3. Mose 27
27
Väaschreften doaräwa, woo de jeweide Gowen to leesen gonen
1De Har räd met Moses un säd: 2Räd met de Israeliten un saj to an: Wan wäa däm Harn een Vespräakjen jemoakt haft, waut oppjeleest woaren saul, un sikj daut om eenen Mensch haundelt, 3dan saul de Pries fa eenen Maun von 20 bat 60 Joa 50 Selwastekja no daut Jewicht biem Heilichtum sennen, #(3-7) Rech 11,31; 1Sam 1,11 4un wan daut eene Fru es, dan 30 Selwastekja. 5Von fief bat 20 Joa saust du, wan daut een Jung es, dän Pries opp 20 Selwastekja faustlajen, un bie eene Mejal opp tieen Selwastekja. 6Von eene Moonat bat fief Joa saust du, wan daut een Jung es, dän Pries opp fief Selwastekja faustlajen, un bie eene Mejal opp dree Selwastekja. 7Wan daut wäa von 60 Joa un doaräwa es, saust du fa eenen Maun 15 Selwastekja räakjnen, un fa eene Fru tieen Selwastekja. 8Wan hee too oam es, om disen Pries to tolen, dan saul hee de Persoon, waut hee däm Harn vesproaken haft, ver däm Priesta stalen, un de Priesta saul däm schazen; hee saul däm doano schazen, waut dee oppbrinjen kaun, dee daut Vespräakjen jemoakt haft.
9Wan daut een Tia es, waut eena däm Harn aus Opfa brinjen kaun, dan saul aules waut eena däm Harn jeft, am jeweit sennen. 10Daut doaf nich met een schlajchtret ooda bätret Tia omjetuscht woaren. Wan daut wäa met een aundret Tia omtuschen deit, dan sellen de Tieren beid däm Harn jehieren. 11Wan wäa däm Harn een orreinet Tia vesprakjt, waut nich aus Opfa jebrocht woaren doaf, dan mott hee daut nom Priesta brinjen. 12Un de Priesta saul daut schazen un dän Pries faustlajen; un doabie saul de Pries bliewen. 13Well daut wäa trigjkjeepen, dee saul noch een Feftel mea tolen aus de jeschazta Pries es. #3Mo 5,16
14Wan wäa däm Harn sien Hus vesprakjt, un am daut weien deit, dan saul de Priesta dän Wieet aufschazen; un soo aus de Priesta daut schazt, soo saul daut bliewen. 15Wan dee, dee daut vesproaken haft, daut trigjkjeepen well, dan saul hee een Feftel von däm jeschazten Pries, noch opp dän Pries tootolen, un dan jehieet am daut wada.
16Wan wäa een Stekj Akalaunt von sien Oafgoot däm Harn vesprakjt, dan saul de Pries doano, aus daut Launtstekj groot es, jeschazt woaren. Wan daut een Flekj es wua eena eenen Sakvoll Joascht utseien kaun, dan saul daut Launt 50 Selwastekja jellen. #2Sam 24,24 17Wan daut Launtstekj fuaz vom Entlotungsjoa aun däm Harn vesproaken es, dan talt de volle Schazungswieet, un doabie saul daut bliewen. #3Mo 25,8-55 18Haft hee daut lota no daut Entlotungsjoa vesproaken, dan saul de Priesta daut Jelt no de äwaje Joaren bat daut näakjste Entlotungsjoa beräakjnen un dän Pries doano läaja schazen. 19Well hee daut Launt trigjkjeepen, waut hee vesproaken haft, dan saul hee noch een Feftel von däm jeschazten Pries mea tolen, un dan jehieet am daut wada. 20Wan hee daut Launtstekj nich trigjkjaft un vekjaft daut aun eenen aundren, dan velist hee daut Trigjkjeepsrajcht fa emma. 21Wan daut Akaflekj dan em Entlotungsjoa frie woat, saul daut däm Harn jeweit sennen, soo daut daut niemols mea loostokjeepen jeit, un saul de Priesta jehieren. 22Wan wäa däm Harn een Flekj Akalaunt vesprakjt, waut hee jekoft haft un goanich to sien Oafgoot jehieet, 23dan saul de Priesta daut beräakjnen, waut daut noch fa eenen Wieet haft bat daut näakjste Entlotungsjoa, un hee saul däm Harn de Somm aun däm selwjen Dach aum Heilichtum tolen. 24Oba em Entlotungsjoa saul daut Launtstekj wada aun däm trigjfaulen, von wäm hee daut jekoft haft, wäm daut aus Oafgoot jehieet. 25Aule Schazungen sellen no daut Jewicht vom Heilichtum jemoakt woaren; 20 Graum saul een Lot haben.
Besondre Falen biem looskjeepen
26Daut ieeschtjebuarne bie Rinda, Schop ooda Kosen kaun däm Harn nich derch een besondret Vespräakjen äwajäft woaren, wiels daut soo aus soo däm Harn jehieet. #2Mo 13,2.12-13; 4Mo 18,15 27Wan daut orreine Tieren sent, dan kjennen dee loosjekoft woaren, wan dee Ieejendeema bie däm jeschazten Pries noch een Feftel tootolt. Wan daut Tia nich loosjekoft woat, dan woat daut von de Priesta fa däm jeschazten Pries vekoft.
28Wan eena däm Harn waut von sien Hab un Goot aun Menschen, Vee ooda Launt opp emma jeweit haft, kaun daut nich mea loosjekoft un uk nich aun aundre vekoft woaren. Daut steit dan unja däm Baun un es waut utnoms heiljet, waut fa emma däm Harn jehieet. #(28 un 29) 4Mo 18,14; 21,2; Jos 6,18.26; Hes 44,29 29Uk Menschen, waut opp soonen Wajch däm Harn jeweit woaren, derwen nich loosjekoft woaren; dee motten dootjemoakt woaren. #Jos 6,17-18; 1Sam 15,3; 15,9
30Daut tieende Deel von jieda Arnt vom Jeträajd un de Frucht von de Beem jehieet däm Harn aus eene heilje Aufgow. #4Mo 18,21; 5Mo 14,22-29; Neh 13,12 31Well wäa waut von dän Tieenden looskjeepen, dan mott hee opp dän Pries noch een Feftel toojäwen. 32Un aul daut tieende von Rinda, Schop un Kosen, waut unja däm Hoad sienen Stock derchjeit, saul däm Harn jeweit sennen. #2Chr 31,6 33Doa saul nich no jefroacht, auf daut goode ooda schlajchte sent, un dee sellen uk nich omjetuscht woaren. Wan daut wäa omtuscht, sellen dee beid däm Harn jehieren un derwen nich trigjekoft woaren.
34Dit sent de Jebooten, waut de Har Moses opp dän Boajch Sinai jeef, om dee aun daut Volkj Israel wiedatojäwen. #3Mo 7,38; 25,1; 26,46
Currently Selected:
3. Mose 27: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.