Sacharja 5
5
6 De Buakroll
1Aus ekj wada oppkjikjt, sach ekj eene Buakroll flieejen. 2Un de Enjel säd to mie: Waut sitst du? Un ekj säd: Ekj see eene Buakroll flieejen. Un dee es tieen Meeta lank un fief Meeta breet. 3Un hee säd to mie: Opp dise Buakroll es de Strof jeschräwen, dee äwa daut gaunze Launt steit. Aun eene Sied sajcht daut, daut aul dee, dee jestolen haben, woaren wajch jeschekjt woaren, un aun de aundre Sied sajcht daut, daut aul dee waut en äaren Eit lieejen, woaren wajch jeschekjt woaren. 4Ekj woa de Buakroll romschekjen, un dee woat en jieda Stäla sien Hus nengonen, un en jieda eenem sien Hus, dee nich sien Wuat helt, wan hee en mienen Nomen een Eit moakt un dän nich helt. Un dee woat en daut Hus bliewen, bat jieda Steen un jieda Stekj Holt tonicht jebrocht es worden en daut Hus, sajcht de Har, dee aules rejieet.
7 De Fru en de Tonn
5Dan kjeem noch emol de Enjel no mie, dee met mie jerät haud, un dee säd: Kjikj emol opp, un kjikj emol waut nu kjemt. 6Un ekj säd: Waut es daut? Un hee säd: Dit es eene Tonn waut doa kjemt. Dit es de Sind von daut gaunze Launt. 7Un aus ekj soo kjikjt, sach ekj daut Dakjsel, daut von Blie jemoakt wia, wort oppjehowen. Un en de Tonn saut een Frumensch. 8Un de Enjel säd: Daut es daut gottloose. Un hee schoof ar trigj en de Tonn nenn un däwad daut Dakjsel doa nopp. 9Un aus ekj soo oppkjikjt, brocht de Wint twee Frumenschen, dee jieda soone Flichten, aus een Storch hauden, un dee hoowen de Tonn huach opp. 10Un ekj säd to däm Enjel: Wua woaren see de Tonn hannämen? 11Un hee säd: Dee nämen dee no Schinar, un doa woaren see een Hus buen fa daut, toom aundenkjen. Wan daut reed es, woaren see daut doa hanstalen. #1Mo 11,2
Currently Selected:
Sacharja 5: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.