4. Mose 25
25
Israel woat veleit, däm Baal Peor to deenen
1Aus daut Volkj Israel sikj en Schittim jeloagat haud, fungen de Mana sikj aun met moabitische Frues auftojäwen. #4Mo 33,49; 1Kor 10,8 2Dise looden daut Volkj to äare Opfafasta en. Un daut Volkj eet von daut Opfafleesch un kjneed sikj ver de Moabita äare Jetta. 3Un Israel honk sikj aun dän Baal Peor. Dan brend däm Harn sien Oaja äwa Israel opp, #5Mo 4,3; Psa 106,28 4un hee säd to Moses: Nemm aul de väaschte Mana von daut Volkj un henj dee em dachen Sonnenschien ver däm Harn opp, om daut ekj nich en mienen brennenden Oaja daut gaunze Volkj venichten mott! #5Mo 21,22-23; 2Sam 21,6.9 5Dan säd Moses to de Rechta en Israel: Doot von de Lied, wua jie veauntwuatlich fa sent, aul dee doot moaken waut sikj met däm Baal Peor aufjäwen! #2Mo 32,27
6Moses un de gaunze Jemeent von Israel haud sikj truarich un hielent ver daut Vesaumlungszelt jekjneet, un dan brocht een Israelit ver äare Uagen eene midianitische Fru en sien Zelt nenn. #4Mo 31,16 7Aus de Priesta Pinhas, Eleasar sien Sän un Aaron sien Grootsän, daut sach, stunt hee opp un veleet de Vesaumlunk. Hee neem eenen Spies en siene Haunt #2Mo 6,25 8un jinkj däm israelitischen Maun hinjaraun en de bennaschte Stow nenn un spekjt dän Spies derch an beid derch, derch dän israelitischen Maun uk derch de Fru äa Kjarpa. Dan hieed de Ploag mank de Israeliten opp. 9Doa wieren aul 24.000 Menschen aun jestorwen. #Psa 106,29-31
10Un de Har räd met Moses un säd: 11Pinhas, Eleasar sien Sän, un däm Priesta Aaron sien Grootsän, haft mienen Oaja von de Israeliten aufjehoolen. Hee haft dän selwjen Oaja jefeelt waut ekj, un von disen Oaja jedräwen, haft hee jehaundelt, om daut ekj nich en mienen Oaja de Israeliten ombrocht. 12Doawäajen saj: Kjikj, ekj jäw am mienen Frädens Bunt, #1Chr 9,20; Jes 54,10; Hes 34,25; Mal 2,5 13un dis Bunt saul am un siene Nokomen fa emma daut Priesta Aumt jäwen, wiels hee sikj en sienen Iewa fa sienen Gott enjesat un fa de Israeliten eene Veseenunk veschauft haft. 14De israelitischa Maun, waut met de midianitische Fru toop doot jemoakt wort, wia Simri, Salu sien Sän, een Leida von eene Volkjsgrupp en däm Staum Simeon. 15Un de midianitische Fru, waut uk doot jemoakt wia, heet Kosbi, un wia Zur siene Dochta, dee de Leida von eene midianitische Staum Grupp wia.
16Un de Har räd met Moses un säd: 17Jriept de Midianita aun un bestroft dee! #4Mo 31,2-10 18See haben aunjefongen junt hinjalestich auntojriepen: See haben junt veleit, un doatoo jekjräajen dän Peor to veieren, un met Kosbi, de Dochta von eenem von de väaschte mank de Midianita onjehuarsom to sennen, dee aun däm Dach doot jemoakt wort, aus de Ploag mank junt wia, wäajen de Sach opp dän Boajch Peor.
De Stam en Israel woaren toom tweede mol jetalt
19No däm aus de Ploag oppjehieet haud,
Currently Selected:
4. Mose 25: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.