3. Mose 19
19
Jie sellen heilich sennen, wiels ekj heilich sie!
1De Har räd met Moses un säd: 2Räd met de gaunze Vesaumlunk von Israel un saj to an: Jie sellen heilich sennen, wiels ekj, de Har, jun Gott, heilich sie. #3Mo 11,44-45; Mat 5,48; 1Pet 1,15-16 3Jieda eena saul Ieaforcht haben fa siene Mutta un sienen Voda un dän Rudach, mienen Sabat, hoolen. Ekj sie de Har, jun Gott! #2Mo 20,8.12 4Jie sellen nich no aundre Jetta gonen un moakt junt kjeene jegotne Jettabilda; ekj sie de Har, jun Gott! #2Mo 20,3; 34,17
5Wan jie däm Harn een Dankopfa brinjen wellen, sell jie daut soo opfren, daut hee jefaulen doaraun haft. #3Mo 7,12-18 6Jie sellen daut Fleesch aun däm Dach äten, wan jie daut opfren, ooda uk noch aum näakjsten Dach; waut oba bat däm dredden Dach äwablift, saul vebrent woaren. 7Wan aum dredden Dach noch doavon jejäten woat, es mie daut jäajenaun, un daut gaunze Opfa es mie nich aunjenäm. 8Wäa doavon at, lot eene Schult opp sikj, wiels hee daut veonieren deit, waut biem Harn heilich es. Un soon Mensch woat utjerot woaren ut sien Volkj.
9Wan du dien Launt arnten deist, saust du nich aules bat en de Akjen von dien Flekj aufschnieden, uk nich noch noläsen gonen. #3Mo 23,22; 5Mo 24,19; Rut 2,2.15-16 10Uk en dienen Wiengoaden saust du nich aules rein aufplekjen un de aufjefolne Druwen nich oppläsen. Lot doa waut äwa fa de oame un framde, waut en jun Launt wonen. Ekj sie de Har, jun Gott!
11Jie sellen nich stälen uk nich lieejen, un uk nich eena met däm aundren faulschen Haundel driewen. #2Mo 20,15-16; 1Tess 4,6
12Jie sellen nich faulsch schwieren bie mienen Nomen un junen Gott sienen Nomen veonieren. Ekj sie de Har! #2Mo 20,7; Mat 5,33
13Du saust dienen näakjsten nich unja Druck saten ooda bestälen. Un dienen Doages Oabeida sien Loon saust du nich äwa Nacht bie die hoolen. #5Mo 24,14-15; Jer 22,13; Jak 5,4
14Du saust nich eenen Fluch opp eenen doowen utspräakjen, un eenen blinjen nich eenen Kjneppel em Wajch lajen. Du saust die fa dienen Gott ferchten; ekj sie de Har! #1Mo 27,19; 5Mo 27,18
15Du saust em Jerecht nich ojjerajcht haundlen; du saust dän eefachen nich väatrakjen, oba uk dän Enflussrikjen nich bejensjen. Du saust dienen näakjsten rajcht rechten. #2Mo 23,3.6; 5Mo 16,19-20
16Du saust nich Pludarie driewen mank diene Metmenschen. Du saust uk nich waut oppbrinjen toom dienen näakjsten daut Läwen to vedoawen. Ekj sie de Har! #2Mo 23,7 17Du saust nich hotdroagent sennen jäajen dienen Brooda, sträw doano de Sach to beräden, om daut du die nich wäajen am eene Schult opplotst. #Psa 141,5; Mat 18,15 18Du saust nich Rach eewen, ooda irjent waut jäajen diene Metmenschen haben. Du saust dienen Noba soo goot sennen aus die selfst: Ekj sie de Har. #2Kjen 6,22; 2Chr 28,9-15; Mat 5,43-48; 22,39; Luk 10,25-37; Joh 13,34; Reema 13,9; Gal 5,14; Jak 2,8
Wiedre Aunwiesungen fa Gott sien heiljet Volkj
19Miene Ordnungen sell jie hoolen: Von dien Vee saust du nich twee veschiedne Sorten sikj poaren loten. Sei nich opp een Flekj twee veschiedne Sorten Sot. Trakj die uk nich een Kjleet aun, waut von twee veschiedne Sorten Twierem jewäft es. #5Mo 22,9-11
20Wan een Maun bie eene Sklowenmejal schlapt, waut eenen aundren Maun aus Ehefru toojesajcht es, oba noch nich loosjekoft ooda friejeloten es, dan saul daut bestroft woaren. Oba dee sellen nich met däm Doot bestroft, wiels de Fru noch nich frie wia. #2Mo 21,7-11 21De Maun saul een Schopsbock fa sikj aus Schultopfa no däm Harn brinjen ver dän Engank von daut Vesaumlungszelt; 22un de Priesta saul am veseenen met een Schultopfa von een Schopsbock ver däm Harn wäajen siene Sind, un dan woat Gott am siene Sind, waut hee jedonen haft, vejäwen. #3Mo 5,17-18
23Wan jie en daut Launt komen un aule Sorten Oftbeem plaunten, wua jie von äten kjennen, dan lot de ieeschte Frucht toch, aus wan dee orrein un onbeschnäden es. Dree Joa sell jie de Frucht fa orrein hoolen, un dee nich äten. 24Em vieeden Joa sell jie aula june Frucht met freiden däm Harn weien. 25Un vom feften Joa aun derw jie de Frucht äten. Wan jie daut soo doonen woaren, woaren june Beem doafäa dolla droagen. Ekj sie de Har, jun Gott!
26Jie sellen kjeen Fleesch äten, wua noch Bloot bennen es. #3Mo 3,17; 5Mo 18,10
Jie sellen nich Woasajarie ooda Zaubarie driewen. 27Jie sellen june Kopphoa aun de Sieden nich veschnieden un junen Boat nich kortschnieden. #(27 un 28) 3Mo 21,5; 5Mo 14,1
28Jie sellen junt wäajen eenen Dooden kjeene Ranen em Kjarpa schnieden un uk kjeene Tieekjens en june Hut nenmoaken. Ekj sie de Har!
29Du saust diene Dochta nich to Huararie aunleiden, om daut sikj de Huararie nich em gaunzen Launt vebreet, un jun Launt voll Schaunden woat. #5Mo 23,18; 2Kjen 23,7
30Mienen Sabat sell jie hoolen, un mien Heilichtum sell jie ferchten. Ekj sie de Har! #3Mo 26,2
31Got nich no de Woasajasch un no dee, dee de Doodje äare Jeista befroagen. Wäa daut deit, moakt sikj orrein. Ekj sie de Har, jun Gott! #3Mo 20,6; 5Mo 18,10-11; 1Sam 28,7
32Ver greiwe Hoa saust du oppstonen un eene elre Persoon saust du ieren, un saust die ferchten ver dienen Gott. Ekj sie de Har!
33Wan een framda bie junt em Launt wont, sell jie däm nich unjadrekjen. #2Mo 22,20 34Dee saul bie junt soo wonen aus eena von junt, un du saust däm goot sennen soo aus die selfst, wiels jie sent en Ägipten uk framde jewast. Ekj sie de Har, jun Gott!
35Jie sellen nich ojjerajcht haundlen, met däm Motstock, met daut Jewicht un de Motdinja, wan jie waut aufmäten. 36June Wichtschol, un de Jewichta sellen stemmen, un jie sellen rajchte Motstakja un Motschoopen haben. Ekj sie de Har, jun Gott, dee junt ut Ägipten jefieet haft! #5Mo 25,13-16; Spr 11,1 37Recht junt bie aules no miene Jebooten un Aunwiesungen un läft doano. Ekj sie de Har!
Currently Selected:
3. Mose 19: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.