3. Mose 24
24
Laumpenhoola un Opfabroot
1De Har räd met Moses un säd: 2Saj de Israeliten, daut see die reine Olieweneelj von utjedrekjte Oliewen brinjen fa dän Laumpenhoola, daut em Heilichtum jieda Nacht Lichta brennen. #2Mo 27,20 3Aaron saul dee jieda Owent ver de Gardien, waut ver de Kjist met daut Bundesjesaz henjt, besorjen un doano kjikjen, daut dee bestendich ver däm Harn dachen. Dit es eene Ordnunk fa emma fa june Nokomen. 4Aaron saul de Laumpen besorjen opp däm Laumpenhoola von feinet Golt, daut dee bestendich ver däm Harn dachen.
5Un du saust twalf Brootkuaken baken, jieda Brootkuak saul von twee tieendel Efa wittet Mäl sennen, 6un du saust dee en twee Rieejen, sas en eene Rieej, opp dän Desch von feinet Golt, ver de Gardien ver däm Harn hanlajen. #2Mo 25,30 7Un saust opp jieda Rieej reinen Weiruak nopplajen, aus een Jedenkjopfa, daut daut Broot däm Harn jehieet, een Fiaopfa fa dän Harn. 8Aun jieda Sabat saul hee dee ver däm Harn reedmoaken aus eene bestendje Gow von de Israeliten; daut es eene Ordnunk fa emma. 9Un dee sellen Aaron un siene Nokomen jehieren. Dee sellen dee opp eene heilje Städ äten; aus eene heilje Gow, von däm Harn siene Fiaopfa, jehieren Aaron dee aus sien Poat fa emma.
Bestrofunk fa Gotteslastrunk, fa Dootschlona un Jewault
10Een Sän von eene israelitische Fru, waut eenen ägiptischen Voda haud, jinkj medden mank de Israeliten un zankt sikj doa em Loaga met eenen israelitischen Maun 11un lastad däm Harn sienen Nomen un hilt dän jemeen. Dan brochten see däm no Moses. Siene Mutta wia Schelomit, Dibri siene Dochta, ut däm Staum Dan. 12Un see stopten däm en, bat de Har an kloare Auntwuat jäwen wudd, waut met däm passieren sull. #4Mo 15,34 13Un de Har räd met Moses un säd: 14Brinj dän Maun, waut soo lastat, ut däm Loaga rut un lot aul dee, dee daut jehieet haben, äare Henj opp sienen Kopp lajen; un dan lot de gaunze Vesaumlunk däm steenjen #4Mo 15,36; 5Mo 17,5; Apost 7,56 15un saj to de Israeliten: Wäa sienen Gott lastat, dee saul siene Schult droagen. 16Wäa däm Harn sienen Nomen lastat, dee saul stoawen; de gaunze Vesaumlunk saul däm steenjen. Daut jelt fa de framde uk fa de Israeliten, wäa Gott sienen Nomen lastat, mott stoawen. #2Mo 20,7; Mat 26,65-66
17Wäa eenen Mensch dootschleit, mott met däm Doot bestroft woaren. #2Mo 21,12 18Wäa een Stekj Vee dootschleit, dee saul daut ersaten, Läwen fa Läwen. #2Mo 21,33-37 19Wäa sienen Metmensch eenen kjarpalichen Schoden aundeit, mott aus Strof dänselwjen Schoden aunjedonen woaren. 20Wäa däm aundren eenen Knoaken brakjt, däm woat doafäa uk een Knoaken jebroaken; wäa däm een Uag ooda eene Tän utschleit, velist doafäa selfst uk een Uag ooda eene Tän. Doa jelt de Räajel: Uag fa Uag, Tän fa Tän. Soo aus eena däm aundren vewunden deit, soont saul däm selfst aunjedonen. #2Mo 21,23-25 21Wäa een Stekj Vee dootschleit, dee saul daut ersaten; wäa eenen Mensch dootschleit, dee saul stoawen. 22Dit Jesaz jelt fa aulem onen Unjascheet, fa junt Israeliten uk fa de framde, waut bie junt wonen. Ekj sie de Har, jun Gott! #2Mo 12,49; 3Mo 19,34
23Moses säd de Israeliten dit aula, un see brochten dän Maun, waut Gott jelastat haud, ut daut Loaga un steenijden däm. De Israeliten deeden daut soo, aus de Har Moses daut väajesajcht haud.
Currently Selected:
3. Mose 24: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.