5. Mose 6
6
Gott em ieeschten Plauz hoolen
1Un Moses säd: Dit sent de Jesazen dee de Har jun Gott mie oppjeef, daut ekj junt dee sajen sull. Hoolt dee wan jie nu en daut Launt nengonen un doa wonen. 2Soo lang aus jie läwen, jie un june Nokomen, sell jie Forcht haben fa däm Harn junen Gott un dise Jesazen hoolen dee ekj jäw. Doot dit derch jun gaunzet Läwen, soo daut jie eene lange Tiet en daut niee Launt läwen kjennen. 3Horcht no dee, jie Israeliten, un siet dee jehuarsom, soo daut junt daut woat goot gonen, un jie junt sea vemieren kjennen, en een Launt wua Malkj un Honnich rant. Daut es waut de Har, june Vodasch äa Gott, junt vesproaken haft. #Luk 11,28
4Horcht, jie Israeliten: De Har, un de Har auleen, es ons Gott. #Mrk 12,29; 1Kor 8,4.6 5Jie sellen däm Harn junen Gott met jun gaunzet Hoat goot sennen, un met june gaunze Seel, un met aul june Krauft. #5Mo 10,12; 2Kjen 23,25; Mat 22,37 6Dise Wieed dee ekj junt vondoag jäw sell jie nienich vejäten. #5Mo 11,18-20 7Schoapt june Kjinja opp met dee, rät von dee, wan jie en jun Hus setten, un wan jie reisen, wan jie junt dol lajen, un wan jie oppstonen. #1Mo 18,19 8Binjt dee aun de Haunt opp een Zadel, un aum Stiern en een Henjsel. #2Mo 13,9; Mat 23,5 9Un schrieft dee aun jun Däarejerecht un aun daut Puat to june Staut.
10De Har jun Gott brinjt junt nu en daut Launt nenn, woont hee june Vodasch, Abraham, Isaak, un Jakob vesproaken haft. Daut Launt haft scheene un aunjeseene Städa, dee jie nich oppjebut haben, 11un haft hiesavoll von goode Sachen, dee jie nich toopjebrocht haben. Doa sent Zistren, dee jie nich utjehakt haben, un Wiengoades un Oliewenbeem, dee jie nich aunjeplaunt haben. Wan jie doavon äten un saut woaren, #5Mo 8,10 12dan paust opp, daut jie nich däm Harn vejäten, dee junt ut Ägipten, ut de Sklowarie, rut brocht. 13Ieet däm Harn junen Gott un bät bloos am aun. Wan jie waut opp een Eit vespräakjen, dan doot daut en sienen Nomen. #5Mo 10,20; Mat 4,10 14Bät kjeene aundre Jetta aun, soo aus de Jetta von de Velkja runtom junt. 15Wan jie aundre Jetta aunbäden, dan woat de Har met sien Oaja jäajen junt komen un junt gaunz un goa vedoawen. De Har jun Gott, dee met junt es, vedrajcht kjeenen aundren Gott. #2Mo 20,5 16Doot däm Harn junen Gott nich aufproowen, soo aus jie bie Massa deeden. #2Mo 17,2.7; Mat 4,7 17Paust opp daut jie däm Harn junen Gott siene Jebooten hoolen un doano läwen, aus hee junt vemont un väajeschräwen haft. 18Doot waut rajcht un goot es ver däm Harn, un dan woat aules met junt goot sennen. Dan woa jie kjennen daut goode Launt ennämen un junt moaken, woont de Har june Vodasch vesproaken haft. 19Dan woat de Har june Fiend ver junt vedriewen, soo aus hee vesproaken haft. #2Mo 23,27-28
20Un dan, noch emol, wan june Kjinja junt froagen: Wuarom hab wie dise Jesazen un Väaschreften un Entscheidungen, dee de Har, ons Gott, junt oppjelajcht haft? #2Mo 13,14 21Dan sajcht june Kjinja: Wie wieren Sklowen fa däm ägiptischen Kjennich, un de Har brocht ons ut Ägipten rut met eene majchtje Krauft. #Psa 44,2 22Un wie sagen selfst, woo de Har jäajen däm ägiptischen Kjennich un siene Menschen kjeem met Wunda un furchtboare Tieekjens. 23Hee leid ons doa rut un brocht ons häa un jeef ons dit Launt, krakjt soo aus hee onse Vodasch daut met een Eit vesproaken haud. 24Un de Har velangd von ons, daut wie dise Väaschreften hoolen sullen, un daut wie fa däm Harn onsen Gott emma Forcht haben sullen. Dan woat hee ons goot sennen un aum Läwen hoolen. 25Nu woa wie doaderch jerajcht sennen, daut wie däm Harn onsen Gott siene Väaschreften bestendich jehorchen, soo aus hee ons daut oppjejäft haft. #5Mo 9,5-6; Reema 2,13.19-24
Currently Selected:
5. Mose 6: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.