4. Mose 23
23
1Un Bieleam säd to Balak: Bu mie hia säwen Aultoaren un brinj mie säwen junge Bolles un säwen Schopsbakj. 2Un Balak leet aules reedmoaken, soo aus Bieleam daut wenscht, un see beid opfaden opp jieda Aultoa eenen jungen Boll un eenen Schopsbock. 3Dan säd Bieleam to Balak: Bliew du hia bie dien Brauntopfa; ekj well dort hangonen un seenen, auf de Har mie bejäajnen woat. Ekj woa die dan sajen, waut hee mie jewäsen haft. Un hee jinkj opp däm kolen Boajch. 4Un Gott bejäajend Bieleam; un Bieleam säd to am: Säwen Aultoaren hab ekj oppjebut un opp jieda Aultoa eenen jungen Boll un eenen Schopsbock jeopfat. 5De Har jeef Bieleam de Wieed em Mul un säd: Go trigj no Balak un saj am daut! 6Un aus hee trigj no am kjeem, dan stunt dee met de Moabita äare Volkjsleida toop bie sien Brauntopfa. 7Dan funk Bieleam met sienen Spruch aun un säd:
Ut Aram, von de Boaj em Oosten,
haft Balak, de Moabita Kjennich mie häajebrocht,
un haft aunjeordnet: Du saust Jakob sien Volkj veflieekjen!
un dit Volkj Israel wajch wenschen!
8Woo saul ekj dit Volkj veflieekjen,
wan Gott daut nich veflieekjt?
Woo saul ekj daut doa wajch wenschen,
wan de Har daut doa nich wajch wenscht?
9Von hia huach kaun ekj an seenen,
von opp dise Steenspetz see ekj daut:
Daut see een aufjesondadet Volkj sent,
dee sikj nich mank aundre Velkja talen.
10Wäa kaun dise Lied von Jakob,
dee soo aus Stoff de Ieed bedakjen,
ooda daut vieede Deel von Israel, talen?
Miene Seel mucht de jerajchte äaren Doot stoawen,
un mucht mien Enj soo aus äa Enj woaren! #1Mo 13,16
11Dan säd Balak to Bieleam: Wuarom hast du mie daut aunjedonen? Ekj hab die holen jeloten, om miene Fiend to veflieekjen, un nu säajenst du an! 12Bieleam oba auntwuad un säd: Mott ekj mie nich aun daut hoolen un daut räden waut de Har mie sajcht? #4Mo 22,38
Gott lat sikj nich bekjeepen
13Dan säd Balak to Bieleam: Komm doch met mie met no eene aundre Städ, von wua ut du bloos de butaschte Kaunt von an seenen kaust, un nich daut gaunze Volkj, un doo mie daut von doa veflieekjen. 14Un hee neem Bieleam met no Zofim siene Stap, oppe Spetz vom Boajch Pisga. Un hee bud doa uk säwen Aultoaren un opfad opp jieda Aultoa eenen jungen Boll un eenen Schopsbock. 15Dan säd Bieleam to Balak: Bliew du hia bie dien Brauntopfa, ekj well dort hangonen un däm Harn bejäajnen.
16Un de Har bejäajend Bieleam un jeef am de Wieed en sien Mul un säd: Go trigj no Balak un saj am daut! 17Aus Bieleam no Balak kjeem, stunt hee bie sien Brauntopfa, un de väaschte Mana von de Moabita wieren doa bie am. Un Balak fruach am: Waut haft de Har die jesajcht? 18Un hee funk met sienen Spruch aun un säd:
Sto opp, Balak, un horch!
Nemm die daut aun, waut ekj saj, Zippor sien Sän!
19Gott es nich een Mensch, dee doa lieejen deit,
ooda de Sän von eenen Mensch, daut hee siene Meeninj endat.
Sull hee waut sajen un daut nich doonen?
Sull hee waut räden un sikj nich doaraun hoolen? #1Sam 15,29
20Horch, mie es aunjeordnet worden dit Volkj to säajnen;
hee haft daut jesäajent, un ekj kaun daut nich endren.
21Daut blift doabie: Kjeen Ojjlekj woat an trafen,
un kjeen vedoawen woat en Israel to seenen sennen.
De Har, äa Gott, steit an bie,
un see freien sikj to äaren Kjennich.
22Gott, dee an ut Ägipten jefieet haft,
es äare Macht, soo stoakj aus een willa Boll.
23Daut jeft kjeene Zaubarie en Jakob
un kjeene Woasajarie en Israel.
Nu woat äwa Jakob un Israel jesajcht:
Waut fa Wunda Gott deit.
24Kjikj, daut Volkj woat oppstonen aus een junga Leiw
un woat sikj äwahäa moaken aus een Leiw, un sikj nich hanlajen,
bat hee daut jestolne oppjefräten
un daut Bloot von de Doodje jedrunken haft. #4Mo 24,9; Hes 19,2
25Dan säd Balak to Bieleam: Wan du daut nich veflieekjen west, dan saust du daut uk nich säajnen! 26Bieleam oba auntwuad Balak un säd: Hab ekj die daut nich jesajcht, aules, waut de Har mie sajcht, woa ekj doonen?
Daut toom dredde mol vesieekjen rand krakjt soo ut aus verhäa
27Balak säd to Bieleam: Komm doch, ekj well die no eene aundre Städ brinjen; veleicht jefelt Gott daut, daut du mie dee von dort veflieekjen deist. 28Un Balak neem Bieleam met oppe Spetz von dän Boajch Peor, von wua jlikj opp daut Jordantol rauf to kjikjen jeit. #4Mo 22,41; 25,3 29Dan säd Bieleam to Balak: Bu mie hia säwen Aultoaren un brinj mie säwen junge Bolles un säwen Schopsbakj häa. 30Un Balak deed, soo aus Bieleam säd, un opfad opp jieda Aultoa eenen jungen Boll un eenen Schopsbock.
Currently Selected:
4. Mose 23: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.