Luka 18

O le Fafine ‘ua Oti lana Tane ma le Fa‘amasino Amioletonu

1‘Ua fetalai atu fo‘i Iesu i le fa‘ata‘oto ‘iā te i latou ‘ina ‘ia tatalo so‘o e tatau ai, ‘ae ‘aua le fa‘avaivai;#Roma 12.12; Kolo 4.2; 1 Tesa 5.17 2‘ua fa‘apea atu, “Sa i le tasi ‘a‘ai le fa‘amasino ‘ua lē mata‘u i le Atua, e lē āva fo‘i i tagata; 3sa i lea ‘a‘ai fo‘i le tasi fafine ‘ua oti lana tane, ‘ua alu atu ‘iā te ia, ‘ua fa‘apea atu, ‘‘Ia e fa‘amasino atu i lē ‘ua i ai a‘u mea.’ 4O nai aso e le‘i mafai ai o ia; ‘ae mulimuli ane ‘ua fa‘apea ifo o ia i lona loto, ‘E ui lava ‘ina ‘ou lē mata‘u i le Atua ma a‘u lē āva i tagata, 5‘ae peita‘i ‘ona o le fa‘asoesā mai ‘iā te a‘u o le fafine nei ‘ua oti lana tane, ‘ou te fa‘amasino i ana mea, ‘ina ne‘i fa‘atigā mai ‘iā te a‘u i lona sau so‘o.’”

6‘Ona fetalai atu ai lea o le Ali‘i, “‘Ia ‘outou fa‘alogo mai i le ‘upu a le fa‘amasino amioletonu. 7Pe lē faia ‘ea e le Atua le fa‘amasinoga mo ē na ia filifilia, o lo‘o ‘alalaga atu ‘iā te ia i le ao ma le pō? Pe lē fa‘atuai ‘ea o ia ‘iā te i latou? 8‘Ou te fai atu ‘iā te ‘outou, e vave ‘ona fa‘amasino e ia o a latou mea. Peita‘i a sau le Atali‘i o le tagata, pe maua ‘ea e ia le fa‘atuatua i le lalolagi.”

O le Fa‘ata‘oto i le Faresaio ma le Ao Lafoga

9‘Ua fetalai atu fo‘i o Iesu lenei fa‘ata‘oto i nisi tagata ē na fa‘atuatua ‘iā te i latou ‘ua amiotonu, ‘ae fa‘alēaogāina nisi. 10“Na ō a‘e i le malumalu tagata e to‘alua e tatalo, o le faresaio le tasi, a o le tagata ao lafoga le tasi. 11Na tula‘i le faresaio, ma tatalo lemū atu i nei ‘upu, ‘Le Atua e, ‘ou te fa‘afetai atu ‘iā te oe, ‘ina ‘ua ‘ou lē pei o isi tagata, o ē fao mea, o ē amio leaga, o ē mulilulua, e lē pei o lelā tagata ao lafoga fo‘i.#Isai 58.2, 3; Luka 16.15 12E ta‘ilua i vaiasosa ‘ona ‘ou anapogi, ‘ou te avatu mea e sefulua‘i mea uma ‘ou te maua.’#Mata 23.23 13A o le tagata ao lafoga, ‘ua tu mamao atu, e lē mafaia ‘ona tepa a‘e ona mata i le lagi, a ‘ua pōpō lona fatafata, ‘ua fa‘apea atu, ‘Le Atua e, ‘ia e alofa mai ‘iā te a‘u le tagata agasala.’ 14‘Ou te fai atu ‘iā te ‘outou, na alu ifo lenā tagata i lona fale ‘ua ta‘uamiotonuina, ‘ae lē fa‘apea le isi; auā o sē fa‘amaualuga ‘iā te ia, e fa‘amaulaloina lea; a o lē fa‘amaulalo ‘iā te ia, e fa‘amaualugaina lea.”#Mata 23.12; Luka 14.11; Eseki 21.31

‘Ua Fa‘amanuia e Iesu le Fānau Laiti

(Mata 19.13-15; Mare 10.13-16)

15‘Ua latou ‘aumai tama meamea ‘iā Iesu, ‘ina ‘ia pa‘i ane o ia ‘iā te i latou; ‘ua iloa e lē ‘au so‘o, ‘ona latou vavao lea ‘iā te i latou. 16A o Iesu, ‘ua vala‘au atu o ia ‘iā te i latou, ‘ua fa‘apea atu, “‘Inā tu‘u mai ia o tamaiti e ō mai ‘iā te a‘u, ‘ae ‘aua tou te vavao ‘iā te i latou, auā e fa‘apei o i latou nei o ē o i le mālō o le Atua. 17E moni, ‘ou te fai atu ‘iā te ‘outou. ‘Ai sē lē talia le mālō o le Atua e pei o se tamaitiiti, e lē sao lava ia i ai.”#Mata 18.3

O le Tagata Mau‘oa

(Mata 19.16-30; Mare 10.17-31)

18‘Ua fesili mai fo‘i ‘iā Iesu le tasi ali‘i, ‘ua fa‘apea mai, “Le a‘oa‘o lelei e, se a le mea ‘ou te faia, ‘ou te maua ai le ola e fa‘avavau?”

19A ‘ua fetalai atu Iesu ‘iā te ia, “Se a le mea ‘e te ta‘ulelei mai ai a‘u? E leai sē lelei, na o le to‘atasi, o le Atua lea. 20‘Ua e iloa poloa‘iga. ‘‘Aua ‘e te mulilua; ‘aua ‘e te fasioti tagata; ‘aua ‘e te gaoi; ‘aua ‘e te molimau pepelo; ‘ia e āva i lou tamā ma lou tinā.’”#Eso 20.12-16; Teu 5.16-20

21‘Ona fai mai lea o ia, “‘Ua ‘ou tausia ia mea uma talu lava ‘ina ‘ou itiiti.”

22‘Ua fa‘afofoga o Iesu i ia ‘upu, ‘ona fetalai atu lea o ia ‘iā te ia. “‘Ua toe o le mea e tasi ‘e te le‘i maua; ‘ia e fa‘atau atu i au mea uma, ma ‘ia e tufatufaina i ē matitiva, ‘ona ‘iā te oe lea o le faulaiga‘oloa i le lagi; i le e sau, ma mulimuli mai ‘iā te a‘u.”#Mata 6.20 23‘Ua fa‘alogo o ia i na ‘upu, ‘ona tigā tele ai lea o ia; auā o le mau‘oa tele lava o ia.

24‘Ua silafia e Iesu o ia ‘ua tigā tele ‘ona fetalai atu lea o ia, “O le mea faigatā na‘uā ‘ona sao atu o ē mau‘oa i le mālō o le Atua! 25E faigofie ‘ona ui atu o le kamela i le pū o le nila,#18.25 pū o le nila: O le fa‘aliliuga tuai, pū o le au. ‘ae faigatā ‘ona sao atu o le mau‘oa i le mālō o le Atua.”

26O ē na fa‘alogo i ai ‘ua fai mai, “‘Āfai o lea, o ai se tasi e mafai ‘ona fa‘aolaina?”

27‘Ua fetalai atu o ia, “O mea e lē mafaia e tagata, e mafaia e le Atua.”

28‘Ona fai mai lea o Peteru, “Fa‘auta, ‘ua matou tu‘ua mea uma, ‘ae matou mulimuli atu ‘iā te oe.”

29‘Ona fetalai atu lea o ia ‘iā te i latou, “E moni, ‘ou te fai atu ‘iā te ‘outou, ‘Ai se tagata ‘ua tu‘ua e ia le fale, po o mātua, po o uso, po o le avā, po o le fānau, ‘ona o le mālō o le Atua, 30e maua e ia o mea sautualasi i nei ona po, o le ola fa‘avavau fo‘i i le olaga atalī.”

‘Ua Toe Fetalai Iesu Fa‘atolu i lona Maliu

(Mata 20.17-19; Mare 10.32-34)

31‘Ua ‘ave e ia le to‘asefulu ma le to‘alua, ‘ua fetalai ‘iā te i latou, “Fa‘auta, o le a ō a‘e i tatou i Ierusalema, e taunu‘u ai o mea uma ‘ua tusia e le ‘au perofeta i le Atali‘i o le tagata.#Luka 9.22, 44 32Auā e tu‘uina atu o ia i nu‘u ‘ese, e fa‘atauemuina, e fa‘aleagaina, e feanu fo‘i i latou ‘iā te ia, 33latou te sasa fo‘i ma fasioti ‘iā te ia; a o le aso tolu e toetū mai ai o ia.”

34E le‘i malamalama lava i latou ia mea; ‘ua lilo fo‘i lenā ‘upu ‘iā te i latou, e le‘i iloa e i latou o mea ‘ua fetalai mai ai o ia.#Mare 9.32

‘Ua Fa‘amālōlō e Iesu le Tagata Tauaso

(Mata 20.29-34; Mare 10.46-52)

35‘Ua latalata o Iesu i Ieriko, a ‘ua nofo i le auala le tasi tauaso o fa‘atoga i mea; 36‘ua fa‘alogo o ia i le motu o tagata ‘ua sāvavali ane, ‘ona fesili lea o ia: Pe se a lea?

37‘Ua latou fai atu ‘iā te ia, “O Iesu le Nasareta ‘ua maliu ane.”

38‘Ona ‘alaga mai ai lea o ia, ‘ua fa‘apea mai, “Iesu e, le alo o Tavita ‘ia e alofa mai ‘iā te a‘u.”

39‘Ua vavao ‘iā te ia i ē na muamua, ‘ina ‘ia fa‘alologo o ia; peita‘i o ia ‘ua atili ai ‘ona ‘alaga, “Le alo o Tavita e, ia ē alofa mai ‘iā te a‘u.”

40‘Ua tu Iesu, ma fetalai atu, ‘ia ta‘ita‘iina mai le tagata tauaso ‘iā te ia.#18.40 le tagata tauaso ‘iā te ia: O le fa‘aliliuga tuai; o ia ‘iā te ia. ‘Ua latalata mai o ia, ‘ona fesili atu lea o Iesu ‘iā te ia, 41‘ua fa‘apea atu, “Se a le mea ‘e te mana‘o i ai ‘ou te faia mo oe?”

‘Ua fai mai o ia, “Le Ali‘i e, ‘ia va‘ai ‘ou nei mata.”

42‘Ona fetalai atu lea o Iesu ‘iā te ia, “‘Inā va‘ai ia ou mata; o lou fa‘atuatua ‘ua e ola ai.”#Luka 17.19

43‘Ona va‘ai loa lea o ona mata, ‘ua mulimuli atu ‘iā te ia, ‘ua vivi‘i atu i le Atua; ‘ua iloa atu ai e le nu‘u uma, ‘ona latou vivi‘i atu lea i le Atua.

Currently Selected:

Luka 18: RSCB

Highlight

Copy