4. Mose 5
5
Räajlen fa daut Volkj Israel
1De Har räd met Moses un säd: 2Velang daut de Israeliten aule Lepra kranke un aul dee waut Schlemsen un Schwäaren haben waut kjietren un aul dee waut nom Jesaz no orrein sent, wäajen see eenen Dooden aunjeschieet haben, bat buta daut Loaga schekjen. #3Mo 13,46; 15,2; 4Mo 9,6-7 3Beides Mana un Frues sellen ut daut Loaga rutjestopt woaren, soo daut see nich daut Loaga, wua ekj bennen won, no ons Jesaz orrein moaken. #4Mo 12,14-15; 2Mo 25,8 4Un de Israeliten deeden daut un schekjten dee aula bat buta daut Loaga, soo aus de Har Moses daut jesajcht haud.
5De Har räd to Moses un säd: 6Saj de Israeliten: Wan een Maun ooda eene Fru waut orrajcht aun eenen aundren Mensch deit un sikj ver däm Harn vesindicht, dan es deejanja schuldich, #(6-8) 3Mo 5,21-26 7un saul de Sind, dee hee jedonen haft, bekjanen un dän gaunzen Schoden un dan noch daut fefte Poat doanopp, däm betolen, wäm hee orrajcht behaundelt haft. 8Wan doa kjeena dicht bie em Frintschoft es, aun wäm hee daut aufjäwen kaun, dan saul däm Harn daut jejäft fa de Priesta, toop met daut Veseenungs Opfa von eenen Veseenungs Bock. 9Soo sellen aule jeweide Gowen, woone de Israeliten däm Harn brinjen, de Priesta jehieren. #4Mo 18,8 10Aules waut de Lied däm Harn weien saul de Priesta jehieren; un aules waut de Priesta jejäft woat, saul an jehieren.
11De Har räd to Moses un säd: 12Unjarecht de Israeliten, waut see doonen sellen wan eenen Maun siene Fru am nich tru blift un orrajcht jäajen am deit, 13wan een aundra Maun bie ar licht un äa Maun finjt daut nich ut, soo daut see ver Gott orrein es, un doa kjeene Zeijen doafäa sent, waut daut enworden aus daut passieed. 14Wan dee Maun dan opp vedocht kjemt un dän Jedanken nich vedroagen kaun daut see ver Gott orrein es, ooda uk wan hee opp vedocht kjemt un dän Jedanken nich vedroagen kaun, wan see werkjlich oschuldich es, 15dan saul de Maun siene Fru no däm Priesta brinjen un een Opfa, soont aus fa ar jehieet, moaken. Hee saul daut tieende Poat von een Efa jemolne Joascht opfren, oba doa kjeen Olieweneelj äwa jeeten un kjeen Weiruak bie doonen, wiels dit een Mälopfa von eenen Maun es, dee wäm opp vedocht haft, een Opfa toom de Schult opdakjen. 16De Priesta saul de Fru bat aun däm Harn sienen Aultoa brinjen 17un waut heiljet Wota en eene Komm, waut von Leem jemoakt un jebrent es, nämen, un waut Ieed von de Flua em Vesaumlungszelt doa nenn doonen. 18De Priesta saul ver däm Harn sien Aultoa de Fru äare Hoa opmoaken, un ar daut Joascht Mäl, woont daut Opfa es, wiels see opp vedocht es, enne Henj jäwen. De Priesta saul daut betre Wota, waut dän Fluch brinjt en siene Haunt hoolen, 19un een Eit opp ar brinjen un sajen: Wan kjeen Maun bie die jeläajen haft un du dienen Maun nich best ontru jewast, soo daut du nich ver Gott orrein best, dan woat dit betre Wota, waut eenen Fluch brinjt, die nuscht schoden. 20Oba wan du best ontru jäajen dienen Maun jewast, un die hast ver Gott orrein jemoakt, un een Maun buta dien Maun bie die jeläajen haft, 21dan saul de Priesta eenen Eit opp vedoawen opp de Fru lajen un to ar sajen: Mucht de Har eenen Fluch opp die brinjen un dienen Nomen eene Schaund mank june Menschen moaken; mucht diene Hoft en die vedrieejen un dien Buck dikj woaren. 22Soo drinkj nu dit Wota, daut diene Hoft en die vedrieecht un dien Buck dikj woat. Un dan saul de Fru sajen: Lot daut soo sennen, Amen. 23Dan saul de Priesta dän Eit opp vedoawen dolschriewen un daut jeschräwne met daut betre Wota en de Komm nenn wauschen, 24un ea hee de Fru daut betre Wota met dän Fluch to drinkjen jeft un daut en ar nenjeit dän Schoden to doonen, #Psa 109,18 25saul de Priesta von de Joascht, woont daut Opfa es, wiels see opp vedocht es, von äare Henj nämen un daut ver däm Harn opphäwen un nom Aultoa brinjen. 26Un hee saul eene Hauntvoll von daut Ätesopfa nämen un daut aus een Tieekjen von daut gaunze Opfa opp däm Aultoa loten en Ruak oppgonen, un dan saul de Fru daut Wota drinkjen. 27Wan see ver Gott orrein es un äaren Maun es ontru jewast, dan woat daut betre Wota, wan see daut jedrunken haft, äare Hoft en ar vedrieejen un äaren Buck dikj woaren loten un äa Nomen woat eene Schaund mank äare Menschen sennen. 28Wan de Fru sikj nich vegonen haft un rein ver Gott es, dan woat ar nuscht woaren un see woat kjennen mea Kjinja haben.
29Dit es daut Jesaz, wan een Maun opp vedocht kjemt, wiels siene Fru am es ontru jewast un ver Gott orrein jeworden es, 30ooda wan een Maun opp Jedanken jekomen es un siene Fru opp vedocht helt; hee saul ar dan ver däm Harn stalen un de Priesta saul no dit Jesaz no haundlen. 31Un de Maun saul frie sennen von Schult, oba de Fru saul de Foljen droagen von daut waut see veschulcht haft.
Currently Selected:
4. Mose 5: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.