4. Mose 22
22
De Moabita Kjennich Balak sieekjt Help bie däm Woasaja Bieleam
(4Mo 22,1—24,25)
1Von doa trocken de Israeliten wieda un loagaden sikj en de moabitische Stap, en daut Jordantol jäajen Jericho. 2Un Balak, Zippor sien Sän, sach daut aula, waut Israel de Amorita aunjedonen haud. 3Un de Moabita ferchten sikj sea fa daut Volkj, wiels daut soo groot wia, un de Moabita zettaden fa de Israeliten. 4Un see säden to de Midianita äare Volkjsleida: Nu woat dise Häad daut oppfräten, waut rom ons es, soo aus de Rinda daut Graus oppe Stap kol fräten. Un Balak, Zippor sien Sän, wia to dee Tiet Kjennich äwa de Moabita. 5Un hee schekjt Bootschofta no Bieleam, Beor sienen Sän, en de Staut Petor, waut aum Eufrat licht, en daut Launt von sien Volkj. Hee leet am roopen daut hee halpen sull, un säd: Kjikj emol, doa es een grootet Volkj ut Ägipten jekomen, waut daut gaunze Launt bedakjt un haben sikj hia aun onse Jrens jeloagat. #4Mo 31,8; Jos 24,9; Micha 6,5 6Dit Volkj es fa mie too stoakj; komm doch un doo daut Volkj veflieekjen, veleicht kaun ekj daut dan trigjschlonen un ut mien Launt vedriewen, wiels ekj weet, wäm du säajenst, dee es jesäajent, un wäm du veflieekjst, dee es veflieekjt. 7Un de Leida von de Moabita un de Midianita jinjen no Bieleam un neemen de Tolinj fa sienen Deenst fuaz met. Un see kjeemen no Bieleam un säden am Balak siene Wieed. #2Pet 2,15 8Un hee säd to an: Blieft hia äwa Nacht! Morjen kaun ekj junt sajen, waut fa eene Auntwuat de Har mie jejäft haft. Un de Moabita äare Leida bleewen bie Bieleam.
Een Woasaja, dee no Gott horcht
9En dee Nacht kjeem Gott no Bieleam un fruach: Wäa sent de Lied, waut doa bie die sent? 10Bieleam säd to Gott: Balak, Zippor sien Sän, de Moabita äa Kjennich, haft dee no mie jeschekjt un lat sajen: 11Kjikj, daut Volkj, waut ut Ägipten jekomen es, bedakjt daut gaunze Launt. Komm nu un doo daut veflieekjen; veleicht kaun ekj daut dan besiejen un vedriewen. 12Gott oba säd to Bieleam: Go nich met an met, un doo daut Volkj uk nich veflieekjen, wiels ekj hab daut jesäajent. 13Aun däm Morjen stunt Bieleam opp un säd to Balak siene Volkjsleida: Got trigj en jun Launt, wiels de Har well daut nich tooloten, daut ekj met junt met kom.
14Un de Moabita äare Volkjsleida muaken sikj opp, un kjeemen trigj no Balak un säden: Bieleam wäat sikj, met ons met to komen. 15Dan schekjt Balak noch mea Mana, un soone waut noch een jratret aunseenen hauden, aus de ieeschte. 16Un aus dee no Bieleam kjeemen, säden see to am: Soo lat Balak, Zippor sien Sän, die sajen: Lot die doch nich opphoolen, no mie to komen! 17Ekj well die daut rikjlich betolen, un aules waut du mie sajchst, daut well ekj doonen; komm doch un doo dit Volkj veflieekjen! 18Bieleam auntwuad un säd to Balak siene Deena: Wan Balak mie sien Hus voll Selwa un Golt jeef, dan kunn ekj doch noch nich däm Harn, mienen Gott, sien Wuat äwaträden, nich em kjlienen uk nich em grooten. #1Kjen 13,8 19Nu blieft uk to dise Nacht hia, daut ekj weet, waut de Har mie wieda to sajen haft. 20Dan kjeem Gott en de Nacht no Bieleam un säd to am: Sent de Mana jekomen, om die to holen, dan moak die opp un go met an met; oba doo bloos daut, waut ekj die sajen woa.
Bieleam woat derch siene seenende Äselkobbel jewoarnt
21Aun däm Morjen stunt Bieleam opp un sodeld siene Äselkobbel un reet met de Moabita äare Volkjsleida met. 22Oba Gott sien Oaja brend doaräwa opp, daut hee met reet. Un däm Harn sien Enjel stald sikj em Wajch, om am opptohoolen. Un hee reet opp siene Äselkobbel, un twee Deena wieren met am. #1Mo 16,7 23Oba de Äselkobbel sach däm Harn sienen Enjel opp däm Wajch stonen met een kolet Schwieet en siene Haunt. Un de Äselkobbel dreid vom Wajch auf un jinkj enne Stap nenn. Oba Bieleam schluach dee, om dee wada trigj opp dän Wajch nopp to brinjen. #Jos 5,13 24Dan staupt däm Harn sien Enjel opp dän Stich tweschen de Wiengoades väa, wua aun beid Sieden Mieren wieren. 25Un aus de Äselkobbel däm Harn sienen Enjel sach, drenjd see sikj aun de Mia naun un drekjt Bieleam dän Foot aun de Mia. Un dan schluach hee ar noch dolla. 26Dan jinkj däm Harn sien Enjel wieda un stald sikj opp eenen schmaulen Stich han, wua kjeen Rum mea toom utstäakjen wia, nich rajchtsch uk nich linkjsch. 27Un aus de Äselkobbel däm Harn sienen Enjel sach, foll see unja Bieleam opp Kjneeen. Dan wort Bieleam wuttich, un hee vekjield de Äselkobbel met däm Stock. 28Doa muak de Har de Äselkobbel daut Mul op, un see säd to Bieleam: Waut hab ekj die jedonen, daut du mie aul dree mol jeschloagen hast? #2Pet 2,16 29Bieleam säd to de Äselkobbel: Wiels du met mie Dommheiten driewen deist! Wan ekj doch een Schwieet enne Haunt haud, dan muak ekj die doot! 30De Äselkobbel säd to Bieleam: Sie ekj nich diene Kobbel, opp dee du aul lang emma jeräden hast bat disen Dach? Un honk mie daut emol aun, soone Dommheiten met die to driewen? Bieleam säd: Nä, niemols. 31Dan muak de Har Bieleam de Uagen op, daut hee däm Harn sienen Enjel opp däm Wajch stonen sach met een kolet Schwieet en siene Haunt. Un Bieleam schmeet sikj ver däm dol opp sien Jesecht. 32Un däm Harn sien Enjel säd to am: Wuarom hast du diene Äselkobbel nu aul dree mol jeschloagen? Kjikj, ekj hab mie oppjemoakt, om die opptohoolen, wiels du opp eenen faulschen Wajch best. 33Oba diene Äselkobbel haft mie jeseenen un es mie dree mol ut däm Stich jekomen. Du hast ar fa dien Läwen to danken, wiels wan du wieda jeräden wieescht, haud ekj die doot jemoakt, un de Äselkobbel läwen jeloten. 34Dan säd Bieleam to däm Harn sienen Enjel: Ekj hab jesindicht; ekj wist daut nich, daut du die bie mie em Wajch jestalt hautst. Un nu, wan die daut nich jefelt, well ekj wada omwenjen. 35Däm Harn sien Enjel säd to am: Go met dise Mana met, oba räd nuscht aundret, aus waut ekj die sajen woa. Soo reisd Bieleam met Balak siene Mana met.
Bieleam mott Israel säajnen
36Aus Balak daut hieed, daut Bieleam kjeem, reisd hee loos, am entjäajen no Ar en Moab, waut aum Arnon Riefa licht, aun de Jrens von sien Launt, 37un säd to am: Hab ekj nich no die jeschekjt un die roopen loten? Wuarom kjeemst du nich fuaz? Dochst du, ekj kunn die nich sea jenuach ieren? 38Bieleam auntwuad am: Kjikj, ekj sie no die jekomen, oba woo kaun ekj irjent waut aundret räden, aus waut Gott mie sajcht? Bloos daut kaun ekj räden! 39Un Bieleam reisd met Balak toop no Kirjat Huzot. 40Un Balak opfad Rinda un Schop un schekjt doavon no Bieleam un no de Volkjsleida, waut bie am wieren.
41Aum näakjsten Morjen jinkj Balak met Bieleam toop nopp no Bamot Baal, daut hee von dort äwa daut gaunze Volkj Israel kjikjen kunn. #Jos 13,17
Currently Selected:
4. Mose 22: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.