2. Mose 36

1Bezalel un Oholiab sellen toop schaufen met aundre, dee de Har fa dise Oabeit haft fäich un weis jemoakt. Dee woaren de Oabeit fa de Heilje Stow utfieren, soo aus de Har daut väajeschräwen haft. 2Dan roopt Moses beid Bezalel un Oholiab un aul de aundre, dee de Har de Fäichkjeit un Weisheit jejäft haud, aun aul daut to schaufen un daut foadich to moaken. 3De Oabeida neemen dan aul de Gowen, dee aul no Moses jekomen wieren. Oba daut Volkj brocht noch eegol mea, een Morjen nom aundren, 4soo daut aul de Oabeida, dee aun de Heilje Stow oabeiden deeden, eefach äare Oabeit toch leeten, 5un no Moses jinjen un säden am: De Lied haben aul too väl Gowen jebrocht, om aules to moaken, waut de Har ons väajeschräwen haft. 6Dan leet Moses em Volkj bekaunt moaken, daut see nich mea fa de Heilje Stow brinjen sullen. Un de Lied hieeden opp met Gowen brinjen, 7wiels doa aul mea aus jenuach toopjekomen wia, om aules to moaken.

Daut heilje Zelt

(2Mo 26,1-37)

8De Oabeida muaken dan de tieen Striepen fa de Heilje Woninj. Dee worden von goodet Lienzeich un von bleiwe, bleiwroode un kloa roode Woll jemoakt. De Oabeida, dee soone krakjte Oabeit doonen kunnen, neiden doa Mostasch von Cheruben en de Dakjen nenn. 9Jieda Dakj wia vieetieen Meeta lank un twee Meeta breet, aula krakjt äwareen. 10Dan stekjten see emma fief Dakjen toop von de Sieden. 11Aun een Enj, von jieda von dise groote Dakjen, worden dan bleiwe Eesen naun jeneit. 12Doa wieren 50 Eesen aun jieda Stekj, soo daut dee krakjt jäajenäwa von eenaunda wieren. 13Dan muaken see 50 Hoakes, om de twee groote Dakjen tooptohoaken, soo daut dit eene gaunze Dakj äwa de Heilje Woninj jeef. 14De Oabeida muaken dan noch alw Striepen von Kosenhoa, toom äwa dee aundre Dakj to dakjen. 15Dise Dakjen wieren emma feftieen Meeta lank un twee Meeta breet, aula krakjt äwareen. 16See stekjten fief Striepen toop fa de eene Dakj, un sas toop fa de aundre. 17Aun dise Dakjen worden wada 50 Eesen aun de Enja aunjeneit, soo daut dee toop pausten. 18De Eesen worden dan met bronsne Hoakes toopjehoakt, soo daut dit eene gaunze Dakj äwa daut Zelt jeef. 19De Oabeida muaken twee Dakjen. Dee eene wia von root jejoawde Schopsbock Ladasch, toom äwa de aundre twee, un de aundre wia von Seekoo Ladasch, toom äwa aule dree. 20Dan muaken see Stendasch fa de Heilje Woninj von Akozjeholt. 21Jieda Stenda wia een Jestal, daut fief Meeta lank wia un dreevieedel Meeta breet. 22Aun daut unjaschte Enj haud dee twee Taupes, waut krakjt jlikj ut aunjemoakt wieren. Soo wort jieda Stenda jemoakt. 23Fa de siedne Sied muaken see 20 Stendasch. 24Doatoo muaken see 40 Feet von Selwa. Doa sull een Foot fa jieda Taupen, aun jieda eenen von de 20 Stendasch sennen. 25Fa de aundre Sied, de nuadne, muaken see uk 20 Stendasch, 26un 40 selwane Feet, twee fa jieda Stenda. 27Fa daut wastne Enj muaken see sas Stendasch, 28un dan noch twee Stendasch fa de twee Akjen opp daut Enj. 29Dise Akjstendasch stunden aum unjaschten Enj utenaunda, un oppem bowaschten Enj kjeemen dee toop unja eenen Rinkj. De twee Akjen worden äwareen jemoakt. 30Met de Akjstendasch toop wieren doa acht Stendasch fa daut Enj, un doa wieren 16 selwane Feet fa dee, twee fa jieda Stenda.

31Dan noch, muaken see Dwäastekja, uk von Akozjeholt. Fief wieren fa eene Sied, 32fief fa de aundre, un noch fief fa daut wastne Enj. 33Oppe haulwe Hecht wort eene Stang jemoakt, dee von een Enj von de Heilje Woninj gaunz bat daut aundre jinkj. 34De Stendasch, Dwäastekja, un Stangen worden aula met Golt belajcht. De Rinj, dee de Dwäastekja un Stangen hilden, worden von Golt jemoakt.

35De Gardien toom ver daut Aulaheilichste muaken see von bleiwe, bleiwroode un kloa roode Woll un goodet jesponnenet Lienzeich. De Oabeida, waut soone krakjte Oabeit doonen kunnen, neiden doa Mostasch von Cheruben nenn. 36Un see muaken groote Past, wada von Akozjeholt un met Golt belajcht. De Hoakes aun dee wieren von Golt un de Feet von Selwa. 37De Gardien fa dän Engank vom Zelt wort uk wada von bleiwe, bleiwroode un kloa roode Woll un von goodet jesponnenet Lienzeich jewowen en Mostasch. 38Fa dise Enganksgardien muaken see fief Past met Hoakes. Aun de bowaschte Enja beläden see dee met Golt un see muaken doa goldne Rinj rom. Fa jieda Post wort een bronsna Foot jemoakt.

Currently Selected:

2. Mose 36: PB

Highlight

Compare

Copy