4. Mose 34
34
De Jrensen von daut Launt Kanaan
1De Har räd met Moses un säd: 2Jeff de Israeliten de Aunordnunk un saj to an: Wan jie en daut Launt Kanaan komen, dan es dit daut Launt, waut junt aus Oafgoot jehieren saul. Daut Launt Kanaan no dise Jrensen: #(2-12) Hes 47,13-20; 5Mo 32,8 3De Spetz em Sieden von jun Launt saul von de Zin Wiltnis aun Edom velenjd gonen. June Siedjrens saul aum Enj vom Soltmäa, waut em Oosten licht, aunfangen 4un saul siedwastlich aun de Skorpionen Stiej vebie no Zin un wieda siedlich von Kadesch Barnea un dan no Hazar Adar un von doa äwagonen no Azmon 5un von Azmon no dän ägiptischen Riefa, un daut Enj von de Jrens saul daut Mäa sennen.
6Un june Wastjrens saul daut Meddelmäa sennen. 7De Nuadjrens saul vom Meddelmäa no däm Boajch Hor gonen 8un von dort äwa Hamat no Zedad 9un wieda äwa Sifron bat aun Hazar Enan. Daut es june Nuadjrens.
10De Oostjrens jeit von Hazar Enan no Schefam 11un von Schefam no Ribla nom Oosten han von Ajin. Un von doa velenjd daut Eewa aun de oostne Sied vom See Kinneret 12un jeit velenjd dän Jordan bat aun daut Soltmäa. Daut es jun Launt met de Jrensen runtom.
13Un wieda säd Moses to de Israeliten: Dit es daut Launt, waut jie derchem Loss mank junt vedeelen sellen, soo aus de Har daut väajesajcht haft, de näajen Stam un dän een haulwen Staum to jäwen. 14Wiels de Staum Ruben met siene Volkjsgruppen un de Staum Gad met siene Volkjsgruppen un de haulwe Staum Manasse haben äa Oafgoot jekjräajen. #4Mo 32,29-33 15De twee Stam un de haulwa Staum haben äa Oafgoot aul aun ditsied Jordan, nom Oosten han von Jericho.
De Aunordnunk to de Launt Vedeelunk
16De Har räd to Moses un säd: 17Dit sent de Nomes von de Mana, dee daut Launt mank junt vedeelen sellen: De Priesta Eleasar un Josua, Nun sien Sän. #5Mo 1,38; Jos 14,1 18Un dan sell jie noch von jieda Staum eenen von de Leida nämen, om daut Launt to vedeelen. 19Un dit sent de Nomes von de Mana: Kaleb, Jefune sien Sän, vom Staum Juda. #4Mo 13,6.30 20Schemuel, Amihud sien Sän, vom Staum Simeon. 21Elidad, Kislon sien Sän, vom Staum Benjamin. 22Bukki, Jogli sien Sän, de Staumleida vom Staum Dan. 23Haniel, Efod sien Sän, de Staumleida vom Staum Manasse, von Josef siene Nokomen. 24Kemuel, Schiftan sien Sän, de Staumleida vom Staum Efraim. 25Elizafan, Parnach sien Sän, de Staumleida vom Staum Sebulon. 26Paltiel, Asan sien Sän, de Staumleida vom Staum Isachar. 27Ahihud, Schelomi sien Sän, de Staumleida vom Staum Asser. 28Un Pedahel, Amihud sien Sän, de Staumleida vom Staum Naftali. 29Daut sent dee, dee de Har dän Oppdrach jeef, de Israeliten daut Oafgoot em Launt Kanaan entodeelen.
Currently Selected:
4. Mose 34: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.