4. Mose 35
35
De Städa fa de Leviten
1De Har räd en daut moabitische Jordantol jäajen Jericho met Moses un säd: #(1-8) Jos 21,1-3 2Saj to de Israeliten, daut see de Leviten von äa Oafgoot Städa jäwen toom wonen. Un jäft de Leviten uk daut Weidlaunt rom de Städa, #3Mo 25,32-34; 4Mo 18,20 3daut see en de Städa wonen un äa Vee un aul äare Tieren opp de Weidstapen weiden kjennen. 4Un daut Weidlaunt bie de Städa, waut jie de Leviten jäwen, saul bat 500 Meeta auf von de Stautsmia runt om de Staut rieekjen. 5Soo sell jie daut buta de Staut aufmäten: aun de oostne Kaunt 1.000 Meeta, aun de siedne Kaunt 1.000 Meeta, aun de wastne Kaunt 1.000 Meeta, un aun de nuadne Kaunt 1.000 Meeta, soo daut de Staut enne Medd es. Daut saul an aus Weidlaunt bie de Städa jehieren.
6Von de Städa, waut jie de Leviten jäwen woaren, sell jie sas to Friestäda bestemmen, wua dee sikj en Schutz brinjen kaun, wäa eenen dootjeschloagen haft. Un buta dee sell jie an noch 42 Städa jäwen, #2Mo 21,13 7soo daut aul de Städa, waut jie de Leviten jäwen, 48 Städa sent, met äa Weidlaunt toop. 8De Staum von de Israeliten, waut mea haft, saul uk mea Städa aufjäwen, un dee waut weinja haft, saul weinja aufjäwen; een jiedra saul no sien Oafgoot no, waut am toojedeelt woat, Städa aufjäwen aun de Leviten. #4Mo 26,54
Friestäda fa Dootschlonasch un de Vehaundlunk bie Mort
9De Har räd met Moses un säd: #(9-15) 5Mo 4,41-43; 19,1-3; Jos 20,1-9 10Räd met de Israeliten un saj to an: Wan jie äwa dän Jordan en daut Launt Kanaan nenn komen, 11sell jie Städa utsieekjen, waut Friestäda fa junt sent, wua dee sikj hanbrinjen kaun, dee onaufsechtlich wäm dootjeschloagen haft. 12Dise Städa mank junt sellen een Schutz sennen jäajen dee, von em Frintschoft, dee dän Doot rajchen wellen. Dee, dee waut eenen dootjeschloagen haft, brukt dan nich stoawen, ea hee ver de Jerechts Jemeent jekomen es. 13Un sas Städa sellen daut sennen, dee jie to Friestäda bestemmen. 14Dree sell jie aun ditsied Jordan bestemmen, un dree aun jantsied, em Launt Kanaan. Dit sellen Friestäda sennen. 15Dise sas sent Friestäda fa de Israeliten uk fa de framde un de Framdoabeida mank junt, om daut dee, wäa onaufsechtlich wäm dootjeschloagen haft, doahan flichten kaun.
Jebooten wäajen Mort un Dootschlona
(5Mo 19,4-13)
16Wäa eenem met een Stekj Iesa schleit, daut dee stoaft, daut es een Merda un saul met däm Doot bestroft woaren. 17Schleit hee met eenen Steen, wua een Mensch kaun met dootjeschloagen woaren, daut dee doaraun stoaft, dan es hee een Merda un saul met däm Doot bestroft woaren. 18Schleit hee däm met een Stekj Holt, wua een Mensch kaun met dootjeschloagen woaren, soo daut dee stoaft, dan es hee een Merda un saul met däm Doot bestroft woaren. 19Dee von em Frintschoft, dee dän Doot rajchen well, haft de Oppgow dän Merda doottomoaken; doa wua hee däm bejäajent, saul hee däm dootmoaken. 20Un wan hee wäm jekjielt haft, wiels hee däm nich lieden kunn, ooda met beese Aufsecht waut no däm jeschmäten haft, soo daut dee doaraun stoaft, 21ooda ut Fientschoft met de Fust schleit, daut dee doaraun stoaft, dan es hee een Merda un saul met däm Doot bestroft woaren. De Blootrajchna saul däm dootmoaken, doa wua hee däm bejäajent.
22Wan wäa eenem kjielt, onen daut hee däm fientlich wia ooda daut jeplont haud, ooda onaufsechtlich wäm traft, wan hee met waut schmitt, 23ooda met eenen Steen, wua een Mensch met doottoschlonen jeit, no wäm schmitt, soo daut dee dootschleit, un däm oba nich jeseenen haft, un uk nich däm sien Fient es, un däm uk nuscht beeset haft aundoonen wult, 24dan saul de Jemeent tweschen däm Dootschlona un däm Blootrajchna no dise Rajchtsordnungen rechten. 25Un de Jemeent saul däm Dootschlona ut däm Blootrajchna siene Henj raden un saul am trigj no de Friestaut brinjen, wua hee sikj en Schutz jebrocht haud. Un hee saul doa bliewen, bat de Huagapriesta stoaft, dee met de heilje Eelj jesaulft worden es. #3Mo 21,10 26Jeit de Dootschlona oba äwa de Jrens ut de Friestaut rut, en dee hee Schutz jefungen haft, 27un de Blootrajchna finjt am buta de Jrensen von siene Friestaut un schleit am doot, dan saul dee wäajen daut Bloot nich schuldich sennen. 28De Dootschlona saul en siene Friestaut bliewen bat de Huagapriesta jestorwen es, un no däm Huagenpriesta sienen Doot doaf hee trigjtrakjen no sien Oafgoot. 29Daut saul junt een Jesaz un een Rajcht fa emma sennen, äwaraul, wua jie wonen.
30Wäa eenen Mensch dootschleit, dee saul opp de Wieed von de Zeijen dootjemoakt woaren. Oba opp eenen Zeij siene Wieed doaf kjeen Doodesuadeel utjesproaken woaren. #5Mo 17,6; 19,15 31Un jie derwen kjeen Leesjelt nämen fa daut Läwen von eenen Merda. Wiels dee es dän Doot schuldich un saul stoawen. #Psa 49,8-9 32Un jie sellen uk kjeen Leesjelt nämen fa däm, dee en eene Friestaut jeflicht es, daut dee trigjtrakjen doaf, om opp sien Launt to wonen, ea de Priesta jestorwen es. 33Doot daut Launt nich veonieren, wua jie bennen wonen; wäa aum Bloot schuldich jeworden es, deit daut Launt schenden. Daut Launt kaun aundasch nich von de Blootschult veseent woaren, waut doabennen vegoten woat, buta derch däm sien Bloot, dee daut vegoten haft. #1Mo 9,6 34Moakt daut Launt, wua ekj uk bennen won, nich orrein; ekj sie de Har, dee medden mank de Israeliten wont. #2Mo 29,45; 3Mo 18,24-28
Currently Selected:
4. Mose 35: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.