4. Mose 6
6
Gott jeweide Menschen
1De Har räd to Moses un säd: 2Wan een Mensch, auf Maun ooda Fru, een besondret Vespräakjen aus een Nazara opp sikj nemt un sikj däm Harn weit, #1Sam 1,11 3dan saul dee kjeen Wien ooda stoakjet drinkjen. Dee saul kjeen Wienädikj, waut von Wien ooda stoakje Jedrenkjen jemoakt es, drinkjen un kjeen Jedrenkj, waut von Wiendruwen jemoakt es, drinkjen, un kjeene Wiendruwen ooda Rasienen äten. #Amos 2,11-12; Luk 1,15 4Soo lang aus sien Vespräakjen helt, saul dee nuscht äten waut von de Wiendruwenplaunt kjemt, nich emol Kjieena ooda Schluwen von Wiendruwen. 5Soo lang aus daut Vespräakjen helt, saul hee sikj kjeene Hoa aufschnieden; bat de Tiet äwa es daut hee sikj däm Harn jeweit haft, saul hee heilich sennen un de Hoa opp sienen Kopp waussen loten. #Rech 13,5 6Fa de gaunze Tiet daut hee sikj däm Harn jeweit haft, saul hee nich dicht bie eenen Dooden gonen. 7Uk wan sien Voda ooda siene Mutta ooda Brooda ooda Sesta stoaft, doaf hee sikj nich aun dee ver Gott orrein moaken, wiels daut Tieekjen daut hee sikj jeweit haft es opp sienen Kopp. #3Mo 21,11 8De gaunze Tiet waut dee sikj aus een Nazara jeweit haft saul hee heilich bliewen ver däm Harn. 9Wan daut soo traft daut doa wäa haustich dicht bie am stoaft un hee siene Hoa ver Gott orrein kjricht, dan saul hee aun dän säwenden Dach wan hee wada rein woat, sikj de Hoa aufschnieden, #4Mo 19,11.14.16 10un aum achten Dach saul hee twee Turtelduwen ooda twee aundre Duwen no däm Priesta brinjen bie däm Engank von daut Vesaumlungszelt. #3Mo 5,7 11Un de Priesta saul von daut eene Voagel een Sindopfa un von daut aundre een Brauntopfa moaken daut hee soo aus daut veseent woat, wiels hee sikj aun eenen Vestorwnen ver Gott orrein jemoakt un Schult opp sikj jebrocht haft. Un aun dän Dach saul hee sienen Kopp fa däm Harn heilich moaken, 12un sikj däm Harn weien fa de volle Tiet waut hee vesproaken haud. Hee saul een eenjoaschet Schop aus een Schultopfa brinjen. Un dee Tiet, waut hee sikj verhäa jeweit haud, saul to nuscht jetalt woaren, wiels hee sienen Kopp orrein jemoakt haft.
13De Zeremonie fa eenen Nazara es soo aus dit. Wan de Tiet dee hee vesproaken haud om es, saul hee bat de Däa von daut Vesaumlungszelt jebrocht woaren, 14un hee saul däm Harn Opfa brinjen. Hee saul een eenjoaschet Schop waut kjeen Fäla haft fa een Brauntopfa, een eenjoaschet Schop waut kjeen Fäla haft fa een Sindopfa, un eenen Bock waut kjeen Fäla haft fa een Dankopfa brinjen. 15Un hee saul een Korf Broot von onjesuaden Dieech von wittet Mäl un met Eelj doabennen un Reeschkje met Eelj beschmäat, un daut Ätesopfa, un uk de Drinkjopfa waut bie een jiedret bie jehieet brinjen. 16De Priesta saul dee ver däm Harn brinjen un saul fa am Sindopfa un Brauntopfa moaken, 17un von däm Bock un dän Korf voll Broot een Dankopfa fa däm Harn moaken, un dan uk noch de Ätesopfa un Drinkjopfa. 18De Nazara saul dan de Hoa von sien jeweiden Kopp, ver dän Engank to daut Vesaumlungszelt, aufschnieden un dee opp daut Fia unja daut Dankopfa vebrennen. #Apost 18,18 19Wan däm Nazara ieescht de Hoa von sien jeweiden Kopp aufjeschnäden sent, saul de Priesta eenen jekoakten Schulla von däm Bock un een Broot von onjesuaden Dieech von däm Korf, un een Biet Reeschkje nämen, un däm Nazara daut enne Henj jäwen. 20De Priesta saul daut aus een Opfa ver däm Harn opphäwen. Dit es daut heilje Poat fa dän Priesta, toop met daut Broststekj waut oppjehowen wort, un dän Schinkjen dee jeopfat woat. No daut kaun de Nazara Wien drinkjen. #2Mo 29,23-24.27
21Daut es daut Jesaz fa däm Nazara dee däm Harn sien Opfa jeweit haft en sien Vespräakjen, buta daut waut hee sest noch kaun; soo aus hee vesproaken haft saul hee daut doonen, doano aus hee daut unja daut Jesaz fa een Nazara vesproaken haft.
De Säajen vom Priesta
22De Har räd met Moses un säd: 23Saj Aaron un siene Säns, dit es woo jie de Israeliten dän Säajen jäwen sellen. Sajcht to an: #3Mo 9,22-23; 5Mo 10,8
24Mucht de Har die säajnen un die Schutz jäwen; #1Mo 24,1.35; Psa 121,1-8
25Mucht hee die met Freid halpen,
un jenstich to die sennen; #2Mo 34,6-7; Psa 80,4
26Mucht de Har dicht bie die bliewen,
un die Erfolch un Fräd jäwen. #Psa 69,17-18; 85,9; Jes 57,19
27Un de Har säd: Wan see daut Volkj Israel en mienen Nomen säajnen woaren, dan woa ekj daut Volkj säajnen.
Currently Selected:
4. Mose 6: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.