Ioane 4
4
O Iesu ma le Fafine Samaria
1‘Ua silafia e le Ali‘i ‘ua fa‘alogo le ‘au faresaio, e to‘atele so‘o ‘ua faia e Iesu ma papatisoina, ‘ae to‘aitiiti a Ioane; 2(peita‘i o Iesu, e le‘i papatiso e ia, na o ona so‘o,) 3‘ona tu‘ua lea e ia o Iutaia, a ‘ua toe maliu atu i Kalilaia. 4E ao ‘ina ui atu o ia i Samaria.
5‘Ua o‘o atu o ia i le tasi ‘a‘ai o Samaria, o Sukara le igoa, e latalata ane i le fanua na avatu e Iakopo i lona atali‘i o Iosefa.#Kene 33.19; Iosu 24.32 6‘Ua i ai le vaipuna o Iakopo. ‘Ua lē lavā fo‘i Iesu i lana malaga, ‘ona nofo ai lea o ia i luga o le vai, ‘ua o‘o po o le tu tonu o le lā.
7‘Ua sau le fafine Samaria e utu vai. ‘Ua fetalai atu Iesu ‘iā te ia, “‘Aumai ia ‘iā te a‘u, se‘i ‘ou inu.” 8(Auā ‘ua ō atu ona so‘o i le ‘a‘ai e fa‘atau ai ni mea e ‘ai.)
9‘Ona fai mai lea o le fafine o Samaria ‘iā te ia, “Pe fa‘apefea ‘ona e fai mai i se mea e inu ‘iā te a‘u, o le fafine o Samaria, a o oe o le Iutaia? auā e leai ni mea e fe‘avea‘i a Iutaia ma Samaria.”#Esera 4.1-5; Nee 4.1-2
10‘Ua tali atu Iesu, ‘ua fa‘apea atu ‘iā te ia, “‘Ana e iloa le mea foa‘i fua a le Atua, ma lē ‘ua fai atu ‘iā te oe, ‘‘Aumai ‘iā te a‘u, se‘i ‘ou inu;’ pe ‘ua e ole mai ‘iā te ia, ‘ona foa‘i atu lea e ia ‘iā te oe o le vaiola.”
11‘Ua fai mai le fafine ‘iā te ia, “Le Ali‘i e, e leai sa‘u mea e asu a‘e ai, e maulalō fo‘i le vai‘eli; ‘e te maua ‘ea ifea lenā vaiola? 12E sili ‘ea oe i lo matou tamā o Iakopo, na tu‘u mai e ia ‘iā te i matou le vai‘eli, ‘ua inu ai fo‘i o ia, ma lana fānau, ma ana manu?”
13‘Ua tali atu Iesu, ‘ua fa‘apea atu ‘iā te ia, “O lē inu i lenei vai e toe fia inu o ia.#Ioane 6.58 14A o lē e inu i le vai ‘ou te avatu ‘iā te ia, e lē toe fia inu o ia e fa‘avavau; a o le vai ‘ou te avatu ‘iā te ia, e ‘avea i totonu ‘iā te ia o le vaipuna, e puna i luga i le ola e fa‘avavau.”
15‘Ua fai mai le fafine ‘iā te ia, “Le Ali‘i e, ‘aumai ‘iā te a‘u lenā vai, ‘ina ‘ia ‘ou lē toe fia inu, ‘ina ‘ia ‘ou lē toe sau fo‘i ‘i‘inei e utu vai.”
16‘Ua fetalai atu Iesu ‘iā te ia, “Alu ia oe ma vala‘au i lau tane, i le toe sau ai ‘i‘inei.”
17‘Ua tali mai le fafine, ‘ua fa‘apea mai, “E leai sa‘u tane.”
‘Ona fetalai atu lea o Iesu ‘iā te ia, “‘Ua tonu lau ‘upu, ‘E leai sau tane;’ 18auā sa ‘iā te oe tane e to‘alima; o ia fo‘i ‘ua ‘iā te oe i ona po nei, e lē o sau tane lea; o le mea moni lava ‘ua e fai mai ai.”
19‘Ua fai mai le fafine ‘iā te ia, “Le Ali‘i e, ‘ua ‘ou iloa nei o oe o le perofeta,#1 Kori 14.24, 25; Ioane 9.17 20o matou tamā sa tapua‘i i lenei mauga; a ‘ua ‘outou fai mai; o Ierusalema le mea e tusa ai ‘ona tapua‘i ai.”#Teu 12.5; Sala 122.1-9
21‘Ua fetalai atu Iesu ‘iā te ia, “Funa e, talitonu mai ia ‘iā te a‘u, e o‘o mai ona aso, tou te tapua‘i i le Tamā e lē gata i lenei mauga, po o Ierusalema. 22Tou te tapua‘i ma le lē iloa; a ‘ua matou tapua‘i ma le iloa, auā mai ‘iā Iutaia le fa‘aolataga. 23‘Ae o‘o mai ona aso, ‘ua o‘o nei fo‘i i ai o ē tapua‘i fa‘amaoni latou te tapua‘i i le Tamā i le agaga ma le fa‘amaoni; auā o lo‘o sā‘ili le Tamā i ē tapua‘i fa‘apenā ‘iā te ia. 24O le Atua o le agaga lava ia; o ē tapua‘i ‘iā te ia, e tatau ‘ona tapua‘i atu ai i le agaga ma le fa‘amaoni.”#Roma 12.1; 2 Kori 3.17
25‘Ua fai mai le fafine ‘iā te ia, “‘Ua ‘ou iloa o le a maliu mai le Mesia,” (o lē ‘ua igoa ‘iā Keriso). “Pe a maliu mai o ia, e fa‘ailoa mai mea uma ‘iā te i matou.”
26‘Ona fetalai atu lea o Iesu ‘iā te ia, “O a‘u lava lenei, o lē tautala atu ‘iā te oe.”#Ioane 9.37; 10.25
27‘Ona ō mai lea o ona so‘o, ‘ua ofo ‘ina ‘ua talanoa o ia ma le fafine; ‘ae le‘i fa‘apea mai se tasi i le fafine, “Pe se a se mea ‘e te mana‘o ai?” pe fa‘apea atu ‘iā te ia, “O le a le mea ‘ua e talanoa ai ma ia?”
28‘Ona tu‘u lea e le fafine o lana vai, ‘ae alu atu i le ‘a‘ai, ‘ua fai atu i tagata, 29“‘Inā ō mai ia; ‘inā va‘ai i le tagata ‘ua ta‘u mai e ia ‘iā te a‘u o mea uma lava ‘ua ‘ou faia; pe lē o le Keriso ‘ea lea?” 30‘Ona latou ō ai lea i tua o le ‘a‘ai, ‘ua ō mai ‘iā te ia.
31A o fai lea mea, ‘ua ‘ai‘oi mai ona so‘o ‘iā te ia, ‘ua fa‘apea mai, “Rapi e, ‘inā taumafa ia.”
32A ‘ua fetalai atu o ia ‘iā te i latou, “O ‘iā te a‘u mea e ‘ai tou te lē iloa.”
33‘Ona fetautalatala‘i lea o le ‘au so‘o, “Pe na ‘aumai e se tasi sana mea e ‘ai?”
34‘Ua fetalai atu Iesu ‘iā te i latou, “O la‘u mea e ‘ai, ‘ia ‘ou faia le finagalo o lē na ‘auina mai a‘u, ma fa‘ai‘u lana galuega. 35Tou te lē fai ane ‘ea, ‘E toe fa masina, i le o‘o ai i le seleselegāsaito’; fa‘auta, ‘ou te fai atu ‘iā te ‘outou, ‘inā tepa a‘e ia o ‘outou mata, ma va‘ava‘ai i le fanua ‘ua sinasina mai nei i le seleselegāsaito.#Mata 9.37; Luka 10.2 36O lē selesele fo‘i, e maua lana totogi, ma fa‘aputu le fua e o‘o i le ola e fa‘avavau; ‘ina ‘ia fa‘atau ‘oli‘oli o lē lūlū saito ma lē selesele. 37O lenei mea fo‘i ‘ua fa‘amaonia ai le ‘upu, ‘‘Ese lē lūlū saito ‘ese lē selesele.’ 38‘Ua ‘ou ‘auina atu ‘outou e selesele i le mea sa ‘outou lē galulue ai; na galulue isi tagata, a ‘ua o‘o atu ‘outou i la latou galuega.”
39E to‘atele Samaria i lea ‘a‘ai na fa‘atuatua ‘iā te ia, ‘ona o le ‘upu a le fafine na ia fai atu ai, “‘Ua na ta‘ua mai ‘iā te a‘u o mea uma lava ‘ua ‘ou faia.” 40‘Ua ō mai fo‘i tagata o Samaria ‘iā te ia, ‘ona latou ‘ai‘oi mai lea ‘iā te ia, latou te nonofo ma i latou; ‘ona nofo ai lea o ia i lea mea i aso e lua.
41‘Ua atili ai ‘ona to‘atele o ē na fa‘atuatua ‘iā te ia ‘ona o lana fetalaiga; 42‘ua fai atu fo‘i i latou i le fafine, “E lē ‘ona o lau ‘upu ‘ua matou fa‘atuatua ai nei ‘iā te ia; auā o i matou lava ‘ua matou fa‘alogologo, ‘ua matou iloa fo‘i, e moni lava, o le Fa‘aola lenei o le lalolagi, o le Keriso lava.”#1 Ioane 4.14
‘Ua Fa‘amālōlō e Iesu le ma‘i o le Atali‘i o le Ali‘i Pule
43‘Ua mavae ia aso e lua, ‘ona tu‘ua ai lea e ia o lea mea, ‘ae maliu atu i Kalilaia; 44auā ‘ua fetalai lava Iesu, e lē mamalu se perofeta i lona lava nu‘u.#Mata 13.57; Mare 6.4; Luka 4.24 45‘Ua o‘o fo‘i o ia i Kalilaia, ‘ona talia mai lea o ia e tagata o Kalilaia, auā na latou va‘ai atu i mea uma lava na ia faia i Ierusalema i le tausamiga; auā o i latou fo‘i, na ō atu i latou i le tausamiga.#Ioane 2.23
46‘Ona toe maliu atu ai lea o Iesu i Kana i Kalilaia, na ia liua ai le suāvai ma uaina. O le tasi ali‘i fo‘i ‘ua ma‘i lona atali‘i i Kapanaumi;#Ioane 2.1-11 47‘ua fa‘alogo o ia ‘ua maliu mai Iesu mai Iutaia i Kalilaia, ‘ona sau ai lea o ia ‘iā Iesu, ma fa‘atoga mai ‘iā te ia, ‘ia maliu ifo e fa‘amālōlō i lona atali‘i, auā ‘ua tāli oti. 48‘Ona fetalai atu lea o Iesu ‘iā te ia, “‘Āfai tou te lē va‘ava‘ai i fa‘ailoga ma vāvega, tou te lē talitonu lava.”#Ioane 2.18; 1 Kori 1.22
49‘Ua fai mai le ali‘i ‘iā te ia, “Le Ali‘i e, se‘i ē maliu ifo, manū e le‘i oti si o‘u atali‘i.”
50‘Ona fetalai atu lea o Iesu ‘iā te ia, “Alu ia oe, ‘ua ola lou atali‘i.”
‘Ua talitonu le tagata i le ‘upu na fetalai atu ai Iesu ‘iā te ia, ‘ona alu ai lea o ia. 51O alu ifo o ia ‘ua fetaia‘i ma ana ‘au‘auna, ‘ona latou ta‘u atu lea ‘iā te ia, ‘ua fa‘apea atu: ‘Ua ola lou atali‘i.
52‘Ona fesili atu lea o ia ‘iā te i latou, po o le a le taimi na āfua ai ona fa‘afeoloolo.
‘Ua fai mai i latou ‘iā te ia, “Na mavae lava ananafi lona ma‘i vevela i le itūlā e tasi i le aoauli.”#4.52 aoauli: O le fa‘aliliuga tuai; afiafi 53‘Ona iloa lea e le tamā, o le taimi tonu lava lea na fetalai atu ai Iesu ‘iā te ia, “‘Ua ola lou atali‘i.” ‘Ona fa‘atuatua lea o ia, ‘atoa ma lona ‘āiga uma.#Luka 19.9; Galu 16.15, 31
54O le lua lea o fa‘ailoga na faia e Iesu, ‘ina ‘ua maliu mai o ia mai Iutaia i Kalilaia.#Ioane 2.11, 23
Currently Selected:
Ioane 4: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
