3. Mose 21
21
Besondre Reinheits Väaschreften fa Priesta
1De Priesta, Aaron siene Säns, leet de Har derch Moses sajen: Een Priesta saul sikj aun kjeenen Dooden ut sien Volkj orrein moaken #(1-4) Hes 44,25-27 2buta aun siene notste Aunjehieeje: Aun siene Mutta, aun sienen Voda, aun sienen Sän, aun siene Dochta, aun sienen Brooda 3un aun siene Sesta, waut noch onbefriet es un en daut selwje Hus läft wua hee. Aun dee äare Leichen doaf hee sikj orrein moaken. 4Sest saul hee sikj aun kjeent von sien aunjefriedet Frintschoft orrein moaken, daut hee sikj nich veonieren deit.
5Een Priesta doaf sikj bie eenen truajen Faul uk nich dän Kopp kol schäaren, dän Boat kortschnieden ooda Ranen en sienen Kjarpa schnieden. #3Mo 19,27-28 6De Priesta sellen een Läwen fieren, waut mie, äaren Gott, jeweit es, un sellen mienen Nomen nich veonieren. See brinjen de Fiaopfa, waut opp mienen Aultoa vebrent woaren, daut Äten fa äaren Gott; doawäajen sellen see heilich sennen.
7See sellen kjeene Hua to Fru nämen, uk kjeene Mejal, dee nich friejebläwen es, uk kjeene Fru, waut von äaren Maun jeschieden es, wiels see sent äaren Gott heilich. 8Doawäajen saust du dän Priesta fa heilich hoolen, wiels hee brinjt junen Gott daut Opfabroot. Hee saul die heilich sennen, wiels ekj sie heilich, de Har, dee junt heilicht.
9Wan eenen Priesta siene Dochta sikj derch Huararie veorreinicht, deit see äaren Voda veonieren; un see saul met Fia vebrent woaren.
10De väaschta mank de Priesta, opp däm sien Kopp de Saulweelj jegoten wort un dee jeweit es, om de heilje Kjleeda auntotrakjen, dee saul bie eenen truajen Faul nich siene Hoa vezultat henjen loten un siene Kjleeda verieten. #2Mo 28,41; 29,7; 3Mo 8,12; 10,6 11Hee saul no kjeenen Dooden komen, wiels hee sikj doaderch veorreinicht, uk nich, wan daut sien Voda ooda siene Mutta es. #3Mo 21,2 12Hee saul nich ut daut Heilichtum rutgonen, daut hee Gott sien Heilichtum nich veonieren deit, wiels hee es met sienen Gott siene heilje Saulweelj jesaulft. Ekj sie de Har. 13Hee doaf sikj bloos eene Mejal frieen, waut noch met kjeenen Maun toop jeschlopen haft, 14kjeene Wätfru ooda Jeschiedne ooda eene dee sikj derch Huararie haft orrein jemoakt. Hee mott sikj eene Mejal ut sien ieejnet Volkj to Fru nämen, 15soo daut hee siene Nokomen mank sien Volkj nich veonieren deit, wiels ekj sie de Har, dee am jeheilicht haft.
16De Har räd met Moses un säd: 17Saj to Aaron: Wan eena von diene Nokomen en Tookunft eenen Fäla haft, doaf hee nich nom Aultoa komen, om daut Äten fa sienen Gott to opfren. 18Kjeena doaf eenen Opfadeenst doonen, waut eenen kjarpalichen Fäla haft: Een blinja ooda loma ooda eena met eene jespoolde Näs ooda waut irjentwua kjräplich es. 19Uk kjeena, däm een Oarm ooda een Been vekjräpelt es, 20ooda eenen Buckel haft, ooda dee em waussen sea hinjenjebläwen es, un kjeena dee eene Uagen ooda Hutkrankheit haft, un uk kjeena waut beschädichte Hooden haft. 21Wäa mank däm Priesta Aaron siene Nokomen eenen kjarpalichen Fäla haft, doaf niemols komen, däm Harn siene Fiaopfa to opfren, wiels hee eenen Fäla haft. Hee saul nich komen, om sienen Gott sien Äten to opfren. 22Hee doaf von de Opfa äten, waut sienen Gott jebrocht woaren, von de heilje uk von de besonda heilje Opfagowen. 23Oba wiels hee eenen kjarpalichen Fäla haft, doaf hee nich no de Gardien gonen ooda sikj däm Aultoa nodren. Hee saul dise Städen dee mie jeheilicht sent nich veonieren, wiels ekj sie de Har, dee an heilich moakt.
24Un Moses säd dit to Aaron un siene Säns un to aule Israeliten.
Currently Selected:
3. Mose 21: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.