Sacharja 4
4
5 De Laumpenhoola
1Dan kjeem de Enjel, dee met mie jerät haud, noch emol no mie un wuak mie opp, aus wan eena wäm vom Schlop oppwakjt. 2Un hee säd to mie: Waut sitst du? Un ekj säd: Na, ekj see, daut es gaunz wundaboa, een Laumpenhoola, un dee es gaunz von Golt jemoakt. Bowen es doa eene Komm met säwen Laumpen. Un jieda Laump haft säwen Dochten. #2Mo 25,31-40; Jer 1,11-13; Amos 8,2 3Un dan steit doa aun jieda Sied een Oliewenboom. Eena aun de rajchte un eena aun de linkje Sied. 4Un ekj säd to däm Enjel, dee met mie räd: Waut bediet dit, mien Har? 5Un de Enjel säd to mie: Weetst du nich waut dise sent? Un ekj säd: Nä, Har.
6Un hee säd to mie: Dit es waut de Har, dee aules rejieet, sajcht: Nich met Macht, un nich met Jewault, oba derch mienen Jeist, sajcht de Har, dee aules rejieet. 7Waut sent daut fa groote Boaj? Ver Serubabel woaren dee jlei sennen. Wan hee dän Koppsteen woat väabrinjen, woaren see schrieen: Wundascheen! Wundascheen! #Psa 122,6
8Dan jeef de Har mie uk noch dise Norecht: 9Serubabel haft dän Grunt jelajcht fa dit Hus, un hee woat daut uk foadich moaken. Dan woa jie weeten daut et de Har, dee aules rejieet, wia, dee mie schekjt. #Esra 3,8; 6,14-16; Sach 2,13.15 10Es doa wäa, dee eenen kjlienen Aunfank veachten woat? De Lied woaren fa Freid schrieen wan see Serubabel seenen woaren, woo hee aules to lood moakt. Dit sent däm Harn siene säwen Uagen, dee äwa de gaunze Ieed noseenen. #Hag 2,3; Sach 3,9; 4,7
11Dan säd ekj to am: Waut bedieden de twee Oliewenbeem, eena aun de rajchte un eena aun de linkje Sied vom Laumpenhoola? 12Un ekj fruach uk noch: Waut bedieden de twee Asta aun de Oliewenbeem, von woone de twee goldne Ruaren daut Eelj leiden? 13Un hee säd to mie: Weetst du nich? Un ekj säd: Nä, ekj weet nich. 14Dan säd hee: Dit sent de twee, dee enjesaulft sent däm to deenen, dee Har äwa de gaunze Ieed es. #Sach 6,5; Opb 11,4
Currently Selected:
Sacharja 4: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
