3. Mose 18
18
Jeschlajchtlichet Vegonen woat veboden
1De Har räd met Moses un säd: 2Saj de Israeliten waut ekj an to sajen hab: Ekj sie de Har, jun Gott. 3Jie sellen nich soo läwen aus daut en Ägipten wort, wua jie jewont haben, uk nich soo aus daut en daut Launt Kanaan woat, wua ekj junt hanbrinjen woa. Dise Velkja äare Sitten sellen junt nuscht aungonen. #2Mo 23,24 4Jie sellen junt no miene Ordnungen rechten un miene Aunwiesungen jehorchen. Ekj sie de Har, jun Gott. 5Doawäajen sell jie miene Ordnungen un Aunwiesungen befoljen. Wiels dee Mensch, dee daut deit, woat doaderch läwen; ekj sie de Har! #Neh 9,29; Hes 20,11; Reema 7,10; 10,5; Gal 3,12
6Kjeena von junt saul sikj irjent eenem em Frintschoft nodren, om met an Jeschlajchtsvekjia to haben. Ekj sie de Har! 7Du doascht nich bie diene Mutta schlopen un doaderch dienen Voda toschaund moaken. Wiels daut es diene Mutta. #1Mo 19,32 8Du saust met dienen Voda siene Fru nich Jeschlajchtsvekjia haben; doamet deist du dienen Voda schenden. #1Mo 35,22; 5Mo 27,20; 2Sam 16,22; 1Kor 5,1 9Du saust met diene Sesta, waut dien Voda ooda diene Mutta äare Dochta es, nich Jeschlajchtsvekjia haben, eendoont auf daut rajchtet ooda toopjebrochtet Jeschwista es. #5Mo 27,22 10Du saust met diene Grootdochta, de Dochta von dienen Sän ooda diene Dochta, nich Jeschlajchtsvekjia haben, wiels doamet deist du die selfst schenden. 11Du saust met de Dochta von dienen Voda siene Fru, waut dienen Voda jebuaren es un diene Haulfsesta es, nich Jeschlajchtsvekjia haben. 12Du saust met dienen Voda siene Sesta nich Jeschlajchtsvekjia haben, wiels see es frintschoft met dienen Voda. #2Mo 6,20 13Du saust met diene Mutta äare Sesta nich Jeschlajchtsvekjia haben, wiels see es Frintschoft met diene Mutta. 14Du saust dienen Voda sienen Brooda nich doamet schenden, daut du siene Fru nemst. Daut es diene Taunte. 15Du saust met diene Schwieedochta nich Jeschlajchtsvekjia haben, wiels see es dien Sän siene Fru; doawäajen saust du doa nich biegonen. #1Mo 38,16 16Du saust met dienen Brooda siene Fru nich Jeschlajchtsvekjia haben, wiels doamet deist du dienen Brooda schenden. #3Mo 20,21; Mrk 6,18 17Wan du met eene Fru Vekjia hast, dan saust du nich uk noch bie äare Dochta ooda Grootdochta schlopen, waut de Dochta von äaren Sän ooda Dochta es, wiels see sent frintschoft, un doawäajen es daut waut schaundhauftet. 18Du saust diene Fru äare Sesta nich aus Näbenfru nämen un met ar Vekjia haben, soolang aus diene Fru noch läft.
19Du saust nich bie eene Fru ligjen, om met ar Jeschlajchtsvekjia to haben, soolang aus see äare moonatliche Doag haft, wiels en dee Tiet es see orrein. #3Mo 15,19.24; Hes 18,6; 22,10 20Du saust uk nich bie dienen näakjsten siene Fru ligjen, daut wudd die orrein moaken. #2Sam 11,4 21Du saust uk nich eent von diene Kjinja däm Aufgott Moloch aus Opfa vebrennen, wiels doamet deist du Gott sienen Nomen veonieren. Ekj sie de Har! #5Mo 18,10; 2Kjen 21,6; Psa 106,37; Jer 7,31 22Du saust nich met eenen Maun jeschlajchtlichen Vekjia haben soo aus met eene Fru, wiels daut es waut oppscheiseljet. #1Mo 19,5; 3Mo 20,13; Reema 1,27; 1Kor 6,9 23Kjeen Maun uk kjeene Fru saul met een Tia jeschlajchtlichen Vekjia haben, wiels daut es eene schentelje Veorreinjunk. #2Mo 22,18; 3Mo 20,16
24Jie sellen junt met kjeene von soone Doten veorreinjen. Met aul daut haben de Velkja sikj veorreinicht, waut ekj ver junt vedriewen well. 25Doamet haben see daut Launt orrein jemoakt; un ekj trakj daut Launt to Räakjenschoft, soo daut daut Launt de Enwona utspicht un wada rein woat. 26Doawäajen sell jie junt no miene Jebooten un Aunwiesungen rechten, de framde, waut bie junt wonen, krakjt soo aus june Menschen. Un doot kjeene soone oppscheiselje Doten 27aus de Lied deeden, waut ver junt en daut Launt wonden un daut orrein muaken. 28Sest woat daut Launt junt krakjt soo utspieen, wan jie daut orrein moaken, aus daut de väaje Enwona utjespäajen haft. 29Aul dee, dee soon oppscheiseljet doonen, woaren ut äa Volkj utjerot woaren. 30Doawäajen befolcht miene Aunwiesungen, un recht junt nich no de oppscheiselje Sitten von de Velkja, waut ver junt daut Launt bewonden. Doot junt nich derch soon vehoolen veorreinjen. Ekj sie de Har, jun Gott!
Currently Selected:
3. Mose 18: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.