaren junt nich met de Eelj ensaulwen, wiels de Bäaren auffaulen woaren. 41Jie woaren Säns un Dajchta haben, oba jie woaren dee velieren, wiels dee woaren enne Jefangenschoft jenomen woaren. 42Aul june Beem un aules waut oppe Stapen waust woat vom Ojjezeffa vefräten woaren. 43De framda dee mank junt wont woat mea un mea aunseenen kjrieen, un jie woaren weinja un weinja kjrieen. 44Dee woat no junt lieen, un jie woaren nich haben no am to lieen. Hee woat junt leiden un jie woaren am hinjaraun gonen. #5Mo 28,13
45Aul dit schwoare woat opp junt komen un junt ploagen bat jie gaunz enne Grunt komen. Dit woat opp junt komen wiels jie nich no de Väaschreften von däm Harn junen Gott jehorcht haben, un haben nich siene Jebooten un Jesazen jehoolen, dee hee junt oppläd. 46Dise lieden woaren een Tieekjen sennen von Gott sien Jerecht, un woaren emma wajch opp junt un june Nokomen bliewen. 47De Har jun Gott säajend junt en jieda Wajch, oba jie haben am nich met een schaftjet Hoat ooda wellich jedeent. 48Jie woaren june Fiend deenen, dee de Har jäajen junt schekjen woat. Jie woaren hungrich un darschtich, un noaktich un oam sennen, un dee woaren een iesanet Joch opp junt saten bat jie gaunz enne Grunt jebrocht woaren sennen. #Jer 28,13-14 49De Har woat de Armee jäajen junt brinjen von een Volkj waut von wiet auf kjemt, wieda aus jie jeemols ea jehieet haben. Daut woat haustich komen, soo aus wan een Odla flicht. Dee woaren eene Sproak räden, dee junt nich bekaunt es. #Hab 1,8; Jes 33,19; Jer 5,15 50Dee woaren ruchloos omhäa gonen, un kjeen Metlieden met de oole un uk nich met de junge haben. #Kloag 5,12-13 51See woaren sikj jun Vee schlachten un äten, un june Arnten nämen un äten, wiel jie vehungren. Jie woaren nich jun ieejnet Jeträajd, ooda Wien ooda Eelj to brucken kjrieen, un uk nich de junge von june Häaden, bat jie schlieslich utstoawen. 52Dee woaren aul june Städa, en daut gaunze Launt woont de Har jun Gott junt jeft, faustsaten. Dee woaren de oppjebude Mieren, en dee jie jun vetruen saten, dolbräakjen. 53Wan jun Fient junt faustsaten woat, woa jie en soone growe Hungaschnoot jebrocht woaren, daut jie daut Fleesch von june Kjinja, dee de Har jun Gott junt jeft, äten woaren. #3Mo 26,29; 2Kjen 6,28-29; Jer 19,9; Kloag 2,20; 4,10; Hes 5,10 54Soogoa de sea saunfta un milda Maun mank june Lied woat nich sienen Brooda, ooda siene ieejne Fru, ooda daut latste Kjint waut am noch jebläwen es, daut jennen, 55daut see een Beskje von daut Fleesch kjrieen von daut Kjint waut hee at, wiels hee sest nuscht to äten haft. Soo schlemm woat daut en dee Tiet sennen, wan jun Fient june Städa faustsat un junt kjwält. 56Un soogoa de Fru, dee soo vewant un fienfeelent es, daut see nich emol dän Foot oppe Ieed sat, wiels see soo neiw es, woat äaren ieejnen Maun un uk äaren Sän un äare Dochta nich daut Äten jennen, 57un woat selfst de Nojeburt von tweschen äare Been, un uk daut kjliene waut see to Welt brinjt opp äten. See woat daut em Jeheemen oppäten wiels see sest nuscht to äten haft. Soo groff woat de Kwol unja däm Fient sennen dee june Städa faustsaten woat.
58Paust opp daut jie aules hoolen, waut en dit Jesaz en dit Buak steit, soo daut jie disen wundavollen un furchtboaren Nomen, “De Har jun Gott”, ieren woaren. 59Wan jie daut nich doonen, dan woat de Har junt un june Nokomen met grootet Ojjlekj un Schoden, waut lange Foljen haft, un schrakjelje Krankheiten bestrofen, wuafäa doa kjeene Help es. 60De Har woat wada de Krankheiten, dee junt en Ägipten ferchten musten, trigjbrinjen un jie woaren dee nich loos woaren. #5Mo 28,27 61Hee woat uk veschiedne Krankheiten un aunstekjendet opp junt brinjen, daut nich en dit Buak von Gott siene Jesazen sent. Dee woaren junt gaunz enne Grunt brinjen. 62Un wan jie uk soo väl wieren aus doa Stierns aum Himmel sent, woa jie soo mau jrod een poa bliewen, wiels jie nich däm Harn junen Gott jehuarsom wieren. 63Jrod soo aus däm Harn daut scheen jinkj junt goodet tootostieren un junt een grootet Volkj to moaken, soo woat hee een Jefaulen haben junt to vedoawen un enne Grunt to brinjen, bat jie gaunz utjerot sent von daut Launt, woont hee junt nu jeft entonämen. #Spr 1,26 64De Har woat junt wiet un breet mank de Velkja oppe Ieed vestreien. Doa woa jie framde Jetta, dee von Holt un Steen jemoakt sent, deenen. Daut sent Jetta, dee junt un june Vodasch nich bekaunt sent. 65Mank dee Velkja woa jie kjeenen Fräd finjen, un kjeene Städ wua jun Foot sikj reiwen kaun. De Har woat junt doa met Forcht enne Brost schlonen; hee woat june Uagen meed moaken met bangen. Hee woat junt weinich Lost toom läwen jäwen. 66Jun Läwen woat sea onsecha sennen, un jie woaren Dach un Nacht en Forcht sennen. Jie woaren nienich weeten woo daut wieda gonen saul. 67Aum Morjen woa jie junt wenschen daut et Owent wia, un aum Owent woa jie junt wenschen daut et Morjen wia, wäajen de groote Angst waut en jun Hoat es, un wäajen daut waut june Uagen seenen woaren. 68De Har woat junt en Schäp trigj no Ägipten nämen, wan hee junt uk vesproaken haft, daut jie de Ägipta nienich wada seenen brucken. Jie woaren junt doa utbeeden, daut see junt kjennen aus Sklowen kjeepen, un kjeena woat junt kjeepen wellen. #5Mo 17,16; Hos 8,13
69Dit sent de Bedinjungen von dän Bunt woonen de Har Moses jeef, daut hee de Israeliten daut opplajen sull aus see en Moab wieren. Dit wort biejelajcht bie dän Bunt, dän hee met an biem Horeb Boajch jemoakt haud. #5Mo 5,2
Currently Selected:
5. Mose 28: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.