Ioane 6

O le Fafagaina e Iesu o Tagata i le Vao

(Mata 14.13-21; Mare 6.30-44; Luka 9.10-17)

1‘Ua mavae ia mea, ‘ona maliu atu lea o Iesu i le tasi itū o le vai o Kalilaia, o le vai lea o Tiperia. 2‘Ona mulimuli atu lea ‘iā te ia o le motu o tagata e to‘atele, auā na latou matamata i ona fa‘ailoga sa faia i ē na mama‘i. 3‘Ua maliu a‘e Iesu i le mauga, ‘ua nofo i lalo, o ia ma ona so‘o. 4‘Ua latalata le paseka, o le tausamiga lea o Iutaia. 5‘Ona tepa a‘e ai lea o Iesu ona fofoga, ‘ua silasila atu fo‘i, ‘ua ō mai ‘iā te ia le motu o tagata e to‘atele, ‘ona fetalai atu lea o ia ‘iā Filipo, “O ifea tatou te fa‘atauina mai ai ni areto, ‘ina ‘ia ‘a‘ai ai i latou nei?” 6‘Ua fa‘apea atu Iesu, o lana tofotofo ‘iā te ia; auā ‘ua silafia lava e ia le mea o le a na faia.

7‘Ua tali mai Filipo ‘iā te ia, “E lē lava areto, pe a fa‘atauina i tenari e lua selau, ‘ina ‘ia tofu ai i latou ma sina mea itiiti.”

8‘Ona fai mai lea ‘iā te ia o le tasi o ona so‘o, o Aneterea, o le uso o Simona Peteru, 9“O lo‘o ‘i‘inei le tama o ‘iā te ia areto karite e lima, ma nai i‘a iti e lua;#6.9 i‘a iti e lua po o i‘a iti e lua lau. ‘ae lē lava ia mea#6.9 ‘ae lē lava ia mea po o ‘ae auma ‘ea ia mea. i a‘i latou e to‘atele.”#2 Tu 4.42, 43

10‘Ona fa‘apea atu lea o Iesu, “‘Ia ‘outou fai ane ‘ia nonofo tagata uma i lalo.” E tele fo‘i le mutia i lea mea. ‘Ona latou nonofo ai lea i lalo o le tau aofa‘i o tane, pe lima o afe. 11‘Ona tago lea o Iesu i areto, ‘ua fa‘afetai, ‘ona tufatufa lea i ē o lo‘o nonofo. ‘Ua fa‘apea fo‘i ma i‘a, ‘ua avatu faitalia i latou. 12‘Ua mā‘o‘ona lava i latou, ‘ona fetalai ane lea o ia i ona so‘o, “‘Ia fa‘apotopoto toe ‘aiga, ne‘i i ai ni mea e māumau.” 13‘Ona fa‘apotopoto ai lea ‘ua tūtūmu ai ‘ato e sefulu ma le lua i toe ‘aiga o areto karite e lima, o mea ia na totoe i ē na ‘a‘ai.

14‘Ua iloa e tagata le fa‘ailoga na faia e Iesu, ‘ona fa‘apea lea o i latou, “E moni, o le perofeta moni lenei, lē maliu mai i le lalolagi.”#Teu 18.15 15‘Ua silafia fo‘i e Iesu, o le a ō mai i latou e pu‘e ‘iā te ia, ‘ina ‘ia latou faia o ia ma tupu, ‘ona toe maliu ‘ese ai lea o ia e to‘atasi i le mauga.

‘Ua Savali Iesu i Luga o le Vai

(Mata 14.22-33; Mare 6.45-52)

16‘Ua o‘o i le afiafi, ‘ona ō ifo lea o ona so‘o i le vai, 17‘ua ō a‘e fo‘i i le va‘a, ‘ona latou ō lea i Kapanaumi i le tasi itū o le vai. ‘Ua pouliuli fo‘i, ‘ae le‘i maliu atu lava Iesu ‘iā te i latou. 18‘Ua sousou fo‘i le vai i le matagi ‘ua agi tetele. 19‘Ua taualo i latou, pe tolu pe fa maila, ‘ona iloa atu lea e i latou o Iesu, o savali lava i luga o le vai, ‘ua latalata atu fo‘i o ia i le va‘a; ‘ua latou fefefe ai. 20A ‘ua fetalai atu o ia ‘iā te i latou, “O a‘u lava lenei; ‘aua tou te fefefe.” 21Sa latou fia talia o ia i le va‘a ‘ae o‘o atu loa le va‘a i le nu‘u ‘ua latou o i ai.

‘Ua Sā‘ili le To‘atele o Tagata ‘iā Iesu

22O le taeao ‘ua iloa ai e le motu o tagata ē na tutū i le tasi itū o le vai ‘ua leai se tasi va‘a i lea mea, na o lea na ō ai ona so‘o, e le‘i ō fa‘atasi fo‘i o Iesu ma ona so‘o i le va‘a, na o ona so‘o lava na ō ai; 23a ‘ua ō mai nisi va‘a nai Tiperia, e lata ane i le mea na latou ‘a‘ai ai, ‘ina ‘ua fa‘afetai e le Ali‘i.#6.23 O nisi fa‘aliliuga e lē maua ai: ‘ina ‘ua fa‘afetai e le Ali‘i. 24‘Ua iloa e le motu o tagata e le‘i i ai Iesu, e le‘i i ai fo‘i ona so‘o, ‘ona ō ai lea o i latou fo‘i i va‘a, ma ō atu i Kapanaumi, e sā‘ili ‘iā Iesu.

O Iesu o le Areto o le Ola

25‘Ua iloa o ia e i latou i le tasi itū o le vai, ‘ona fa‘apea mai lea o i latou ‘iā te ia, “Rapi e,#6.25 Rapi: mai le gagana Arama; “A‘oa‘o” po o le “Ali‘i pule.” na e maliu mai ‘ea ‘i‘inei anafea?”

26‘Ua tali atu Iesu ‘iā te i latou, ‘ua fa‘apea atu, “E moni, e moni, ‘ou te fai atu ‘iā te ‘outou, e le‘i sā‘ili mai ‘outou ‘iā te a‘u, auā na ‘outou va‘ai mai i fa‘ailoga, ‘ae peita‘i ‘ua ‘outou ‘a‘ai i areto, ma ‘outou mā‘o‘ona ai. 27‘Aua tou te galulue i mea e ‘ai e pala, a o mea e ‘ai e tumau i le ola e fa‘avavau, e foa‘iina atu ‘iā te ‘outou e le Atali‘i o le tagata; auā ‘ua fa‘aalitinoina mai o ia e le Atua le Tamā.”#Ioane 4.14; 5.36; Mata 16.12

28‘Ona fa‘apea mai lea o i latou ‘iā te ia, “Se a se mea matou te faia, ‘ina ‘ia matou galulue i galuega a le Atua?”

29‘Ua tali atu Iesu, ‘ua fa‘apea atu ‘iā te i latou, “O lenei le galuega a le Atua, ‘ia ‘outou fa‘atuatua ‘iā te ia ‘ua ‘auina mai e ia.”#1 Ioane 3.23

30‘Ona fa‘apea mai lea o i latou ‘iā te ia, “Se a se fa‘ailoga ‘e te faia matou te va‘ai atu i ai ma fa‘atuatua ai ‘iā te oe? Se a se galuega ‘e te faia?#Ioane 2.18; Mare 8.11 31Na ‘a‘ai e o matou tamā le manai i le vao, fa‘apei ‘ona tusia, ‘Na ia avatua ‘iā te i latou le areto mai le lagi e ‘a‘ai ai.’” #Eso 16.4, 15; Sala 78.24

32‘Ona fetalai atu lea o Iesu ‘iā te i latou, “E moni, e moni, ‘ou te fai atu ‘iā te ‘outou, e lē o Mose na avatu ‘iā te ‘outou lenā areto mai le lagi; peita‘i o lo‘u Tamā, na te avatu ‘iā te ‘outou le areto moni mai le lagi; 33auā o le areto mai le Atua, o le mea ‘ua alu ifo mai le lagi lea, ma ‘aumai le ola i le lalolagi.”

34‘Ona fai mai lea o i latou ‘iā te ia, “Le Ali‘i e, ‘aumai ‘iā te i matou lenā areto, e lē aunoa.”

35‘Ua fetalai atu Iesu ‘iā te i latou, “O a‘u nei le areto o le Ola; o lē sau ‘iā te a‘u, e lē fia ‘ai lava ia; o lē fa‘atuatua fo‘i ‘iā te a‘u, e lē toe fia inu lava ia.#Ioane 4.14; 6.48; 7.37 36‘Ou te fai atu ‘iā te ‘outou, ‘ua ‘outou va‘ava‘ai mai ‘iā te a‘u, ‘ae tou te le‘i fa‘atuatua mai lava. 37O i latou uma ‘ua foa‘iina mai ‘iā te a‘u e le Tamā, e ō mai i latou ‘iā te a‘u; o ia fo‘i e sau ‘iā te a‘u, ‘ou te lē tulia lava i fafo.#Ioane 17.6-8; Mata 11.28 38Auā ‘ou te le‘i alu ifo mai le lagi e fai lo‘u lava loto, a o le finagalo o lē ‘ua ‘auina mai a‘u.#Ioane 4.34; Mata 26.39 39O lenei fo‘i le finagalo o le Tamā o lē ‘ua ‘auina mai a‘u, ‘ia lē māumau lava se tasi ‘ua ia foa‘iina mai ‘iā te a‘u, a ‘ia ‘ou toe fa‘atūina o ia i le aso gata‘aga. 40O lenei fo‘i le finagalo o lē ‘ua ‘auina mai a‘u, ‘ia maua le ola e fa‘avavau e i latou uma o ē va‘ai i le Atali‘i, ma fa‘atuatua ‘iā te ia, ‘ou te toe fa‘atūina fo‘i i latou i le aso gata‘aga.”

41‘Ona muimui ai lea ‘iā te ia o Iutaia, auā ‘ua fetalai atu o ia, “O a‘u o le areto ‘ua alu ifo mai le lagi.” 42‘Ua fa‘apea ane fo‘i i latou, “E lē o Iesu ‘ea lenei o le atali‘i o Iosefa, ‘ua tatou iloa lona tamā ma lona tinā? O lenei fo‘i, pe fa‘apefea ‘ona fai mai o ia, ‘‘ua ‘ou alu ifo mai le lagi?’”

43‘Ona tali atu lea o Iesu ‘iā te i latou, ‘ua fa‘apea atu, “‘Aua tou te muimui. 44E lē mafai e se tasi ‘ona sau ‘iā te a‘u, pe a lē tōsina mai e le Tamā ‘ua ‘auina mai a‘u; ‘ou te toe fa‘atūina fo‘i o ia i le aso gata‘aga. 45‘Ua tusia i le ‘au perofeta, ‘E a‘oa‘oina i latou uma lava e le Atua.’ O lenei, o i latou uma o ē fa‘alogo i le Tamā, o ē a‘oa‘oina fo‘i, e ō mai i latou ‘iā te a‘u. #Isai 54.13 46‘Ae lē ‘ona ‘ua va‘ai se tasi i le Tamā; na o ia mai le Tamā, ‘ua va‘ai atu lava o ia i le Tamā. 47E moni, e moni, ‘ou te fai atu ‘iā te ‘outou, o lē fa‘atuatua mai ‘iā te a‘u, ‘ua ‘iā te ia le ola e fa‘avavau. 48O a‘u o le areto o le ola.#Ioane 6.35 49Na ‘a‘ai e o ‘outou tamā le manai i le vao, a ‘ua oti i latou.#Ioane 6.31, 32; 1 Kori 10.3, 5 50O lenei le areto ‘ua alu ifo mai le lagi; ‘ai sē ‘ai ai, ‘ona lē oti lea o ia. 51O a‘u o le areto ola na alu ifo mai le lagi; pe a ‘ai se tasi i lenei areto ‘ona ola ai lea o ia e fa‘avavau, o le areto fo‘i ‘ou te avatua, o lo‘u tino lea, ‘ou te avatua ma ola o le lalolagi.”

52‘Ona fefinaua‘i ai lea o Iutaia, ‘ua fa‘apea ane, “E mafai fa‘apefea e lenei tagata ‘ona ‘aumai o lona tino ‘iā te i tatou, tatou te ‘a‘ai ai?”

53‘Ona fetalai atu lea o Iesu ‘iā te i latou, “E moni, e moni, ‘ou te fai atu ‘iā te ‘outou, ‘āfai tou te lē ‘a‘ai i le tino o le Atali‘i o le tagata, a lē inu fo‘i i lona toto, ‘ua lē i totonu ‘iā te ‘outou le ola. 54O lē ‘ai i lo‘u tino ma inu i lo‘u toto, ‘ua ‘iā te ia le ola e fa‘avavau; ‘ou te toe fa‘atūina fo‘i o ia i le aso gata‘aga; 55auā o lo‘u tino o le mea e ‘ai moni lea, o lo‘u toto fo‘i o le mea e inu moni lea. 56O lē ‘ai i lo‘u tino ma inu i lo‘u toto, e tumau o ia ‘iā te a‘u, o a‘u fo‘i ‘iā te ia.#Ioane 15.4; 1 Ioane 3.24; 2.24 57E fa‘apei ‘ona soifua o le Tamā ‘ua na ‘auina mai a‘u, o lo‘o ola fo‘i a‘u i le Tamā; e fa‘apea fo‘i o lē ‘ai ‘iā te a‘u, e ola lea ‘iā te a‘u. 58O lenei le areto na alu ifo mai le lagi, e lē pei o ‘outou tamā na ‘a‘ai le manai, a ‘ua oti i latou; o lē ‘ai i lenei areto e ola ia e fa‘avavau lava.”

59O mea ia na fetalai ai Iesu ‘ina o a‘oa‘o o ia i le sunako i Kapanaumi.

O le ‘Upu o le Ola e Fa‘avavau

60‘Ua fa‘alogologo ai isi ona so‘o e to‘atele, ‘ona fa‘apea ai lea o i latou, “O le ‘upu faigatā lenā; o ai ‘ea sē na te mafaia ‘ona fa‘alogologo i ai?”

61‘Ua silafia e Iesu i lona lava finagalo, ‘ua muimui ona so‘o i lenā mea, ‘ona fetalai atu ai lea o ia ‘iā te i latou. “Tou te tausuai ‘ea i lenā mea? 62Pe fa‘apefea pe a ‘outou va‘ai atu i le Atali‘i o le tagata, o alu a‘e o ia i le mea sa i ai anamua?#Ioane 3.13 63O le agaga lea e tupu ai le ola, e lē aogā le tino i se mea; o ‘upu ‘ou te fai atu ai ‘iā te ‘outou, o le agaga ia, o le ola fo‘i ia. 64Peita‘i o isi o ‘outou e lē fa‘atuatua lava;” auā ‘ua silafia e Iesu talu lava i le amataga o isi o ē na lē fa‘atuatua, ma le tasi na te fa‘alataina o ia.#Ioane 13.11 65‘Ua ia fetalai atu fo‘i, “O le mea lea na ‘ou fai atu ai ‘iā te ‘outou, e lē mafai e se tasi ‘ona sau ‘iā te a‘u, pe a lē foa‘iina atu ai ‘iā te ia e lo‘u Tamā.”

66Talu ai ‘ua ō ‘ese isi o ona so‘o e to‘atele i tua, ‘ae le‘i toe feoa‘i i latou ma ia. 67‘Ona fa‘apea atu lea o Iesu i le to‘asefulu ma le to‘alua, “Pe tou te fia ō ‘ese fo‘i?”

68‘Ona tali mai lea o Simona Peteru ‘iā te ia, “Le Ali‘i e, a matou ō ‘ea ‘iā te ai? O ‘iā te oe ‘upu o le ola e fa‘avavau. #Mata 16.16; Mare 8.29; Luka 9.20 69‘Ua matou talitonu, ma ‘ua matou iloa o oe o le Pa‘ia o le Atua.”#Ioane 1.49; 11.27; Mata 14.33; 16.16

70‘Ua tali atu Iesu ‘iā te i latou, “Na ‘ou le filifilia ‘ea ‘outou e to‘asefulu ma le to‘alua? A o le tasi o ‘outou o le tiapolo o ia.” 71‘Ua fetalai atu o ia ‘iā Iuta le atali‘i o Simona le Sekara; auā o Iuta o le tasi o le to‘asefulu ma le to‘alua o le a ia fa‘alataina o ia.

Currently Selected:

Ioane 6: RSCB

Highlight

Copy