2. Mose 30
30
De Ruakopfa Aultoa
(2Mo 37,25-28)
1Jie sellen eenen Aultoa toom Weiruak brennen moaken. Dee saul von Akozjeholt jemoakt woaren. 2But däm em veakaunt, een haulwet Meeta aun jieda Sied, un een Meeta huach. De Aultoa un de Spetzen oppe Akjen sellen en eent jebut. 3Belajcht däm met Golt von bowen, von de Sieden un äwa de Spetzen oppe Akjen. Runtom saul dee eenen goldnen Raunt haben. 4Unja dän Raunt aun eene Sied, lot twee goldne Rinj aunmoaken. Jäajenäwa von dee, aun dee aundre Sied moak uk wada twee goldne Rinj aun. Dee sent doa fa de Stangen, toom däm Aultoa droagen. 5Moakt uk de Droagstangen von Akozjeholt un belajcht dee met Golt. 6Sat dän Aultoa ver de Gardien, dee de Kjist met de Jebooten un daut Veseenungsdakjsel bedakjt. Daut Dakjsel es, wua ekj die trafen woa. #2Mo 25,21-22 7Aaron saul jieda Morjen, wan hee jeit de Laumpen besorjen, opp disen Aultoa Weiruak brennen, #Psa 141,2 8krakjt soo aus jieda Owent, wan hee de Laumpen aunstekjt. Jie sellen bestendich tweemol dän Dach, en aul june Tieden, emma wada ver däm Harn Weiruak brennen. 9Opp disen Aultoa saul bloos de väajeschräwna Weiruak jebrent woaren, un nienich een Brauntopfa ooda een Ätesopfa ooda Drinkjopfa. #3Mo 10,1-2 10Een mol em Joa saul Aaron aun de Spetzen vom Aultoa de Veseenunk derchfieren. Jieda Joa saul hee de Spetzen met daut Bloot vom Veseenungs Sindopfa bestrikjen. Doot dit derch aul june Tieden. Dit es däm Harn hechst heilich. #3Mo 16,18
De Veseenungstolinj
11De Har säd to Moses: 12Wan du de Israeliten auftalen deist, saul een jiedra däm Harn waut Leesjelt jäwen fa sien Läwen, wan hee jetalt woat. Dan woat kjeene Ploag opp an komen, wan see jetalt woaren. #4Mo 1,3; 2Sam 24,2-3 13De Tolinj saul een haulwet Selwastekj sennen, doano aus enne Heilje Stow Selwastekja jewoagen woaren. Doa es een Selwastekj twalf Graum. Een haulwet Selwastekj es een Opfa fa däm Harn. #Mat 17,27 14Een jiedra, dee 20 Joa ooda mea es, saul dise Gow, aus sien Opfa fa däm Harn, jäwen. 15Een rikja saul nich mea jäwen, un de oama saul nich weinja aus een haulwet Selwastekj jäwen. Dit woat jun Läwen met däm Harn veseenen. 16Daut Leesjelt waut soo toopkjemt, saust du fa Onkosten bie daut Vesaumlungszelt brucken. Dit woat fa däm Harn een Aundenkjen aun de Israeliten sennen un woat junt met am veseenen.
De Wauschkomm
17Dan säd de Har to Moses: 18Moakt uk eene Wauschkomm un een Foot doatoo von Brons, un sat dee tweschen daut Vesaumlungszelt un däm Brauntopfa Aultoa. Jeet doa Wota nenn, #2Mo 38,8 19daut Aaron un siene Säns sikj kjennen de Henj un de Feet wauschen. 20Wan see em Vesaumlungszelt gonen, ooda wan see dicht biem Aultoa komen, om to deenen met een Opfafia fa däm Harn, sellen see sikj doa wauschen. Dit es doatoo, daut de Doot an nich doabie trafen woat. 21See sellen sikj Henj un Feet wauschen, soo daut de Doot an nich doabie trafen woat. Dit sellen Aaron un siene Nokomen fa aule Tieden soo biehoolen.
De Eelj toom ensaulwen
22Wieda säd de Har to Moses: 23Besorj die wieetvolle Jewerzen. Nemm sas Kilo flissendje Mirren, dree Kilo Kerneel, dree Kilo Rua 24un dree Kilo Kassia, aula soo jewoagen aus enne Heilje Stow, un dan uk noch fief Lieta Olieweneelj. 25Lot eenen erfoarnen Parfummoaka eene Saulweelj doavon moaken, dee mie jeheilicht es. #2Mo 37,29 26Saulw daut Vesaumlungszelt un uk de Kjist met de Jebooten doamet en. 27Saulw uk dän Desch un daut Toobehia doatoo, dän Laumpenhoola un daut Toobehia fa dän, dän Ruakopfa Aultoa, 28dän Brauntopfa Aultoa met daut Toobehia fa dän, un de Wauschkomm un sienen Foot. 29Soo saust du dee enweien. Dee woaren gaunz heilich sennen. Wan irjent wäa däm woat aunschieren, woat dee uk heilich sennen. #2Mo 30,10 30Saulw Aaron un siene Säns en, wan du dee toom Priesta Deenst ensäajnen deist. #2Mo 29,7 31Saj de Israeliten, daut mie dise Eelj heilich es, un emma sennen woat. 32Lot dise Saulweelj nich jrod soo opp irjent eenem komen. Kjeena doaf krakjt soone Eelj tooprieren fa jeweeneljen Jebruck. Dee doaf bloos fa heilje Zeremonieen jebrukt. Dee saul junt heilich sennen. 33Sull wäa soone Saulweelj tooprieren, ooda dise Saulweelj fa waut jemeenet brucken, deejanja saul utem Volkj rut jesat woaren.
De Weiruak
34Wieda säd de Har to Moses: Saumel scheenrikjende Kjriedarie: Kjeen, Muschelschal, Galbanem, un de reine Kjeeneelj, jlikje väl von jiedret, 35un lot een erfoarna Parfummoaka dit tooprieren un solten. Dis scheenrikjenda Weiruak es rein un heilich. 36Riew waut doavon to Pulwa un sat daut ver de Bundeskjist em Vesaumlungszelt, wua ekj met die toopkomen woa. Dis Weiruak saul junt heilich sennen. 37Jie derwen daut nich fa junt selfst moaken. Daut es fa däm Harn heilich. 38Sull emol eena soon scheenrikjenden Weiruak fa sikj moaken, deejanja saul utem Volkj rut jesat woaren.
Currently Selected:
2. Mose 30: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
