4. Mose 3
3
De Leviten äare Oabeit
1Hia sent Aaron un Moses äare Nokomen, soo aus daut wia aus de Har to an bie däm Sinai Boajch räd. #2Mo 6,23 2Aaron siene Säns heeten Nadab, dee wia daut elste, un dan Abihu, Eleasar un Itamar. 3Dise worden aula enjesaulft un bestäticht daut see aus Priesta deenen sullen, #2Mo 40,15 4oba Nadab un Abihu storwen ver däm Harn aus see en de Sinai Wiltnis ver däm Harn een Opfa muaken met een Fia, soo aus sikj daut nich jehieed; dee hauden aulebeid kjeene Säns. Eleasar un Itamar wieren don Priesta to äaren Voda Aaron siene Tiet. #3Mo 10,1-2
5De Har räd to Moses un säd: 6Brinj dän Staum Levi toop un stal dee aun ver däm Priesta Aaron, soo daut dee am deenen. #2Mo 32,29 7See sellen fa am un de gaunze Jemeenschoft bie daut Vesaumlungszelt de Oabeit doonen un soo bie de heilje Woninj deenen. #4Mo 16,9; 18,3 8See sellen fa de Meebel un Jereetschoft em Vesaumlungszelt oppkomen, eene Oabeit, dee see fa aule Israeliten doonen, un soo bie de heilje Woninj deenen. #4Mo 4,1-49 9Du saust de Leviten aun Aaron un siene Nokomen äwajäwen; dee sellen von daut Volkj Israel gaunz doatoo hanjestalt woaren. 10Du saust Aaron un siene Säns aunstalen toom Priesta sennen; wan sest wäa bie de Oabeit dicht bie kjemt, saul dee doot jemoakt. #4Mo 1,51
11De Har räd to Moses un säd: 12Horch emol, ekj hab de Leviten aunjenomen en de Städ von jieda Ieeschtjebuarnen en Israel. De Leviten sent miene. #2Mo 13,2; 4Mo 8,16 13Jieda Ieeschtjebuarnet jehieet mie. Aus ekj en Ägipten aul de Ieeschtjebuarne ombrocht, veschoond ekj mie jieda Ieeschtjebuarnet en Israel von Menschen un uk von daut Vee. Dee sellen miene sennen. Ekj sie de Har.
De Leviten worden jetalt
14De Har säd to Moses en de Sinai Wiltnis: 15Tal aule Mana un Junges en de Volkjsgruppen un Famieljes bie de Leviten, jieda eenen waut eene Moonat oolt ooda ella es. 16Un Moses tald dee, soo aus de Har am jesajcht haud.
17Levi haud dree Säns, un dee heeten Gerschon, Kehat, un Merari. #2Mo 6,16-19; 4Mo 26,57-64 18Gerschon siene Säns, dee Staumvodasch von äare Volkjsgruppen sent, heeten Libni un Schimi. 19Kehat siene Säns, dee Staumvodasch von äare Volkjsgruppen sent, heeten Amram, Jizhar, Hebron un Usiel. 20Merari siene Säns, dee Staumvodasch von äare Volkjsgruppen sent, heeten Machli un Muschi. Daut sent de Gruppen un Famieljes mank de Leviten. 21Von Gerschon staumen de Libnita un de Schimita, 22un dee hauden toop 7.500 Mana un Junges waut mea aus eene Moonat oolt wieren. 23De Volkjsgruppen, waut von Gerschon staumen, sullen sikj hinja de heilje Woninj, nom wasten von de Woninj loagren. 24De Leida von de Gerschonita wia Eljasaf, Lael sien Sän. 25See wieren veauntwuatlich bie daut Vesaumlungszelt un de Woninj fa de Zelt Dakjen un fa de Enganks Gardien en daut Vesaumlungszelt nenn, 26un fa de Gardien rom dän Bennahoff rom daut heilje Zelt un dän Aultoa un aul de Strenj waut doatoo sent. Dit wia aules äare Oabeit.
27Von Kehat staumen de Amramita, de Jizharita, de Hebronita un de Usielita, 28un dee hauden aulatoop 8.600 Mana un Junges waut mea aus eene Moonat oolt wieren. 29De Volkjsgruppen, dee von de Kehatita staumen, sullen sikj aun de siedne Kaunt von de heilje Woninj loagren. 30De Leida von dise wia Elizafan, Usiel sien Sän. #3Mo 10,4 31De Kehatita wieren veauntwuatlich fa de Bundeskjist, dän Desch, dän Laumpenhoola, de Aultoaren un aul daut Toobehia, waut de Priesta en daut Heilichtum brukten, un fa dän Väahank. Dit wia aules äare Oabeit. #4Mo 7,9 32Eleasar, däm Priesta Aaron sien Sän, wia daut väaschte äwa de Leida em Heilichtum.
33Von Merari staumen de Machlita un de Muschita, 34un dee hauden toop 6.200 Mana un Junges waut äwa eene Moonat oolt wieren. 35De Leida von dise Gruppen, waut von Merari aufstaumen, wia Zuriel, Abihajil sien Sän. Dise sullen sikj aun de nuadne Kaunt von de heilje Woninj loagren. 36De Merarita wieren veauntwuatlich fa de Stendasch, Dwäastangen un Feet von de heilje Woninj un waut doatoo jehieed. Daut wia aules äare Oabeit. 37See wieren uk veauntwuatlich fa de Past, Feet, Zeltstekjels un Strenj fa dän Väahoff. 38Dee, dee ver de heilje Woninj nom Oosten loagaden, wieren Moses un Aaron un Aaron siene Säns. Dee wieren veauntwuatlich no daut Heilichtum opptopaussen fa aule Israeliten. Un wan doa eena dicht bie kjeem, dee nich doatoo bestemt wia, sull dee dootjemoakt woaren. 39De gaunze Zol von Mana un Junges, waut eene Moonat oolt un mea wieren von de Gruppen von Leviten dee Moses un Aaron no däm Harn sien Wuat opptalden, wia 22.000.
De Leviten stonen en de Ieeschtjebuarne äare Städ
40De Har säd to Moses: Du saust aule Ieeschtjebuarne Israeliten, Mana un Junges waut eene Moonat oolt un mea sent, no äare Nomes talen. 41Un dan saust du, wiels ekj de Har sie, de Leviten fa mie oppoat saten, en de Städ von aul de Ieeschtjebuarne von Israel, un du saust daut Vee, waut de Leviten jehieet, oppoat saten en de Städ von daut Vee von daut gaunze Volkj. #4Mo 18,15 42Un krakjt soo aus de Har am jesajcht haud, tald Moses aule Ieeschtjebuarne von de Israeliten, 43un daut wieren 22.273 Mana un Junges waut eene Moonat un ella wieren.
44Un de Har säd to Moses: 45Sat aul de Leviten oppoat en de Städ von aul de ieeschtjebuarne Israeliten, un daut Vee, waut de Leviten jehieet, en de Städ von daut Vee von em Volkj. Ekj sie de Har. 46Om de 273 frie to moaken, waut mea sent aus mank de Leviten, 47saust du fief Selwastekja, soo aus dee em Heilichtum aufjewoagen woaren, von jiedrem velangen. Een Selwastekj es 20 Graum 48Dit Selwa, waut soo toopkjemt toom dee waut äwaschossich sent frie to moaken, saust du Aaron un siene Säns jäwen. 49Un Moses neem daut Selwa von dee, waut mea wieren aus waut derch de Leviten friejesat worden. 50Un Moses kjrieech 1.365 Selwastekja, no daut Jewicht vom Heilichtum aufjewoagen. 51Un krakjt soo aus de Har velangt haud, jeef hee Aaron un siene Säns daut Selwa von de loosjekofte Menschen. Daut wia je waut de Har to Moses jesajcht haud.
Currently Selected:
4. Mose 3: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.