4. Mose 36
36
Dajchta, dee Oawen sent, sellen sikj nich buta äaren Voda sienen Staum befrieen
(4Mo 27,1-11)
1De Leida von de Volkjsgruppen von Gilead siene Nokomen, dee Machir sien Sän un Manasse sien Grootsän wia, von Josef siene Nokomen, kjeemen ver Moses un ver de Leida von de Stam en Israel 2un säden: De Har haft die, onsen Leida, aunjeordnet, daut Launt derchem Loss mank de Israeliten to vedeelen. Hee haft die uk väajesajcht, onsen Brooda Zelofhad sien Oafgoot, siene Dajchta to jäwen. #4Mo 26,55 3Wan dise sikj nu oba Mana von eenen aundren Staum frieen, dan woat onse Vodasch äa Oafgoot kjlanda woaren, un daut Launt waut see haben, woat däm aundren Staum vejratren, wua see sikj nenn frieen; un soo woat daut Oafgoot, waut ons traft, kjlanda. 4Un wan dan daut Entlotungsjoa kjemt, dan woat äa Oafgoot no daut Oafgoot von däm Staum komen, wua see sikj nenn jefriet haben; un soo woat daut Oafgoot von onse Vodasch äare Stam sooväl kjlanda, aus an doavon jehieet. #3Mo 25,10-13
5Opp däm Harn sien Wuat säd Moses to de Israeliten: De Mana vom Staum Manasse haben rajcht. 6Dit es daut, waut de Har fa Zelofhad siene Dajchta väajesajcht haft: Lot see sikj befrieen, met wäm see wellen, oba bloos von de Famieljes waut to äaren Staum jehieren, 7daut nich de Israeliten äa Oafgoot von eenen Staum nom aundren äwajeit; jieda eena von de Israeliten saul aun daut Oafgoot von siene Vodasch äaren Staum fausthoolen. 8Un aule Dajchta, dee mank de Stam een Oafgoot kjrieen, sellen sikj eenen von de Gruppen frieen waut to äaren Staum jehieren, daut een jiedra von de Israeliten daut Oafgoot von siene Vodasch helt, 9un nich een Deel von eenen Staum aun eenen aundren felt. Een jiedra saul aun sien Oafgoot mank de Stam en Israel fausthoolen.
10Soo aus de Har Moses daut väajesajcht haud, deeden Zelofhad siene Dajchta, 11Machla, Tirza, Hogla, Milka un Noa daut, un befrieden sikj met äaren Onkel siene Säns #4Mo 26,29-34 12von de Nokomen von Manasse, dee Josef sien Sän wia. Un soo bleef äa Oafgoot bie äaren Voda sienen Staum.
13Dit sent de Jebooten un Rajchten, waut de Har de Israeliten en daut moabitische Jordantol jäajen Jericho derch Moses jejäft haft.
Currently Selected:
4. Mose 36: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.