2. Mose 35

See kollakjten fa daut heilje Zelt

1Moses roopt de gaunze Jemeenschoft von Israeliten toop un säd an: Dit es waut de Har von junt velangt. 2Sas Doag sell jie Oabeit verechten, oba de säwenda Dach saul een Sabatdach toom reiwen sennen, dee däm Harn jeweit es. Wäa aun dän Dach oabeit, saul doafäa stoawen. #2Mo 20,8-11; 34,21 3Kjeena doaf aum Sabat een Fia aunstekjen en irjent eent von june Wonjebieda. #2Mo 25,1-9; 39,32-43

4To de gaunze Jemeenschoft von Israeliten säd Moses: Dit es waut de Har von junt velangt. 5Brinjt Gowen toop fa däm Harn. Brinjt däm Harn Golt, Selwa, un Brons, friewellich soo aus een jiedrem sien Hoat am toosprakjt. #2Mo 25,2 6Brinjt uk bleiwe, bleiwroode un kloa roode Woll, goodet Lienzeich, un Kosenhoa, 7root jejoawde Ladasch von Schopsbakj, Ladasch von de Seekoo, Akozjeholt, 8Laumpeneelj, un Kjriedarie fa de Saulweelj un scheenrikjenden Weiruak, 9Onniks un diere Steena om aun däm Efod un daut Broststekj naun to saten. 10Un kroacht de Mana toop, dee krakjte Oabeit doonen kjennen, om nu aul daut to moaken, soo aus de Har daut väajeschräwen haft. 11Dee sellen aul dise Dinja moaken: de Heilje Woninj, daut Zelt un de Dakj doatoo, de Hoakes, Stendasch, Dwäastangen, Past, un Feet, 12de Bundeskjist met siene Droagstangen un daut Veseenungsdakjsel, un de Gardien, dee ver de Bundeskjist jehieet, 13dän Desch met siene Droagstangen un Jescher, un uk de Brood fa de Jäajenwuat, 14dän Laumpenhoola met sien Jescher, siene Laumpen un Eelj, 15un dän Ruakopfa Aultoa un siene Droagstangen, de Saulweelj, dän scheenrikjenden Weiruak un de Gardien fa dän Engank en de Heilje Woninj nenn, 16dän Brauntopfa Aultoa un de bronsne Glootpaun doatoo, daut Toobehia toom Aultoa von Droagstangen un Jescher, de Wauschkomm un dän Foot doatoo, 17de groote Gardienen toom rom dän Hoff, un de Past un Feet doatoo, un de Gardien toom Engank vom Hoff, 18de Stekjels fa de Heilje Woninj un fa däm Hoff un de Strenj doatoo, 19de jewowne Kjleeda fa de Deena enne Heilje Stow un de jeweide Kjleeda fa Aaron, däm Priesta, un de Kjleeda fa siene Säns, dee Priesta sent.

20Aus hee utjerät haud, jinkj de Jemeenschoft von Israeliten wieda von Moses, 21un dan brochten see, een jiedra soo aus sien Hoat un de Jeist am aunspornd, Gowen fa däm Harn, soont waut fa daut Vesaumlungszelt un aul daut Toobehia un de Kjleeda jebrukt woaren kunn. #1Chr 29,5.9; 2Kor 9,7 22Un beides Mana un Frues, soone waut een weljet Hoat hauden, brochten goldnet Straums, soont aus schmocke Spalden, Uarinj, Rinj un sest veschiednet Golt. See brochten dee, un hoowen dee ver däm Harn opp. 23Soone waut bleiwe, bleiwroode un kloa roode Woll, ooda goodet Lienzeich, Kosenhoa, root jejoawde Ladasch von Bakj, ooda Ladasch von Seekjieej hauden, dee brochten daut. 24Dee waut kunnen Selwa ooda Brons brinjen, brochten daut aus eene Gow fa däm Harn. Dee waut Akozjeholt hauden, daut fa irjent een Poat von de Oabeit jebrukt kunn, brochten daut. 25Un jieda Fru, dee goot met daut spennen bekaunt wia, sponn dan bleiwe, bleiwroode un kloa roode Woll un goodet Lienzeich, un see brochten daut. 26Un de Frulied, dee wellens un fäich wieren Kosenhoa to spennen, brochten daut. 27De Leidasch von de Stam brochten Onniks un aundre diere Steena, dee fa dän Efod un daut Broststekj jebrukt kunnen woaren, 28un uk Kjriedarie un Olieweneelj fa de Laumpeneelj, fa de Saulweelj un fa dän scheenrikjenden Weiruak. 29Aul de Mana un Frulied, dee aunjespornt wieren friewelje Gowen to brinjen fa de Oabeit, dee Gott Moses väajeschräwen haud, brochten däm Harn friewellich äare Gowen.

Oabeida woaren beroopen

(2Mo 31,1-11)

30Moses säd to de Israeliten: Nu horcht. De Har haft Bezalel, Uri sien Sän un Hur sien Grootsän vom Staum Juda, eenen besondren Roop jejäft, 31un Gott haft am met sienen Jeist jefelt, daut hee besondre Weisheit un Konst haft en veschiedne fiene Oabeit. 32Hee kaun schmocke Mostasch plonen un uk de Oabeit doonen met daut Golt, Selwa, un Brons, 33met de diere Steena, un met Holt, un sest noch soone krakjte Oabeit. 34Bezalel, un dan uk noch Oholiab, Ahisamach sien Sän vom Staum Dan, sent beid von Gott begoft, om aundre dise Konsten to lieren. 35Gott haft an fäich jemoakt, aul de veschiedenste Oabeiten to doonen, un uk toom de Mostasch plonen un dee to Staund brinjen, met bleiwe, bleiwroode un kloa roode Woll un goodet Lienzeich un uk toom wäwen. Beides daut doonen un daut plonen kjennen dee sea goot.

Currently Selected:

2. Mose 35: PB

Highlight

Compare

Copy