Lucas 11

So Jesús dapaxaguenataxanec da atamnaxac

(Mateo 6.9-15; 7.7-11)

1Huo'o so na'a'q, nache So Jesús hueta'a so 'alhua da natameetac. Qaq co'ollaq imat da natamnaxac, nache huo'o so 'oonolec lapaxaguenatac dequiguiỹo'ot Somaye, 'eeta':

–'Am Qarataxala' qomi' 'auapaxagueneque taxa da qanatamnaxac, 'eeta'am da 'eetec so Juan co'ollaq ỹapaxague'n soua lapaxaguenataqa.

2Nache So Jesús 'enapeco':

–Da ivita da qanatamñi, qalaq qoñiita':

«'Am Qarta'a maye qoneto'ot na piguem,

'enauac qome da 'am qaỹauatton da

'am 'oonolec maye 'Aro'onatac 'Enauacna.

Ña 'auanac yaqto' 'am 'oonolec da 'am Qarta'a,

3Ñaq qomi' 'aỹa'anema na na'a'q cam

sacheguenaq maye seuenaqtac.

4Qataq 'auapalaxat nam qarasouaxashetpi,

'eeta'ama qomi' da mashe sapalaxataq

'enauac nam qomi' qaỹo'oteque qauem.#11.4 'Eeta'ama qomi' da mashe sapalaxataq 'enauac nam qomi' qaỹo'oteque qauem: Qaimeten ye Mateo 6.12.

Qataq da qomi' nvitalo ca qañe'eguenataguec,

nache saishet da qomi' 'auashenegueta da chegoqchigui camaye

da 'am qolaqa'ai.»

5So Jesús nataqa'en 'enapeco':

«Saloqnaxanaxa da huo'otaq huo'o ca 'oonolec da qoñiita, huo'o ca nauochaxaua. Nache da mashe laiñi na pe da nqo'ona, nache 'enapega, 'eeta': ‹'Am ỹaqaỹa, 'auauo'o qome ca ỹa'aalec nallec. 6Ten, huo'o ñi ñauochaxaua nvireua'a ye ima', chegoqtauec. Qaq qaica ca anoq da sequia'axan ñimaye.› 7Qaq nataqa'en saloqnaxanaxa da que'eca pa'atauo da ỹasat, 'eeta': ‹¡Saishet da aỹem sa 'aualemaxat! Ten, ñi lasom mashe sapotagui, qataq na ỹalaqpi nataqa'en aỹem mashe ñenanaqtai'. Qaq ỹoqo'oye saishet da soosheguem da huo'o ca 'am sami' ca nallec.›

8Qaq da que'eca lỹa da sa nañaxaañi da lỹaxanaxac, nache que'eca pa'atauo ỹami' ca iueetaique camaye. Qalaxaye damaye saishet da naigui da souaxat da auochaxaua, nachaqrata da yaqto' saishet da huo'o ca la'aloxo da ỹauaachigui na shiỹaxauapi.

9Ỹoqo'oye qami' shenapegalo nagui: Qauỹaxañiỹot Ñim Lo'onatac 'Enauacna, qaq Ñimaye qami' ỹanema cam qauỹaxañiitaique, qautaqỹapegue' Ñimaye, nache qauanachiỹa cam qanmichiitaique, qautoqñiiua'a ca lasom, yaqto' qami' qanauategueta. 10Cha'aye cam pi'iỹa'a Ñim Lo'onatac 'Enauacna, nache ỹaconeguet cam iỹaxaataique, qataq ỹanata cam nmittaique, qataq da deỹaxan qalaq qaiqoche'eguet.

11¿Huo'o peta'a ca 'oonolec da qoñiita da ỹami' ca llalec ca na'araxanaq da iỹaxanaique ca nỹaq? 12¿Huo'otaq ỹami' peta'a ca pe'elaqtoic da camaye iỹaxanaique ca 'olgaxa lco'oue'? 13Qami' matem qami' qauemaiqa, qalaq qauaỹaañi da qaỹa'añim ca no'on ca qaỹa'alqui, qaq ¿hua'ago' da saq ỹactec ñi Qarta'ai maye Lo'onatac 'Enauacna maye neto'ot na piguem da ishet da ỹanem So Saqcha'a Na'añaxac Qui'itta cam iỹaxanot Ñimaye?»

So Jesús qoỹeetega huo'o ca netaigui saqcha'a na'añaxac leguemaxaic

(Mateo 12.22-30; Marcos 3.19-27)

14So Jesús ỹo'orauec so saqcha'a na'añaxac leguemaxaic maye qaicaua naua la'aqtaqa naqa'en so ỹale. Qaq co'ollaq mashe huenoxonec so ne'ec, nache ishet da detaqa som qaicaua naua la'aqtaqa.

Nache so shiỹaxauapi ỹataqta huo'o da la'aalaxa de'era. 15Qalaxaye somayepi huo'o na 'enapec: «De'era Jesús ỹo'ottapeguec na saqcha'a na'añaxac leguemaxaicpi maye netaigui na shiỹaxauapi, cha'aye som Beelzebú maye lataxala' nam saqcha'a na'añaxacpi, nacheso so ỹami' da la'añaxac da ỹo'ot de'era.»

16Qataq huo'o na choche ỹauotaique da ỹe'eguen So Jesús. Ỹoqo'oye iỹaxaatacot da ishet da ỹo'ot ca na'anec maye sa qaỹauanapega da ỹachaxan da Somaye 'eesa da lamaxashec Ñim Lo'onatac 'Enauacna. 17Qaq So Jesús co'ollaq noma de'era lhuennataxac somayepi, nache 'enapega, 'eeta':

Ca shiỹaxauapi maye hueta'a ca 'alhua da huo'otaq maiche npa'aguena't, nache camayepi nataqa'en taỹa'a da nlaguiñi, qataq ca nhuo' le'ecpi da maiche npa'aguena't, nache camayepi nataqa'en taỹa'a da nlaguiñi. 18Qaq nache 'eetec nataqa'en so pa'aguenataxanaxaic da maiche npa'agueela't, nache maiche nlaxaañi da lo'onataxanaxac. Qami' qoñiitega da Aỹem so'otteguec na ne'ecpi leguemaxaicpi da so'otaxaatega da la'añaxac so pa'aguenataxanaxaic. 19Qaq da 'eesa de'era, nache ¿negue't ca ỹami' da la'añaxac na qarapaxaguenataqui da yaqto' ỹo'orauec na saqcha'a na'añaxac leguemaxaic? Da qami' da qoñiỹapec da chegoqo'ot Ñim Lo'onatac 'Enauacna de'era na'añaxac, nache damaye ỹachaxan da ỹoqta 'eesa da qausomiỹapec. 20Qaq Aỹem da so'orauec nam saqcha'a na'añaxac leguemaxaicpi da so'onataxana da la'añaxac Ñim Lo'onatac 'Enauacna, nache damaye ỹachaxan de'era lo'onataxanaxac Ñimaye da mashe hueta'a ne'ena.

21Ỹataqta lta'araic da lqalaic da qaicachigui ca lma' ca ỹale 'añaxaic qataq ỹataqta na'atchiguiñi na lo'ogoxonaxat. 22Qalaxaye da huo'o ca lỹa ỹale napacalec da la'añaxac camaye, nache loxonec, nache deuotaxanec 'enauac na lo'ogoxonaxatpi maye nteetacot. Ime, nache ỹanoigui na nauochaxauapi.

23Qami' da saishet da qauaỹamaxayiñi da so'ottac, nache qami' Aỹem qauataiỹa'aguet. Qataq da saishet da Aỹem qautauañi da qanaviquiiuo ca lỹa shiỹaxaua da Aỹem quegue, nache qami' 'eeta'am da Aỹem qauo'otaxañiiteguelec.

So saqcha'a na'añaxac leguemaxaic maye ñe'eguelaxa so lma'

(Mateo 12.43-45)

24So saqcha'a na'añaxac leguemaxaic da ivita da ca'ai ca shiỹaxaua, nache jec, netalec ca toolec 'alhua, nmittaique ca nmataqa'. Qaq da huo'otaq saishet da ỹanata, nache deuennataxan, 'eeta': «Aỹem no'on da she'eguelaxa ñi ima' maye sachegoqtoigui caillaye, nache she'eguelaxaigui.» 25Qaq da ivireua'a, nache ilalec da qui'itta qataq qaỹaỹamaxatchiguiñi. 26Nache ỹe'eguelaqtec da ỹe'eguena'alo soua lỹa't siete maye ỹactrec da qauema, nache 'enauaque soomaye taiguilo que'eca shiỹaxaua. Huaña, nache camaye ỹactec da aloic, saq 'ena'am so hua'auchiguiñi co'ollaq netaigui so 'oonolec.

Nam ỹoqta 'eesa da huo'o da lamaxayec

27Qaq co'ollaq ña ỹa'axattac de'era So Jesús, nache nvireuo aso 'alo, nache ỹa'alaxalec Somaye, 'eeta':

–¡Ỹataqta machiguiñi acam 'alo maye 'am deco'oic co'ollaxa, qataq 'am illepaxaatac!

28Qalaxaye So Jesús 'enapeco':

–¡Ỹactec da machiguiñi na shiỹaxauapi maye na'axaỹaxaatega da la'aqtac Ñim Lo'onatac 'Enauacna qataq ỹalaxaguet!

Qaiỹaxaatacot So Jesús da ỹo'ot ca na'anec maye sa qaỹauanapega

(Mateo 12.38-42; Marcos 8.12)

29Qalota so shiỹaxauapi nquigueuo da na'axaỹaxana So Jesús, nache Somaye 'enapeco':

–«Qami' Aỹem qavi'iguiñiitac da Aỹem qauỹaxañiitacot da so'ot ca na'anec, qalaxaye qami' qauemaiqa qataq saishet da huo'o ca qarpi'iỹaxaqui Ñim Lo'onatac 'Enauacna. Qaq 'oonolec da na'anec maye qami' sanema, damaye nachera dam huaigui co'ollaxa so Jonás. 30Qaq dam 'eetec somaye co'ollaq la'anaxat nam shiỹaxauapi maye lma' ye 'amaqtaqaic nỹecpi ye Nínive, qaq nachera qome nataqa'en da 'eetec Aỹem Shiỹaxaua Llalec da Aỹem la'anaxat na shiỹaxauapi maye huetaigui ne'ena na'a'q.

31Aso nate'e#11.31 Aso nate'e: Asomaye late'e na netaña ye 'alhua Sabá; yem pa'aỹa'ague da taguiñi ye 'alhua Arabia. maye netaña ye 'alhua na'ague da taguiñi, asomaye nachaañi qom ivita da qanmit 'enauacna, nache detaqa da qami' dataỹa'agueta da yaqto' Ñim Lo'onatac 'Enauacna ỹauo'o ca qanhuaxanaguiiqui. Cha'aye asomaye ỹataqta qaỹoqtegue co'ollaxa da chegaqa'ague da naỹa, da na'axaỹaxanalo naua ỹaanaxanaxaiqa lapaxaguenataxanaxaco so nta'a Salomón. Qalaxaye qami' saishet da qauaỹamaxayiñi da qana'axaỹaxañiỹalo naua ỹapaxaguenataxanaxaco, na'aictaxa da Aỹem ñapacalec so Salomón. 32Que'eca pa'atec na'a'q qom qanmit 'enauacna, nache nataqa'en so shiỹaxauapi lma' ye Nínive, nachaañi qome da qami' dataỹa'agueta. Cha'aye se'eso shiỹaxauapi naralaxat da lataxac co'ollaq hua'axaỹa da la'aqtaxanaxac so Jonás. Qalaxaye qami' qaua'aqaitega da itaxaỹaxac, qalaq saishet da qanaralaxache da qarataxaqui, na'aictaxa da ñapacalec da la'amaqchec so Jonás.»

Aca ncoỹaraxanaxaqui maye icoỹarelec ca shiỹaxaua

(Mateo 5.15; 6.22-23)

So Jesús nataqa'en 'enapeco':

33Qaica ca ishet da ỹegueua'a aca ncoỹaraxanaxaqui, ime, nache ỹoxooñi, huo'otaq da ỹano'ot na pa'aguiñi ca naretaxanaxala'. Nachaqrata da ỹatcheguem acamaye, yaqto' da huo'o ca pa'aigui ca nỹec, nache yo'oqchiguiñi. 34Naua la'ai'te ca shiỹaxaua, 'eeta'ama aca ncoỹaraxanaxaqui da icoỹarelec da lo'ocỹaxac. Qaq ỹoqo'oye, da lmeenaxanaxac da huesota qataq nvirauec da lauotaxanaqtaic, nache da yo'oqchiguiñi taigui da nachaalataxac. Qalaxaye da naua la'ai'te da quiỹaxanaqtaqaiqa qataq nvirauec da ño'oxonnaxac, nache da nachaalataxac ỹataqta imauec da napalñi. 35Qaq ỹoqo'oye maxatchoxo' qome, saishet da qauo'omaxache dam yo'oqchiguiñi maye huetaigui da qanachaalataxaqui. 36Cha'aye da 'enauac da qaro'ocỹaxaqui da yo'oqtelec, qataq qaica ca huaña da napaltalec, nache da qanachaalataxaqui qaỹoqtegue na le'eraxa, 'eeta'am aca ncoỹaraxanaxaqui da 'eroigui.

So Jesús iviraxattega so fariseopi qataq som napaxaguenataxanaqpi

(Mateo 23.1-36; Marcos 12.38-40; Lucas 20.45-47)

37Qaq co'ollaq mashe imat da ltaxaỹaxac So Jesús, nache huo'o so 'oonolec maye ỹalectaigui na fariseopi ỹayena'a Somaye da lquia'axaua ca lma'. Nache So Jesús jec, ime, nache nso'ooñi datalec ca nquia'axala'. 38Nache so fariseo ỹataqta huo'o da la'aalaxa co'ollaq ỹauaachigui So Jesús da saishet da iỹoi' naua lhua'q co'ollaq huotaique da deque'e'. 39Qalaxaye So Jesús 'enapeco':

–Qami' fariseopi qauỹoitac na pa'auec, qalaxaye na pa'auo da qoñiita ỹataqta qauem, qaica ca qautauañi, nachaqrata da qaucacheetacot na shiỹaxauapi. 40¡Ỹataqta saqco' peta'a ca qauaỹaañiỹapec! Ñim Lo'onatac 'Enauacna ỹo'ot na pa'auec qataq na pa'auo. 41Qaq dam ỹataqta ỹaỹamaqchiguiñi lataxac qataq 'eesa da qui'itta, damaye nachera da ñi 'oonolec detaunaxanot ca hueto'ot, da itauan na choxoraqpi.

42¡Ỹataqta qauem da qa'aita'ague! Cha'aye ỹataqta lta'araic da qarhuogoqoi da qaỹa'añiỹot Ñim Lo'onatac 'Enauacna añi 'oonole ana diez anam qa'añiguishe maye huo'o ana ala, qataq na menta qataq ana ruda maye qanqache da qauachegoxochiỹalec na qa'anaxanaqa'ai. Qalaxaye qami' saishet da no'on da qarataxaqui da qoñiitaigui na shiỹaxauapi, qataq saishet da qauauochec Ñim Lo'onatac 'Enauacna. Qaỹa'añim Ñim Lo'onatac 'Enauacna añi 'oonole ana diez 'enauac ana qarachetaqtaxanaqche, qalaxaye iuen da saishet da qaỹa'axañiiuec da qarauotaxanaqtaiqui Ñim Lo'onatac 'Enauacna qataq da no'on qarataxaqui.

43¡Ỹataqta qauem da qa'aita'ague qami' fariseopi! Qami' naxa da qa'aiua'a añi napaxaguenaxaqui na judiopi, nache qarqopitaxache naxa da qami' qaỹaỹamaxatte' da qoñiita'am na shiỹaxauapi maye 'amaqtaqaicpi. Qataq qarqopitaxache naxa da huaña ye menaqa', da na shiỹaxauapi qami' iqui'n qalaq lta'araic da 'enec naqa'en da qoñiita.

44¡Ỹataqta qauem da qa'aita'ague! Cha'aye qami' qoñiita'am acam huachiqui maye sa qaila'a,#11.44 Huachiqui maye sa qaila'a: Se'eso na'a'q na namaxasoxonaxacpi maye lalamaxat na judiopi, ỹa'axat da cam ipoteua'a ca leuaxaic, huo'otaq aca huachiqui, nache camaye qaỹamata'ac da nshepaxan da datato'ot Ñim Lo'onatac 'Enauacna, qataq saishet da ỹalegoigui na laỹepi da ỹo'oxoren Ñimaye. nache na shiỹaxauapi petapeguelec.

45Nache huo'o som 'oonolec nam dapaxaguenataxaatapeguec na namaxasoxonaxacpi 'enapega So Jesús, 'eeta':

–'Am Napaxaguenataxanaq, 'enauac na 'anasaxauec maye talec 'anqa'en na fariseopi, nataqa'en ivira'alo qomi' da qomi' inogoqche't.

46Nache So Jesús 'enapeco':

–¡Ỹataqta qauem da qa'aita'ague nataqa'en qami'! Cha'aye qauauo'oi na namaxasoxonaxacpi maye ỹataqta huo'o da lqalaic da qaipaqueelec, qalaxaye saishet da cara'acolec da qauauo'oi ca qana'añaxataxaqui da qaupaquiitelec namayepi.

47¡Ỹataqta qauem da qa'aita'ague qami' maye qano'oxoñeetapiguisheguem ana nhuachiquipi som la'aqtaxanaxanecpi Ñim Lo'onatac 'Enauacna maye ỹalauat co'olloxocheye som hua'au qarta'ailpi! 48Qaq de'era qauo'oche nachera da yo'oq da qami' ỹataqta qauaỹamaxayiñiita dam ỹo'ot som qarta'ailpi. Cha'aye som qarta'ailpi ỹalauat som la'aqtaxanaxanecpi Ñim Lo'onatac 'Enauacna, qaq nagui qami' qalaq qano'oxoñeesheguem ana nhuachiquipi.

49Qaq ỹoqo'oye Ñim Lo'onatac 'Enauacna maye ỹaanaxanaxaic, huo'o da la'aqtac co'ollaxa da qami' ỹa'axatta'agueta 'enapeco': «Aỹem qami' samaxalo qome ca ỹa'aqtaxanaxanecpi qataq ỹamaxashecpi, qalaxaye huo'o na qaualauache, qaq ca laỹepi qalaq qaucañiitac, qaviraxachiỹalo naua lỹa't 'aleu'.» 50Qaq 'era da 'eetec da qami' qarasouaxashechi 'enauac da l-leuaxa som la'aqtaxanaxanecpi Ñim Lo'onatac 'Enauacna ana 'alhua, 51chegoqchiguiña co'ollaxa da l-leuaxa so Abel, choche ivitta'a da nalaataguec so na'aqtaxanaxanec Zacarías, som qaỹalauat co'ollaq vichiguingui ye laiñi añi no'onaxanaxaqui late'erai yem naña añi nca'atoxonaxalate. Qaq ỹoqo'oye ỹataqta 'eesa de'era qami' sa'aqtaxanema, da 'enauac da qoñiita huo'o ca qanhuaxanaguiiqui souaxat de'era nleuaxa somayepi.

52¡Ỹataqta qauem da qa'aita'ague qami' maye qauapaxaguenataxañiiteguec na namaxasoxonaxacpi! Cha'aye qami' ỹataqta qauaỹachiñiita da naigui da 'eetec da qaỹauatton Ñim Lo'onatac 'Enauacna, qalaxaye qaica ca qauo'oche cam ỹachaxan da 'eesa da qauauattoñiita Ñimaye, ivira'a da sa qauashiñim nataqa'en da huo'o ca lỹa maye huotaique ỹauatton Ñimaye.

53Qaq co'ollaq ca'ai so nỹec So Jesús, nache ca'attague' Somaye nam dapaxaguenataxaatapeguec nam namaxasoxonaxacpi qataq nam ỹalectaigui na fariseopi, nache qalota na lnataxanaxacpi. 54Qalaxaye choche ỹe'egueetac So Jesús, saiuena'a da huo'otaq huo'o ca nasaxauec la'aqtac sa ỹaỹamaxañi, qaq nacheca chegoqchigui naqa'en da huo'o ca ỹasaxalec lasouaxashet.

Currently Selected:

Lucas 11: LÑLE13

Highlight

Copy