3. Mose 26
26
Jehorchen brinjt Jlekj un Säajen
(5Mo 7,12-15; 28,1-14)
1Jie sellen junt uk kjeene Jetta moaken un soone Jetta Bilda en jun Launt oppstalen un dee aunbäden, eendoont, auf daut utjeoabeide ooda jegotne Figuaren, ooda en Steen nenjehakte ooda nenjekrauzte Bilda sent; ekj sie de Har, jun Gott. #2Mo 20,4-5 2Hoolt miene Sabatdoag en ieren un doot mien Heilichtum nich veonieren. Ekj sie de Har! #3Mo 19,30
3Wan jie junt no miene Aunwiesungen rechten un miene Jebooten befoljen woaren, 4woa ekj junt to de rajchte Tiet Räajen jäwen, un daut Launt saul eene goode Ennom brinjen un de Beem sellen Frucht droagen. #5Mo 11,14 5Un de Draschtiet saul bat de Wienarnt rieekjen, un de Wienarnt saul bat de näakjste Akatiet rieekjen. Jie sellen jenuach to äten haben un en jun Launt en Sechaheit wonen. #Amos 9,13 6Ekj woa doano kjikjen, daut en jun Launt Fräd es. Wan jie schlopen gonen, bruck jie junt nich ferchten, daut junt wäa stieren woat. Ekj woa de wille Tieren ut jun Launt wajchschaufen, un kjeene framde Armee woat jun Launt äwafaulen. #Hes 34,25 7Jie sellen june Fiend vedriewen, un dee sellen ver junt derch daut Schwieet faulen. 8Fief von junt sellen 100 vedriewen, un 100 von junt sellen 10.000 vedriewen; june Fiend sellen ver junt bie Häaden faulen. #5Mo 32,30; Jos 23,10 9Un ekj woa opp june Sied sennen un doano kjikjen, daut jie väl Kjinja haben un emma mea woaren. Ekj woa to mienen Bunt stonen un aules erfellen, waut ekj junt vesproaken hab. #Hes 36,11 10Jie woaren noch von de väaje Arnt to äten haben, wan de fresche Arnt aul doa es, un daut tojoasche wajchschmieten motten. 11Ekj woa medden mank junt wonen un well junt nich wajchschmieten. 12Un ekj woa mank junt bliewen un well jun Gott sennen, un jie sellen mien Volkj sennen. #Jer 7,23; 2Kor 6,16 13Ekj sie de Har, jun Gott, dee junt ut Ägipten rutjebrocht haft, wua jie Sklowen wieren. Ekj hab jun Sklowenjoch vebroaken un leet junt oppjerecht gonen. #Hes 34,27-28
Nich jehorchen brinjt Ojjlekj
(5Mo 28,15-68)
14Wan jie mie nich jehorchen un miene Jebooten nich hoolen 15un miene Aunwiesungen veachten un miene Ordnungen auntsied heiwen woaren, soo daut jie nich aul miene Jebooten doonen un mienen Bunt bräakjen, 16dan woa ekj junt dit doonen: Ekj woa eenen sea grooten Schrakj äwa junt komen loten, jie woaren Feeba kjrieen un utdrieejen, soo daut june Uagen blint woaren un jun Läwen langsom to Enj jeit. Vejäfs woa jie june Flekja beseien, wiels june Fiend woaren daut oppäten. 17Un ekj woa mie selfst jäajen junt stalen, un jie woaren von june Fiend besiecht woaren; un dee waut junt nich lieden kjennen, sellen äwa junt rejieren, un jie woaren oppe Flucht sennen, onen daut junt wäa hinjaraun es.
18Wan jie mie uk dan noch nich jehorchen woaren, dan well ekj junt wieda noch säwen mol soo hoat bestrofen, wäajen june Sinden. 19Om junen Stolt un junen Ieejensenn to bräakjen woa ekj daut nich mea räajnen loten; de Himmel bowa junt woat aus Iesa sennen un de Ieed unja june Feet soo hoat aus Steen. #5Mo 11,17 20Un june Mieej un Oabeit saul vejäfs sennen; opp june Flekja woat nuscht mea waussen un de Beem oppem Launt woaren kjeene Frucht droagen.
21Wan jie mie dan emma noch nich jehorchen wellen un wieda jäajenaun sent, woa ekj de Strof, fa june Sinden, noch säwen mol hoada moaken. 22Dan woa ekj wille Rauptieren mank junt schekjen, waut june Kjinja fräten un jun Vee verieten un väle von junt ombrinjen woaren, soo daut june Gaussen woaren ladich sennen. #Hes 5,17 23Wan jie mie dan emma noch nich jehorchen wellen un junt wieda jäajen mie stalen, #(23 un 24) 2Sam 22,27 24dan well ekj mie uk jäajen junt stalen un junt noch säwen mol hoada bestrofen. 25Un ekj woa daut Schwieet äwa junt brinjen, waut de Strof, fa mienen Bunt bräakjen, derchfieren woat. Un wan jie junt en june Städa vekrupen woaren, woa ekj eene jefäadelje Krankheit mank junt schekjen, un jie woaren en june Fiend äare Henj jejäft woaren. #Jes 1,20.24 26Wan ekj junt dän Väarot aun Broot wajchnäm, woaren tieen Frues en eenen Owen äa Broot baken, un jun Broot woat met de Wichtschol toojedeelt woaren. Un wan jie äten, woa jie lang nich saut woaren. #Jes 3,1; Hes 4,16
27Woa jie mie dan uk noch nich jehorchen un junt wieda jäajen mie stalen, 28dan woa ekj mie em Oaja jäajen junt stalen, un woa june Sinden noch säwen mol hoada bestrofen, 29daut jie fa Hunga daut Fleesch von june ieejne Kjinja äten woaren. #5Mo 28,53; Jer 19,9 30Ekj woa june huage Opfastäden venichten un june Ruakopfa Aultoaren utroden un june Doodes opp de vekjielde Jettabilda schmieten. Un ekj woa mie veäakjelt von junt wajchdreien. #Hes 6,4.6 31Un ekj woa june Städa to Prellklompes moaken un june Opfastäden vestieren un woa daut goode Jeroch von june Opfa nich mea rikjen. 32Ekj woa jun Launt soo enne Grunt brinjen, daut june Fiend, waut doabennen wonen, daut gruslen woat. 33Junt woa ekj mank de Velkja vestreien, un ekj woa junt met een schoapet Schwieet hinjaraun sennen. June Goades woaren to eene Wiltnis un june Städa to Prellklompes woaren.
34Dan woat daut Launt de Sabat Joaren noholen, waut jie daut nich jegonnen haben. En dee Tiet, waut daut fa wilt licht, un jie wiet auf bie june Fiend läwen motten, woat daut Launt sikj reiwen un de vesiemde Sabat Joaren noholen kjennen. #3Mo 25,2; 2Chr 36,21 35Soolang aus daut fa wilt licht, woat sikj daut reiwen, wiels sikj daut nich reiwen kunn, aus jie daut reiwen loten sullen, wäarent jie doa wonden. 36Un dee, dee von junt äwabliewen, well ekj en daut Launt von äare Fiend soone Forcht em Hoat jäwen, daut see aul ranen woaren wan see een Blaut ruschlen hieren. An woat daut soo sennen aus wan an daut Schwieet hinjaraun es, soo daut see sikj vestaupen un hanfaulen woaren, wan an uk kjeena vefolcht. 37See woaren eena däm aundren unjaranen, aus wan an daut Schwieet hinjaraun es, wua an äwahaupt kjeena vefolcht. Jie woaren ver kjeenen Fient mea bestonen kjennen 38un togrunt gonen mank de framde Velkja, un daut Launt von june Fiend woat junt oppfräten. 39Dee waut von junt äwabliewen, woaren en de Lenda von äare Fiend aun de Foljen von äare un äare Vodasch äare Schult togrunt gonen. #Hes 24,23; 33,10
40Oba dan woaren see äare Schult un de Schult von äare Vodasch bekjanen, un woaren Leet droagen doawäajen, daut see mie ontru jewast sent un sikj jäajen mie jestalt haben. #5Mo 4,30 41Doawäajen hab ekj mie uk an jäajenaun jestalt un an en daut Launt von äare Fiend jedräwen. Doa woat äa stoltet Hoat sikj deemootjen, un see woaren de Strof fa äare schlajchte Doten doa droagen motten. #5Mo 10,16; Jer 9,25 42Un ekj woa aun mienen Bunt met Jakob denkjen un aun mienen Bunt met Isaak un met Abraham un woa aun daut Launt denkjen, waut ekj an fa äare Nokomen vesproaken haud. #2Mo 2,24; 2Kjen 13,23 43Oba daut Launt woat von an veloten sennen un siene Sabat Joaren noholen, soolang aus daut fa wilt licht, un see woaren de Strof fa äare schlajchte Doten droagen, wiels see miene Ordnungen veachten un sikj om miene Aunwiesungen nich kjemmaden. 44Oba wan see uk en äare Fiend äa Launt sent, schmiet ekj dee doawäajen noch nich wajch, un see sent mie uk goanich een Äakjel, soo daut et met an to Enj gonen mott un mien Bunt nich mea talt. Ekj sie de Har, äa Gott. #Hos 11,9 45Un ekj woa an togood aun mienen Bunt met äare Vodasch denkjen, dee ekj ver de Velkja äare Uagen ut Ägipten rutfieed, om äa Gott to sennen. Dis Bunt blift bestonen; ekj sie de Har! #1Mo 12,7
46Dit sent de Jesazen, Aunwiesungen un Ordnungen, waut de Har tweschen sikj un de Israeliten opp dän Boajch Sinai derch Moses oppjestalt haft.
Currently Selected:
3. Mose 26: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.