Luka 17

‘Ua Fetalai mai Iesu i le leaga o le Fa‘atausuai

(Mata 18.6-7, 21-22; Mare 9.42)

1‘Ua fetalai atu Iesu#17.1 Iesu: O le fa‘aliliuga tuai; ia. i le ‘au so‘o, “E lē mafai lava ‘ona lē o‘o mai o mea e tausuai ai; ‘oi talofa fo‘i i lē e o‘o mai ai. 2E lelei i lea tagata pe a noatia lona ua i se ma‘aolo tele ma lafo ai o ia i le sami, ‘ae leaga lava ‘ona fa‘atausuaiina e ia so latou nei e fa‘atauva‘a. 3‘Ia ‘outou ‘iā te ‘outou. Pe ‘āfai ‘ae agaleaga lou uso, ‘ia e a‘oa‘i atu ‘iā te ia; pe ‘āfai e salamō o ia, ‘ia e fa‘amāgalo atu ‘iā te ia.#Mata 18.15 4Pe ‘āfai e fo‘i fa‘afitu i le aso ‘ona agaleaga mai o ia ‘iā te oe ma fo‘i fa‘afitu i le aso ‘ona liliu mai ‘iā te oe, ‘ua fa‘apea mai, ‘‘Ua ‘ou salamō;’ ‘ia e fa‘amāgalo atu ‘iā te ia.”

O le Fa‘atuatua

5‘Ona fai mai lea o le ‘au ‘aposetolo i le Ali‘i, “‘Ia e fa‘atuputeleina lo matou fa‘atuatua.”

6‘Ua fetalai atu le Ali‘i, “‘Āfai ‘ua tusa lo ‘outou fa‘atuatua ma le fua o le sinapi, po ‘ua ‘outou fai atu i lenei sukamina, ‘‘Ia lia‘iina oe ma ‘ia totōina i le sami;’ ‘ona usita‘i#17.6 usita‘i: O le fa‘aliliuga tuai; ‘ana‘ana. mai lava lea ‘iā te ‘outou.

O Galuega a le ‘Au‘auna

7“O ai fo‘i so ‘outou e ana le ‘au‘auna a suatia le ‘ele‘ele, po o leoleo i mamoe, e fai atu ‘ea pe a sau o ia mai le vao, ‘Sau loa ia, ‘inā ta‘oto e ‘ai?’ 8‘Ae lē fai atu ‘ea ‘iā te ia, ‘‘Inā sauni mai ia sa‘u sua ma ‘ia fusi ou ‘ofu, i le laulau mai o mea ‘ai, se‘i ‘ai a‘e a‘u ma inu; a mavae lea, i le ‘ai ai oe ma inu?’ 9E fa‘afetai atu ‘ea o ia i le ‘au‘auna, ‘ina ‘ua fai mea na fai atu ai ‘iā te ia? Ai lava e leai. 10E fa‘apea fo‘i ‘outou, pe a uma ‘ona fai o mea uma na poloa‘iina atu ‘iā te ‘outou, tou te fai ane, ‘O ‘au‘auna lē aogā i matou nei; auā o mea e tatau ‘ona matou fai, o mea ia ‘ua matou faia.’”

‘Ua Fa‘amālōlōina e Iesu Tagata e To‘asefulu

11‘Ua alu malaga atu Iesu#17.11 Iesu: O le fa‘aliliuga tuai; ia. i Ierusalema, ‘ua ui ai i Samaria ma Kalilaia. 12‘Ua o‘o atu o ia i le tasi ‘a‘ai, ‘ona fetaia‘i lea ma ia o tagata lepela e to‘asefulu, ‘ua tutū mamao mai i latou. 13‘Ua latou ‘alalaga mai, ‘ua fa‘apea mai, “Le Ali‘i e, Iesu ‘ia e alofa mai ‘iā te i matou.”

14‘Ua silafia e ia, ‘ona fetalai atu lea o ia ‘iā te i latou, “‘Inā ō ia, ‘ia fa‘aali atu ‘outou i ositaulaga.”

‘Ua latou ō, ‘ona fa‘amamāina lea o i latou.#Levi 14.1-32 15O le tasi o i latou, ‘ua na iloa ‘ua fa‘amālōlōina o ia, ‘ona toe fo‘i mai lea o ia, ‘ua vivi‘i atu i le Atua ma le leo tele; 16‘ua fa‘apa‘ū faō o ia i ona vae, ‘ua fa‘afetai mai ‘iā te ia; o le Samaria fo‘i o ia. 17‘Ona fetalai atu lea o Iesu, “E le‘i fa‘amamāina ‘ea le to‘asefulu? A o ifea le to‘aiva? 18‘Ua lē iloa ‘ea ni ē toe fo‘i mai e vivi‘i atu i le Atua, na o lenei tagata ‘ese.?” 19‘Ua fetalai atu Iesu#17.19 Iesu: O le fa‘aliliuga tuai; ia. ‘iā te ia, “‘Inā tula‘i ia, ‘inā alu; o lou fa‘atuatua ‘ua e mālōlō ai.”

O le Afio mai o le Mālō o le Atua

(Mata 24.23-28, 37-41)

20‘Ua fesili mai le ‘au faresaio ‘iā Iesu:#17.20 Iesu: O le fa‘aliliuga tuai; ia. Pe o‘o mai afea le mālō o le Atua? ‘Ua tali atu o ia ‘iā te i latou, “E lē o‘o mai le mālō o le Atua ma le va‘aia e mata. 21E lē fai ane fo‘i tagata, ‘Fa‘auta, o lo‘o ‘i‘inei.’ pe fa‘apea, ‘Fa‘auta, o lo‘o ‘i‘ilā.’ auā fa‘auta, ‘ua i ai lava ‘iā te ‘outou le mālō o le Atua.”

22‘Ua fetalai atu o ia i le ‘au so‘o, “E o‘o mai lava ona po tou te manana‘o tele ai ‘ia iloa se aso e tasi o le Atali‘i o le tagata, ‘ae lē iloa. 23A fai mai tagata ‘iā te ‘outou, ‘Fa‘auta o lo‘o ‘i‘inei;’ pe fa‘apea, ‘Fa‘auta o lo‘o ‘i‘ilā;’ ‘aua tou te ō i ai, pe mulimuli atu i ai. 24Auā e pei ‘ona ‘emo mai o le uila mai le tasi itū lagi, e malamalama atu i le tasi itū lagi; e fa‘apea fo‘i le Atali‘i o le tagata i lona aso. 25‘Ae tatau ‘ona mua‘i tigā o ia i mea e tele, ma lafoa‘iina e lenei tupulaga. 26Pei ‘ona faia fo‘i i ona aso o Noa, e fa‘apea lava ‘ona fai i ona aso o le Atali‘i o le tagata.#Kene 6.5-8 27Na ‘a‘ai i latou ma inu, na latou fai avā fo‘i ma latou fa‘aavaga, ‘ua o‘o lava i le aso na ulu ai Noa i le va‘a, ‘ona o‘o mai ai lea o le lolo, ‘ua oti ai i latou uma.#Kene 7.6-24 28E pei ‘ona faia fo‘i i ona aso o Lota; ‘ua latou ‘a‘ai, ‘ua inu, ‘ua fa‘atau, ‘ua avane e fa‘atau, ‘ua totō mea, ma fai fale;#Kene 18.20—19.25 29a o lea lava aso na alu ‘ese ai Lota i Sotoma, ‘ua tō fa‘atimu#17.29 tō fa‘atimu: O le fa‘aliliuga tuai; tō fa‘aua. mai le afi ma le teiō mai le lagi, ‘ua oti ai i latou uma. 30E fa‘apea lava i le aso e fa‘aalia mai ai le Atali‘i o le tagata.

31“O lē ‘ua i luga o le fale i lea aso ma ana mea ‘ua i le fale, ‘aua le alu ifo o ia e ‘ave; e fa‘apea fo‘i lē ‘ua lē vao, ‘aua le toe fo‘i mai o ia.#Mata 24.17-18; Mare 13.15-16 32‘Ia ‘outou manatua le avā a Lota.#Kene 19.26 33O sē sā‘ili ‘ia saogalemū lona ola, e māumau ai ‘iā te ia; a o sē fa‘amaumau ai, e fa‘asaoina e ia.#Mata 10.39; 16.25; Mare 8.35; Luka 9.24; Ioane 12.25 34‘Ou te fai atu ‘iā te ‘outou, o lea lava po, e i le moega e tasi, tagata e to‘alua; e ‘avea le tasi, ‘ae tu‘ua le tasi. 35E olo saito fa‘atasi fafine e to‘alua; e ‘avea le tasi, ‘ae tu‘ua le tasi. 36E i le vao tagata e to‘alua; e ‘avea le tasi,#17.36 tagata e to‘alua…tasi: O nisi fa‘aliliuga; fafine e to‘alua…tasi ‘ae tu‘ua le tasi.”

37‘Ua latou fai mai ‘iā te ia, ‘ua fa‘apea mai, “Le Ali‘i e, po o fea e fai ai?”

‘Ua fetalai atu o ia ‘iā te i latou, “O le mea o i ai le tino, e aofaga i ai aeto.”

Currently Selected:

Luka 17: RSCB

Highlight

Copy