1. Mose 21

Sara haft eenen Sän

1De Har vegaut Sara nich. Hee jeef ar waut hee ar vesproaken haud. #1Mo 18,10 2See wort schwanga un jeef Abraham, en sien ella, eenen Sän sea om dee Tiet, dee Gott em verut jesajcht haud. #Heb 11,11 3Abraham nand sienen Sän, dän hee un Sara hauden, Isaak. #1Mo 17,19 4Un aus Isaak acht Doag oolt wia, beschneet Abraham am, soo aus Gott am jesajcht haud. #1Mo 17,11-12; Apost 7,8 5Abraham wia 100 Joa oolt aus sien Sän Isaak jebuaren wort. #1Mo 17,17 6Un Sara säd: Gott haft mie lachen jebrocht. Aule waut dit hieren, woaren met mie lachen. #1Mo 18,12 7Un see säd uk noch:

Wäa wudd Abraham jesajcht haben,

daut Sara noch een Kjint besorjen wudd?

Doch nu daut ekj oolt sie,

hab ekj am eenen Sän jejäft.

8Daut Kjint woss bat Sara daut nich mea selfst besorjen deed, un aun dän Dach muak Abraham een grootet Fast.

9De Jung, Ismael, dän Hagar de ägiptische Kjäakjsche, Abraham jebrocht haud, späld met Isaak. Aus Sara daut sach, 10säd see to Abraham: Schekj dise Kjäakjsche un äa Sän wajch. Dee saul nich eene Oaw sennen met mien Sän Isaak. #Gal 4,30 11Dit baudad Abraham sea, wiels daut wia je sien Sän. 12Oba Gott säd to Abraham: Moak die daut nich schwoa wäajen disen Jung un de Kjäakjsche. Doawäajen doo waut Sara sajcht. Diene Nokomen woaren derch Isaak jetalt woaren. #1Mo 17,21; Reema 9,7-8; Heb 11,18 13Oba ekj woa dän Sän von de Kjäakjsche uk een Volkj moaken, wiels hee von die staumt. #1Mo 17,20

14Dan jinkj Abraham tiedich zemorjes un hold Broot un eene ladane Lusch met Wota un läd dee opp Hagar äaren Schulla. Dan schekjt hee dee beid wajch. Un see jinjen wajch un waundaden enne Wiltnis rom, en de Jäajent bie Beerscheba. 15Aus daut Wota en äare Lusch aula wort, sad see dän Jung unja eenen Bosch. 16Dan jinkj see veleicht soo wiet wieda aus eenen Boageschoss un sad sikj doa dol. See meend: Lot mie doch nich seenen, daut daut Kjint hia stoaft. Un aus see doa saut un am aunkjikjt, funk hee aun to hielen. #Jes 49,15 17Un Gott hieed däm Jung siene Stemm, un eena von siene Enjel roopt Hagar vom Himmel un säd: Waut es loos, Hagar? Hab nich Angst, wiels Gott haft däm Jung siene Stemm jehieet, doa wua hee nu es. 18Sto opp, recht däm Jung aun un hool am faust bie de Haunt. Ekj woa am een grootet Volkj moaken. 19Dan muak Gott äare Uagen op, un see sach eenen Borm met Wota. See jinkj un feld äare Lusch met Wota un jeef äaren Jung to drinkjen. #2Kjen 6,17.20 20Gott wia met däm Jung un de Jung woss opp. Hee läwd enne Wiltnis un wia utjetieekjent met däm Boagen un Feil. 21Hee wond enne Paran Wiltnis. Un siene Mutta funk eene Fru fa am von Ägipten. #1Mo 16,3

22Om dee Tiet säden Abimelech un Pichol, de Kommandaunt von Abimelech siene Armee, to Abraham: Gott es met die en aules waut du deist. 23Doawäajen vespräakj met een Eit ver Gott un mie daut du mie, miene Kjinja un miene Nokomen nich woascht ontru behaundlen. Un vespräakj mie daut du met mie un daut Launt, wua du jebläwen best, woascht soo opprechtich sennen aus wie to die jewast sent. #1Mo 20,15 24Un Abraham vespruak am daut met een Eit. 25Een Dach jinkj Abraham no Abimelech un räd am aun von eenen Borm, dän Abimelech siene Deena met Jewault wajchjenomen hauden. 26Abimelech säd: Ekj weet nich wäa dit jedonen haft. Du hast nuscht jesajcht, un ekj hab bat vondoag doa nuscht von jewist. 27Abraham jeef Abimelech dan Schop un Rinda, un see muaken eenen Bunt. 28Abraham sad säwen Lama oppoat von siene Häad. 29Dan säd Abimelech: Waut meest du met dise säwen Lama, dee du oppoat jesat hast? 30Un Abraham säd: Dise säwen Lama woascht du von mie nämen, daut du een Zeij best, daut ekj disen Borm jegroft hab. 31Dan nanden see dee Städ Beerscheba, #21,31 Daut bediet Säwenborms ooda Eitborm wiels see doa beid eenen Eit muaken. 32Dit es woo see dän Bunt bie Beerscheba muaken. No däm veleeten Abimelech un Pichol, de Kommandaunt von siene Armee, un trocken trigj no äare Städ en de Jäajent von de Filista. 33Abraham plaunt doa eenen Tamariskenboom en Beerscheba, un hee bäd doa em Nomen vom Harn, däm eewjen Gott, aun. #1Mo 12,8; Reema 16,26 34Abraham wond eene lange Tiet aus een framda en de Filista äa Launt.

Currently Selected:

1. Mose 21: PB

Highlight

Copy