3. Mose 20
20
Bestrofunk fa schwoare Sinden
1De Har räd met Moses un säd: 2Saj to de Israeliten: Wäa von junt Israeliten ooda von de framde waut en Israel wonen, eent von siene Kjinja däm Aufgott Moloch opfat, dee saul met däm Doot bestroft woaren. De Volkjs Vesaumlunk saul däm steenjen. 3Un ekj woa mie soonen Mensch jäajenaun stalen un däm ut sien Volkj utroden, wiels hee däm Moloch eent von siene Kjinja jejäft haft un mien Heilichtum orrein jemoakt un mienen heiljen Nomen veonieet haft. 4Un wan daut Volkj em Launt sikj bie däm Mensch derch de Finjasch kjikjen woat, dee eent von siene Kjinja däm Moloch jeopfat haft, daut see däm nich doot moaken, 5dan woa ekj mie selfst jäajen disen Mensch un siene Nokomen stalen un woa am un aul dee, dee soo aus hee met däm Moloch Aufjettarie jedräwen haben, ut äa Volkj utroden.
6Uk wan sikj wäa bie de Woasajasch ooda bie dee, dee de Doodje äare Jeista befroagen, Rot holen jeit, un met dee Aufjettarie drift, dan woa ekj mie selfst jäajen däm stalen un woa am ut sien Volkj utroden. #3Mo 19,31 7Doawäajen moakt junt von aules rein, waut mie jäajenaun es, un läft soo, daut jie mien heiljet Volkj sent; ekj sie de Har, jun Gott. #3Mo 19,2 8Recht junt no miene Ordnungen un läft doano. Ekj sie de Har, dee junt heilich moakt.
9Wäa äwa sienen Voda ooda siene Mutta eenen Fluch utsprakjt, mott dootjemoakt woaren. Siene Blootschult kjemt opp am, wiels hee äwa sienen Voda ooda siene Mutta eenen Fluch utjesproaken haft. #2Mo 21,17 10Wan wäa met eenen aundren Israelit siene Fru de Ehe brakjt, motten dee beid dootjemoakt woaren, de Maun uk de Fru waut de Ehe jebroaken haben. #2Mo 20,14; 2Sam 11,4; Joh 8,5
11Wan wäa bie sienen Voda siene Fru biejeit un soo sienen Voda schenden deit, dan sellen beid, hee uk de Fru, stoawen; äare Blootschult saul opp an komen. #(11-21) 3Mo 18,6-23 12Wan wäa bie siene Schwieedochta biejeit, dan sellen dee beid stoawen, wiels see haben waut schaundhauftet jedonen; äa Bloot kjemt opp an. 13Wan wäa met eenen Maun jeschlajchtlichen Vekjia haft soo aus met eene Fru, dan haben dee sikj beid opp eenen oppscheiseljen Wajch vegonen, un sellen beid dootjemoakt woaren; äare Blootschult licht opp an. 14Wan sikj wäa de Dochta uk de Mutta beid to Frues nemt, dee haft waut schaundhauftet jedonen; un dee saul met de Frues toop met Fia vebrent woaren, wiels soon onveschämdet doaf daut bie junt nich jäwen.
15Wan een Maun met een Tia jeschlajchtlichen Vekjia haft, saul dee dootjemoakt woaren; uk daut Tia sell jie doot moaken. 16Wan eene Fru sikj irjent een Tia nodat un met daut jeschlajchtlichen Vekjia haft, sell jie de Fru uk daut Tia doot moaken. Dee motten dootjemoakt woaren; äare Blootschult kjemt opp an.
17Wan een Maun bie siene Sesta ooda Haulfsesta schlapt, sienen Voda ooda siene Mutta äare Dochta, un see Jeschlajchtsvekjia haben, dan es daut eene groote Schaund. Dee beid motten ver daut vesaumelde Volkj vom Volkj utjerot woaren. De Maun haft met siene Sesta Vekjia jehaut, un hee es schuldich fa daut waut hee jedonen haft.
18Wan een Maun met eene Fru Jeschlajchtsvekjia haft en dee Tiet wan see äare moonatliche Doag haft, un ar de Schomp aufdakjt, dee haft äare Blootkjwal opjedakjt un see haft dee uk opjedakjt, un dee sellen beid ut äa Volkj utjerot woaren. #3Mo 15,24
19Met diene Mutta äare Sesta un met dienen Voda siene Sesta saust du nich Jeschlajchtsvekjia haben. Wäa daut deit, dee deit sien Frintschoft schenden. Dee motten beid de Foljen von äare Schult droagen. 20Wan wäa bie sienen Onkel siene Fru schlapt, dee deit sienen Onkel schenden. Dee motten beid äare Schult droagen; onen Kjinja sellen dee stoawen. 21Wan wäa bie sienen Brooda siene Fru schlapt, es daut waut oppscheiseljet. See woaren kjeene Nokomen haben, wiels hee haft doamet sienen Brooda toschaund jemoakt.
22Hoolt aul miene Jebooten un Aunwiesungen un läft doano, om daut daut Launt junt nich utspicht, wua ekj junt nenbrinjen woa, om daut jie doabennen wonen. 23Läft nich no de Velkja äare Sitten, waut ekj ver junt vedriewen woa. Dee haben daut aula jedonen, un ekj hab mie aun an veäakjelt. 24Junt oba saj ekj: Äa Launt jäw ekj junt; un ekj woa junt daut aus Oafgoot jäwen, een Launt, waut von Malkj un Honnich äwarant. Ekj sie de Har, jun Gott, dee junt von de Velkja aufjesondat haft. #2Mo 19,5-6 25Doawäajen sell jie uk jeneiw tweschen reinet un orreinet Vee un tweschen reine un orreine Väajel unjascheeden un junt nich orrein moaken aun daut Vee, aun de Väajel un aul daut, waut oppe Ieed kjript, waut ekj fa junt aus orrein erkjläat hab. #3Mo 11,1-47 26Jie sellen fa mie heilich sennen, wiels ekj, de Har, sie heilich. Ekj hab junt ut de Velkja rutjewält, om daut jie mie jehieren.
27Wan ut eenen Maun ooda eene Fru een Jeist von eenen Dooden ooda een Woasajajeist rät, motten dee dootjemoakt woaren. Jie sellen dee steenjen; äare Blootschult kjemt opp an. #2Mo 22,17
Currently Selected:
3. Mose 20: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.