4. Mose 28
28
Jesazen äwa de räajelmäsje Opfa em Joa
1De Har räd to Moses un säd: 2Unjarecht de Israeliten daut see doaropp achten sellen, daut see mie miene Opfagowen, mien Äten von de Fiaopfa, to de rajchte Tiet brinjen, mie to een scheenet Jeroch. #3Mo 21,6 3Un wieda jeef Moses de Israeliten dise Aunwiesungen vom Harn: Jie sellen twee eenjoasche Schop, dee onen Fäla sent, aus däachlichet Brauntopfa fa däm Harn opfren. #(3-8) 2Mo 29,38-42 4Daut eene woat aum Morjen jeopfat, un daut aundre jäajen Owent, wan daut schemma woat. 5Un doatoo jehieet toom Ätesopfa een tieendel Efa wittet Mäl, met een vieedel von eene Kaun jepraste Eelj toopjerieet. 6Daut es daut däachliche Brauntopfa, waut junt aum Sinai Boajch jejäft wort, daut jie daut to een scheenet Jeroch opfren, een Fiaopfa fa dän Harn. 7Un doatoo daut Drinkjopfa, bie jieda Schop een vieedel von eene Kaun Wien. De Wien fa daut Drinkjopfa saul däm Harn em Heilichtum jebrocht woaren. 8Daut aundre Schop saust du jäajen Owent reedmoaken. Soo aus aum Morjen, met een Ätesopfa un een Drinkjopfa toop, saust du daut jäajen Owent reedmoaken to een scheenet Jeroch fa dän Harn.
9Aum Sabat sellen twee eenjoasche Schop, dee onen Fäla sent, jeopfat, un twee tieendel Efa wittet Mäl met Eelj toopjerieet toom Ätesopfa, un daut Drinkjopfa waut doabie jehieet. #Mat 12,5 10Daut es daut Brauntopfa fa jieda Sabat buta de däachliche Brauntopfa met äare Drinkjopfa doabie.
11Aum ieeschten Dach enne Moonat sell jie däm Harn twee junge Bolles, eenen Schopsbock un säwen eenjoasche Schop, dee onen Fäla sent, aus Brauntopfa brinjen; #(11-15) 4Mo 10,10; Jes 1,13; Hes 46,1.3.6 12un fa jieda Boll dree tieendel Efa wittet Mäl, met Eelj toopjerieet toom Ätesopfa, un fa jieda Schopsbock twee tieendel Efa wittet Mäl met Eelj toopjerieet toom Ätesopfa. #4Mo 15,2-12 13Un fa jieda Schop saul een tieendel Efa wittet Mäl, met Eelj toopjerieet, toom Ätesopfa jehieren. Daut es een Brauntopfa to een scheenet Jeroch, een Fiaopfa fa dän Harn. 14Un de Drinkjopfa, waut doatoo jehieren, sellen dise sennen: eene haulwe Kaun Wien fa jieda jungen Boll, een dreddel von eene Kaun Wien fa dän Schopsbock, un een vieedel von eene Kaun Wien fa jieda Schop. Daut es daut Brauntopfa toom Niemon fa jieda Moonat em Joa. 15Un doabie saul däm Harn uk noch een Kosenbock toom Sindopfa reedjemoakt, buta de däachliche Brauntopfa met äare Drinkjopfa.
Opfa aum Passafast un aum Wäakjenfast
(3Mo 23,5-22)
16Aum 14. Dach en de 1. Moonat es däm Harn sien Passafast. #(16-25) 3Mo 23,5-14 17Un aum 15. Dach en de selwje Moonat fangt daut Fast aun. Dan sell jie säwen Doag Broot onen Suadieech äten. 18Aum ieeschten Dach saul eene heilje Vesaumlunk sennen, wua jie kjeene Oabeit doonen derwen. 19Jie sellen däm Harn toom Brauntopfa brinjen: twee junge Bolles, eenen Schopsbock, un säwen eenjoasche Schop, dee onen Fäla sent, 20un aus Ätesopfa doatoo: dree tieendel Efa wittet Mäl, met Eelj toopjerieet, fa jieda jungen Boll un twee tieendel Efa wittet Mäl fa däm Schopsbock, 21un fa de säwen Schop, een tieendel Efa wittet Mäl fa jieda Schop. 22Un doatoo saul noch een Kosenbock toom Sindopfa jeopfat, om junt to veseenen. 23Dit sell jie aula noch buta daut Brauntopfa aum Morjen, waut to de däachliche Opfa jehieet, aus Opfa brinjen. 24No dise Räajel sell jie de säwen Doag, jieda Dach, daut Äten reedmoaken aus een Fiaopfa Äten to een scheenet Jeroch fa dän Harn, buta de däachliche Brauntopfa met äare Drinkjopfa. 25Aum säwenden Dach saul wada eene heilje Vesaumlunk sennen, wua jie kjeene Oabeit doonen derwen.
26Un daut Wäakjenfast, wan jie daut ieeschte Jeträajd von de fresche Arnt aus Ätesopfa fa dän Harn brinjen, es fa junt uk een heilja Dach, aun däm jie kjeene Oabeit doonen derwen. #(26-31) 3Mo 23,15-21; 5Mo 16,10 27Un jie sellen däm Harn to een scheenet Jeroch aus Brauntopfa brinjen: twee junge Bolles, eenen Schopsbock, un säwen eenjoasche Schop. 28Un aus Ätesopfa doabie: dree tieendel Efa wittet Mäl, met Eelj toopjerieet, fa jieda jungen Boll, twee tieendel Efa wittet Mäl fa däm Schopsbock 29un een tieendel Efa wittet Mäl fa jieda Schop von dee säwen, 30un eenen Kosenbock, om junt to veseenen. 31Daut sell jie aules toom Opfa brinjen buta de däachliche Brauntopfa met äare Ätesopfa. Dee sellen onen Fäla sennen, un de Drinkjopfa doabie.
Currently Selected:
4. Mose 28: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.