5. Mose 5
5
De Tieen Jebooten
(2Mo 20,1-17)
1Moses roopt aul de Israeliten toop un säd to an: Nu horcht, jie Israeliten no aul de Jesazen un Väaschreften, dee ekj vondoag jäw. Jie sellen dee goot kjanen lieren un dee krakjt hoolen. 2De Har ons Gott muak een Bunt met ons aum Horeb Boajch. #2Mo 19,5 3De Bunt wia nich bloos fa an oba fa ons aula, dee wie vondoag läwen. #5Mo 29,14 4De Har räd doa oppem Boajch von em Fia to ons, soo aus unja vea Uagen. #5Mo 5,24 5Ekj stunt dan tweschen junt un däm Harn un säd junt däm Harn siene Wieed, wiels jie von daut Fia Angst hauden un nich opp däm Boajch nopp jinjen.
Un de Har säd: 6Ekj sie de Har jun Gott, dee junt ut Ägipten, ut de Sklowarie jebrocht hab. 7Jie derwen kjeenen Gott haben buta mie. #5Mo 11,16.28 8Jie sellen junt kjeenen Aufgott moaken un kjeene Form schmäden von irjentwaut, eendoont auf von daut em Himmel bowa junt, ooda waut von oppe Ieed, ooda waut von en daut Wota en de Ieed es; #5Mo 27,15 9jie sellen dee nich aunbäden ooda deenen. Ekj auleen sie de Har jun Gott, un met kjeenem aundren toop. Ekj bestrof de Vodasch äare Sind aun de Kjinja bat opp Grootkjinja un Uagrootkjinja aun dee waut jäajen mie schaufen. #5Mo 4,24 10Un ekj bliew truhoatich met miene Leew fa dusende Jennerazionen fa dee, dee mie goot sent un no miene Jebooten läwen.
11Jie sellen däm Nomen vom Harn junen Gott nich buta en Ieaforcht brucken, wiels de Har woat däm nich onbestroft loten, dee sienen Nomen jemeen brukt.
12Hoolt däm Sabat soo daut dee heilich es. 13Sas Doag sent toom schaufen un aul june Oabeit doonen, 14un de säwenda Dach es de Sabat fa däm Harn junen Gott. Aun däm Dach sell jie kjeene Oabeit doonen, nich jie, un nich june Kjinja ooda Oabeida ooda Kjäakjsches ooda june Rinda, june Äsels, jun Vee ooda de framde dee bie junt sent, soo daut june Oabeida un june Kjäakjsches sikj vereiwen, soo aus jie. 15Jie sellen daut em Denkj hoolen daut jie en Ägipten Sklowen wieren, un daut de Har jun Gott junt met eene stoakje Haunt un een Oarm dee nich meed wort doa rut brocht. Daut es wuarom de Har jun Gott daut von junt velangt, daut jie dän Sabat hoolen. #5Mo 15,15; 16,12; 24,18.22
16Ieet june Elren, june Vodasch un june Mitta, soo aus de Har jun Gott junt jeboden haft, soo daut jie lang läwen kjennen, un daut junt daut goot gonen kaun en daut Launt woont de Har jun Gott junt jeft.
17Jie sellen kjeenem daut Läwen nämen.
18Jie sellen de Ehe nich scheeden.
19Jie sellen nich stälen.
20Jie sellen nich äwa junen Noba lieejen.
21Lot junt junen Noba siene Fru nich jankren. Lot junt junen Noba sien Hus, siene Stap, sienen Oabeida, siene Kjäakjsche, sien Oss, ooda sienen Äsel, ooda irjent waut, waut dien Noba haft, nich jankren. #Micha 2,2
22Aul dise Wieed räd de Har to junt aus een Volkj. Hee räd met eene lude Stemm von en daut Fia, de Wolkj, un daut sea diestre Diesta aun däm Boajch. Dit wieren de Wieed, un kjeene mea. Un hee schreef dee opp twee Steentoflen un jeef mie dee. #2Mo 31,18
23Un aus jie de Stemm von en däm Diesta hieeden, un de Boajch doa soo kwaulemd un brend, kjeem jie, aul jie aunjestalde un Leidasch vonne Stam, 24un jie säden: De Har ons Gott haft ons jewäsen woo groosoatich harlich hee es, un wie haben siene Stemm von medden em Fia jehieet. Wie haben jeseenen daut Gott met Menschen rät un de Menschen läwen noch. #5Mo 4,12-13.33 25Sull wie ons noch een mol en soone Jefoa bie daut Fia saten? Wan wie däm Harn onsen Gott siene Stemm noch mea hieren sellen, woa wie stoawen. 26Haft doa jeemols sest wäa de Stemm von däm läwendjen Gott jehieet von utem Fia, soo aus wie haben un haft noch wieda jeläft? 27Go du un horch no aules waut de Har ons Gott sajen well, un saj ons aules waut de Har ons Gott die sajcht, un wie woaren horchen un jehorchen.
28Un de Har hieed june Wieed aus jie soo to mie räden, un hee säd to mie: Ekj hab jehieet waut dit Volkj to die jesajcht haft. See sent rajcht en daut waut see jesajcht haben. 29Muchten see doch emma soone Jesennunk haben un Forcht fa mie haben un miene Jebooten hoolen. Dan wudd an un äare Kjinja daut opp emma goot gonen. #5Mo 29,3 30Go un saj an: Got trigj no june Zelten. 31Oba du, sto hia bie mie, un ekj woa die de Jebooten un Väaschreften jäwen, dee du an unjarechten saust, soo daut see doano läwen en daut Launt woont ekj an jäw daut see doa wonen kjennen. 32Israeliten, paust opp no daut waut de Har jun Gott von junt velangt. Siet nich opp eenen Wajch ooda dän aundren, onjehuarsom to irjent eent von de Jebooten. #5Mo 4,2; 28,14; Jos 1,7; Spr 4,27 33Jehorcht aules waut de Har jun Gott velangt, soo daut junt daut woat goot gonen un daut jie lang läwen kjennen en daut Launt, wua jie nengonen un doa wonen woaren.
Currently Selected:
5. Mose 5: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.