3. Mose 25
25
Sabat Joa un Entlotungsjoa
1De Har säd to Moses opp däm Boajch Sinai: 2Räd met de Israeliten un saj to an: Wan jie en daut Launt komen, waut ekj junt jäwen woa, dan saul daut Launt däm Harn eenen Sabat fieren. 3Sas Joa sell jie june Flekja beseien, un sas Joa june Wiengoades beschnieden un de Frucht arnten, #(3 un 4) 2Mo 23,10-11 4oba jieda säwendet Joa mott daut Launt sikj reiwen; un däm Harn to ieren Sabat hoolen. Dan sell jie kjeene Flekja beseien un kjeene Wiengoades beschnieden.
5Uk waut von selfst no de Arnt noch waust, doaf nich aufjearnt woaren, un de Wiendruwen, waut onen jefläacht noch waussen, derwen nich aufjeplocken woaren. Daut saul een Sabat Joa fa daut Launt sennen. 6Waut daut Launt em Sabat Joa drajcht, doavon derw jie äten, jie uk june Sklowen un Sklowenfrues, de Doages Oabeida un de Framdoabeida, aul dee, dee bie junt läwen, 7jun Vee un de wille Tieren em Launt. Aules waut von selfst waust saul to Noarunk deenen.
8Un du saust säwen Sabat Joaren talen, säwen mol säwen Joa, waut aules toop 49 Joa moakt. 9Dan sell jie aum 10. Dach en de 7. Moonat, aum Veseenungsdach, de Posaunen derch daut gaunze Launt blosen loten. #3Mo 23,27 10Un jie sellen daut 50. Joa heiljen un eene Entlotunk fa aule bekauntmoaken, waut em Launt wonen. Daut saul een Entlotungsjoa fa junt sennen. Dan saul jieda eena bie junt wada to sien Launt un no siene Volkjsgrupp komen. #Jes 61,2; Luk 4,19 11Daut 50. Joa saul fa junt een Entlotungsjoa sennen. Dan sell jie nich seien, un waut von selfst waust, nich arnten, uk daut, waut onen Oabeit em Wiengoaden waust, nich aufplekjen, 12wiels daut Entlotungsjoa saul junt een heiljet Joa sennen, waut mie jehieet. Äten derw jie daut, waut daut biesied june Akaflekja drajcht.
13Daut es daut Entlotungsjoa, wua jieda eena wada to daut sienje komen saul. 14Dit mott jie en Räakjnunk nämen, wan jie von eenen aundren Israelit Launt kjeepen ooda am daut vekjeepen. #1Tess 4,6 15No de Zol von de Joaren vom Entlotungsjoa saust du daut von am kjeepen; doano, wooväl Joa die daut noch eene Ennom brinjt, saul hee die daut vekjeepen. 16Wan daut noch väl Joaren sent, dan kaust du eenen hechren Pries beeden; wan daut aul mau weinje Joaren sent, saust du dän Pries läaja moaken. Wiels doa woat nich daut Launt vekoft, doa woaren bloos de Arnten vekoft, waut daut en dee Tiet jeft. 17Doa saul kjeena sienen Metbrooda utnutzen. Nämt miene Aunwiesungen iernst, wiels ekj sie de Har, jun Gott. 18Doawäajen jehorcht miene Jebooten un recht junt no miene Aunwiesungen, om daut jie secha un en Ru en jun Launt läwen kjennen. #3Mo 26,5; 1Kjen 5,5 19Daut Launt woat junt de Arnt jäwen, daut jie jenuach to äten haben un doa secha wonen kjennen. 20Un wan jie sajen: Waut sell wie en daut säwende Joa äten? Wan wie nuscht seien, woa wie uk kjeen Jeträajd arnten. 21Dan well ekj em sasten Joa mienen Säajen väasajen, daut dee fa dree Joa Jeträajd veschaufen saul. #5Mo 28,8 22Un wan jie em achten Joa seien, woa jie von däm Väarot bat en daut näajende Joa nenn äten kjennen, bat de fresche Arnt kjemt.
Daut Launt un de Menschen jehieren Gott
23Doawäajen sell jie daut Launt nich fa emma vekjeepen, wiels daut Launt es mient, un jie läwen aus framde ooda Jast bie mie. #Psa 39,13 24Un bie jieda Launthaundel mott jie een Trigjkjeepsrajcht nenn räakjnen.
25Wan dien Metbrooda, een aundra Israelit, soo oam woat daut hee waut von sien Gruntstekj vekjeepen mott, dan saul sien notsta em Frintschoft aus Looskjeepa fa am enstonen un daut vekofte trigjkjeepen. #Rut 4,3-4 26Wan wäa kjeenen Looskjeepa haft, oba nohäa selfst sooväl oppbrinjen kaun, om sien Gruntstekj trigjtokjeepen, 27dan saul hee de Joaren aufräakjnen, von dan wan hee daut vekoft haft, un waut dan noch bat daut näakjste Entlotungsjoa fält, däm Kjeepa trigjtolen un soo kjemt hee wada to sien Gruntstekj. 28Kaun hee nich sooväl oppbrinjen, om däm daut trigjtotolen, dan saul daut, waut hee vekoft haft, bat daut Entlotungsjoa däm Kjeepa sient bliewen. Un em Entlotungsjoa saul daut frie woaren, daut hee wada to sien Gruntstekj kjemt.
29Wäa en eene Staut waut eene Mia rom haft een Wonhus vekjaft, dee haft een gaunzet Joa Tiet, daut wada trigjtokjeepen. Daut saul de Tiet sennen, wua hee daut trigjkjeepen kaun. 30Wan hee daut oba nich trigjkjaft, ea daut Joa om es, dan kaun de Kjeepa un siene Nokomen daut Hus fa emma hoolen, un daut felt uk em Entlotungsjoa nich aun däm ieeschten Ieejendeema trigj. 31Es daut een Hus em Darp, wua kjeene Mia rom es, dan saul daut met een Stekj Launt jlikjetrocken woaren, un daut saul emma trigjtokjeepen gonen un em Entlotungsjoa trigj aun däm ieeschten Ieejendeema faulen. 32Waut de Leviten äare Städa aunjeit, doa sellen see de Hiesa en de Städa, waut an jehieren, aulentiet trigjkjeepen kjennen. #(32-34) 4Mo 35,2-5 33Wan eena von de Leviten daut nich trigjkjaft, dan saul daut vekofte Hus en de Staut, waut an jehieet, em Entlotungsjoa trigjfaulen aun däm ieeschten Ieejendeema. Wiels de Hiesa en de Leviten äare Städa sent äa Oafgoot medden mank de Israeliten. 34Uk daut Weidlaunt, waut to äare Städa jehieet, doaf nich vekoft woaren, wiels daut äa Oafgoot fa emma es.
Een Israelit doaf nich veskloft woaren
35Wan dien Metbrooda, een Israelit waut dien Noba es, soo oam woat daut hee nich mea bestonen kaun, dan saust du die däm aunnämen aus eenen framden ooda Oabeida, daut dee bie die läwen kaun. 36Un du saust von am uk kjeen Entras ooda Vedeenst nämen, du saust die ver dienen Gott ferchten, daut dien Noba biesied die läwen kaun. #(36 un 37) 2Mo 22,24; 5Mo 23,20 37Du saust am dien Jelt nich opp Entras lieen ooda opp daut Äten Vedeenst nämen. 38Ekj sie de Har, jun Gott, dee junt ut Ägipten rutjefieet haft, om junt daut Launt Kanaan to jäwen un jun Gott to sennen.
39Wan dien Brooda biesied die soo oam woat, daut hee sikj selfst aun die vekjeepen mott, dan behaundel am nich soo aus eenen Sklow; #2Mo 21,2 40doo am soo behaundlen aus eenen Doages Oabeida ooda Framdoabeida. Soo saul hee bie die oabeiden bat daut näakjste Entlotungsjoa, 41un dan woat hee met siene Famielje toop wada frie un kaun trigj no siene Volkjsgrupp trakjen; un kjricht sien Gruntstekj uk wada trigj. 42De Israeliten sent miene Kjnajchts, wiels ekj an ut Ägipten rutjebrocht hab. Doawäajen derwen dee nich aus Sklowen vekoft woaren. 43Du saust die ver dienen Gott ferchten, un nich met Jewault äwa an rejieren. #2Mo 21,20-21
44Wan du Sklowen ooda Sklowenfrues haben west, dan kaust du dee von de Nobavelkja kjeepen. 45Uk de Framdoabeida, waut bie junt wonen, un dee äare Nokomen, waut en jun Launt jebuaren sent, derw jie aus Sklowen haben 46un uk aun june Kjinja veoawen; dee derwen nich friejeloten woaren. Oba von june Breeda, de Israeliten, saul kjeena met Jewault äwa dän aundren rejieren.
47Wan irjent een framda ooda Oabeida bie die to een Gruntstekj kjemt, un dien Metbrooda, een Israelit, doa opp Nobaschoft en Oamoot jerot un sikj aun däm framden ooda däm siene Aunjehieeje aus Sklow vekjaft, 48dan saul dee, dee sikj vekoft haft, daut Rajcht haben, wada frie to woaren. Eena von siene Breeda 49ooda sien Onkel ooda siene Vadasch ooda een aundra ut sien Frintschoft kaun aus Looskjeepa fa däm enstonen un däm trigjkjeepen. Ooda wan hee selfst sooväl oppbrinjen kaun, kaun hee sikj uk selfst looskjeepen. 50Un hee saul daut met sienen Kjeepa toop beräakjnen, woo väl Joa hee am jedeent haft un woo väl Joa daut noch bat daut näakjste Entlotungsjoa sent. Un daut Jelt, wuafäa hee sikj vekoft haft, saul no de Zol von Joaren beräakjent woaren, soo aus wan hee de gaunze Tiet fa Loon jeoabeit haft. 51Wan noch väl Joaren bat daut Entlotungsjoa sent, dan saul hee uk doano mea von daut Jelt trigjtolen, wuafäa hee es jekoft worden. 52Wan aul mau weinich Joaren bat daut Entlotungsjoa fälen, dan saul hee dee opprechtich beräakjnen un doano weinja fa siene Frielotunk tolen. 53Soo aus een Doages Oabeida saul hee jieda Joa bie däm sennen, oba jie derwen daut nich tooloten, daut dee am toom Sklow moakt. #3Mo 25,43 54Wan daut looskjeepen nich mäajlich es, mott hee en daut näakjste Entlotungsjoa met Famielje toop friejeloten woaren. 55Aule Israeliten jehieren mie aus Sklowen, see jehieren mie, wiels ekj an ut Ägipten rutjefieet hab. Ekj sie de Har, jun Gott!
Currently Selected:
3. Mose 25: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.