Mark 10
10
1Jedus lef dey an gone ta Judea lan. Den e cross oba de Jerden Riba. Plenty plenty people geda roun um gin dey. An e laan um bout God, same like how e done beena do.
2Some Pharisee dem come quizzit um. Dey beena try fa ketch um da taak ginst God Law. Dey aks Jedus say, “Coddin ta we Jew Law, e right fa man fa worce e wife?”
3Jedus aks um say, “Wa de Law wa Moses gii oona chaage oona fa do?” 4De Pharisee dem ansa Jedus say, “Moses say a man kin write paper fa gii ta e wife fa worce um. Den de man kin sen um way.”
5Jedus tell um say, “Moses write dat law fa oona cause oona haat haad. 6Bot fom wen e fus mek de wol, ‘God mek two kind ob people, man an ooman.’ 7Cause ob dat, de man gwine lef e fada an e modda an jine wid e wife, 8an dem two gwine come fa be one poson. So dey ain two poson no mo. Dem two done come fa be one poson. 9So den, wen God done jine dem togeda, mus dohn nobody tek dem paat fom one noda.”
10Now wen Jedus an e ciple dem gone back eenta de house, e ciple dem aks um bout wa e been say bout worce. 11E ansa um say, “Ef a man worce e wife an den e go marry oda ooman, dat man sin ginst e fus wife, cause e da sleep wid oda ooman. 12Same way so, ef a ooman worce e husban an den e go marry oda man, dat ooman sin ginst e fus husban, cause e da sleep wid oda man.”
Jedus Bless De Chullun
Matthew 19:13-15; Luke 18:15-17
13Some people come bring chullun ta Jedus fa hab um pit e han pon dey head fa bless um. Bot e ciple dem buke de people, tell um dey ain oughta bodda Jedus so. 14Wen Jedus see wa e ciple dem beena do, e been mad down. E tell e ciple dem say, “Oona mus leh de chullun come ta me. Mus dohn stop um, cause people like dem chullun yah gwine be wid God wen e da rule. 15A da tell oona de trute, anybody wa ain wahn fa hab God rule oba um same like dem chullun, dat poson dey ain gwine be wid God wen e da rule.” 16Den Jedus pick op de chullun, an e pit e han pon dey head an aks God fa bless um.
De Rich Man
Matthew 19:16-30; Luke 18:18-30
17Wiles Jedus beena gwine way, one man ron meet um an kneel down fo um. E tell Jedus say, “Teacha, ya wa good, tell me wa A haffa do fa git life wa neba end?”
18Jedus ansa um say, “Hoccome ya say A good? Ain nobody good cep fa God. 19Ya know de law wa Moses gii. ‘Ya mus dohn kill nobody. Ya mus dohn sleep wid oda man wife. Mus dohn tief. Mus dohn lie bout wa oda people done. Mus dohn cheat. Mus pay mind ta ya fada an ya modda.’ ”
20De man ansa say, “Teacha, A done keep all dem law eba since A been a chile.”
21Jedus look pon de man an e like um. An e tell um say, “Jes one ting lef wa ya ain done yet. Mus go sell all ya hab an gii de money ta de people wa ain hab nottin. Ef ya do dat, ya gwine be rich fa true een heaben. An atta dat, ya mus come be me ciple.” 22Wen de man yeh wa Jedus say, e look sad. E been too saary, cause e been hab a whole heapa money. E lef Jedus an gone way.
23Jedus look roun pon e ciple dem, tell um say, “E sho nuff haad fa a rich poson fa come onda God rule!”
24De ciple dem been stonish wen Jedus say dat. Bot Jedus tell um gin say, “Me chullun, e sho nuff haad fa a rich poson fa come onda God rule. 25E mo easy fa mek de camel go shru a needle eye den fa a rich poson fa come onda God rule.”
26Den de ciple dem been eben mo stonish. Dey aks one noda say, “Ef dat so e stan, ain nobody gwine be sabe, ainty?”
27Jedus look pon um an say, “God able fa do wa people ain able fa do. God able fa do all ting.”
28Peter tell Jedus say, “Look yah, we done lef ebryting an folla longside ya!”
29Jedus ansa say, “A da tell oona fa true, de poson wa done lef e house or broda or sista or modda or fada or chullun or propaty fa sake a me an de Good Nyews, 30God gwine gim hundud time mo den wa e done lef. E gwine gim house, broda, sista, modda, chullun an propaty. God gwine gim now wiles e da lib yah een dis wol. An people gwine mek um suffa bad yah, bot God gwine gim life wa neba end, een de wol wa gwine come. 31Bot plenty wa fus now, dey gwine be las, an plenty people wa las now, dey gwine be fus.”
Jedus Say Gin E Gwine Dead
Matthew 20:17-19; Luke 18:31-34
32Wiles dey beena trabel long de road ta Jerusalem, Jedus waak een front ob e ciple dem. Dey been stonish tommuch. An de people wa beena come long wid um been scaid. Jedus call e ciple dem ta one side an tell um gin bout wa gwine happen ta um. 33E say, “Oona listen ta me. We da gwine ta Jerusalem, weh some people gwine grab hole ta de Man wa Come fom God. Dey gwine han um oba, gim ta de Jew priest leada dem an de Jew Law teacha dem. Den dey gwine han um oba ta people wa ain Jew fa kill um. 34Dem people gwine hole um cheap. Dey gwine spit pon um, whip um an kill um. Bot atta shree day, e gwine come out fom mongst de dead people an lib gin.”
Wa We Mus Do Fa Be Big Leada Wen Jedus Rule
Matthew 20:20-28
35James an John, wa been Zebedee chullun, come ta Jedus say, “Teacha, we wahn ya fa do sompin dat we gwine aks ya fa.”
36Jedus aks um say, “Wa dat oona wahn me fa do fa oona?”
37Dey ansa um say, “Wen ya gwine rule all de wol een glory, leh we seddown nex ta ya, one ob we pon ya right han side an de oda one pon ya lef han side.”
38Jedus say, “Oona ain ondastan wa oona da aks me fa do. Oona gwine be able fa suffa wid me, fa drink fom de cup wa A gwine drink fom? Oona gwine be able fa dead wid me, fa be bactize like A gwine be bactize?”
39Dey ansa say, “We gwine be able fa do um.”
Jedus tell um say, “Fa true, oona gwine drink fom dat cup wa A gwine drink fom, an oona gwine be bactize same like how A gwine be bactize. 40Bot A ain hab de tority fa leh oona seddown pon me right han side an pon me lef han side, wen A gwine rule. God done keep dem place fa de people wa e done pick fa seddown dey.”
41Wen de oda ten ciple yeh bout dat, dey been too bex at James an John cause ob wa dey been aks Jedus fa do fa um. 42Jedus call um all togeda an tell um say, “Oona know bout de leada dem wa spose fa rule oba de people dey een de wol. Dem leada hab powa oba de people an da tell dem wa fa do. 43Bot e ain gwine be dat way mongst oona. Ef one ob oona wahn fa be de head poson, e mus be oona saabant. 44Ef one ob oona wahn fa be fus, dat poson mus be ebrybody slabe. 45Cause eben de Man wa Come fom God ain come fa mek people e saabant. E come fa be de people saabant, an fa gii e life fa pay de price, fa sabe a whole heapa people.”
Jedus Mek Bline Eye Bartimaeus See
Matthew 20:29-34; Luke 18:35-43
46Jedus an e ciple dem come ta Jericho. Wen dey been lef Jericho long wid a whole bunch ob oda people, one bline eye man name Bartimaeus beena seddown close by de road, da beg. E been Timaeus chile. 47Wen Bartimaeus yeh say dat Jedus wa come fom Nazareth beena pass by dey, e staat fa holla say, “Jedus, Son ob David, hab mussy pon me!”
48Plenty ob de people buke Bartimaeus, tell um mus dohn crack e teet. Bot e da holla mo louda say, “Son ob David, hab mussy pon me!”
49Jedus stop, tell de people say, “Call um fa come yah.”
So de people call ta Bartimaeus de bline eye man, say, “Study yasef! Git op! Jedus say come yah.”
50Bartimaeus shrow off e coat off. E hop op an gone ta Jedus.
51Jedus aks um say, “Wa ya wahn me fa do fa ya?”
De bline eye man say, “Teacha, A wahn ya fa mek me so dat A kin see.”
52Jedus say, “Ya kin go pon ya way now. Cause ya da bleebe, ya done git well.”
Nex ting e know, Bartimaeus able fa see. An e waak wid Jedus down de road.
Jedus Go Eenta Jerusalem
Matthew 21:1-11; Luke 19:28-40; John 12:12-19
Currently Selected:
Mark 10: gul
Highlight
Share
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. All rights reserved.
