4. Mose 30
30
1Moses säd de Israeliten aules, waut de Har am jesajcht haud.
Woone Vespräakjungen von Frues nich jeltich sent
2Moses räd met de Leida von de Stam en Israel un säd: Dit es waut de Har jesajcht haft:
3Wan een Maun däm Harn een Vespräakjen moakt ooda eenen Eit schwieren deit, daut hee sikj fa waut veflichten well, dan saul hee sien Wuat nich bräakjen, hee saul aules doonen, soo aus daut äwa siene Leppen jekomen es. #3Mo 27,2-25; 4Mo 6,1-21; 5Mo 23,22; Rech 11,35; Liera 5,3-4
4Wan eene Fru däm Harn een Vespräakjen moakt un sikj fa waut veflichten deit, soolang aus see onbefriet en äa Voda sien Hus es, 5un äa Voda hieet von äa Vespräakjen un äare Veflichtunk, waut see sikj oppjelajcht haft, un sajcht nuscht doatoo, dan jelt daut Vespräakjen un de Veflichtunk, waut see sikj oppjelajcht haft. 6Wan äa Voda ar daut oba aufsajcht aun däm Dach, wua hee daut to hieren kjricht, dan jelt daut Vespräakjen un de Veflichtungen waut see sikj oppjelajcht haft nich. Un de Har woat ar jnädich sennen, wiels äa Voda ar daut veboden haft.
7Wan eene Fru verem befrieen een Vespräakjen jemoakt haft ooda onbedocht waut vesproaken haft, wua derch see sikj jebungen haft, 8un äa Maun hieet daut un sajcht aun däm Dach nuscht doatoo, dan jelt äa Vespräakjen un äare Veflichtunk, waut see sikj oppjelajcht haft. 9Wan äa Maun ar daut oba aun däm Dach vebeeden deit, wua hee daut to hieren kjricht, dan moakt hee ar, von daut Vespräakjen waut opp ar licht, loos, un uk von äa onbedochtet Vespräakjen, wuaderch see sikj jebungen haud. Un de Har woat ar daut vejäwen.
10Eene Wätfru ooda eene vestade Fru oba mott aules hoolen, waut see vesproaken haft.
11Wan eene Fru tus bie äaren Maun waut vesprakjt un sikj derch eenen Eit doaraun binjt, #(11-16) Jer 44,19.25 12un äa Maun hieet daut un es stell doatoo un vebitt ar daut nich, dan jellen aul äare Vespräakjungen un aules, wuatoo see sikj veflicht haft. 13Moakt äa Maun ar oba aun däm Dach von äa Vespräakjen loos, wua hee daut hieet, dan jelt daut, waut äwa äare Leppen jekomen es, waut see vesproaken ooda wuatoo see sikj veflicht haud nich, wiels äa Maun ar doavon loosjemoakt haft. Un de Har woat ar jnädich sennen. 14Jieda Vespräakjen un jieda Eit, met dee see sikj veflicht haft to fausten, kaun äa Maun unjastetten ooda opphäwen. 15Wan hee oba een Dach nom aundren, wua hee daut to hieren kjricht, daut nich vebeeden deit, wellicht hee en siene Fru äa Vespräakjen en. 16Wan hee daut oba jehieet haft un daut mau ieescht lota vebeeden deit, dan saul hee äare Schult droagen.
17Daut sent de Ordnungen, dee de Har däm Moses jesajcht haft, tweschen Maun un Fru, un tweschen Voda un Dochta, soolang aus see noch onbefriet en äa Voda sien Hus es.
Currently Selected:
4. Mose 30: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.