GENESA 25
25
Ta ku fa ka Abrahama.
1Abrahama a tlhela a teka nsati; vito ra yena a a ri Ketura. 2Nsati yeloyi, a n'wi velekela Zimrana, Yokixani, Medani, Midiyani, Yixibaka na Xuwaka. 3Kutani Yokixani a veleka Xeba na Dedani. Vana va Dedani a a ri Axuru na Letuxa na Lewumi. 4Vana va Midiyani: Efa, Efere, Hanoko, Abida na Elida. Hinkwavo volavo a va ri vana va Ketura.
5Abrahama a nyika Isaka hinkwaswo leswi ngi a ri na swona. 6Loko va ri vana va tinhlantswa leti Abrahama a a ti tekile, a va avela tinyiko, a va rhuma a ha hanya, kule na Isaka, n'wanakwe, tlhelo ra vuxa, etikweni ra le vuxeni.
7Masiku ya malembe ya ku hanya ka Abrahama hi walawo: u hanye malembe ya 175. 8Kutani Abrahama a nyiketa moya, a fa, a dyuhele swinene, a a hanye ngopfu, ni ku tsaleriwa hi masiku, kutani a amukeriwa eka varikwavo. 9Kutani Isaka na Iximaele, vana va yena, va n'wi yimbela ebakweni ra Makapela, ensin'wini ya Efroni, n'wana Sohara, wa Muhiti, ku vandzakana na Mamre, 10yi nga nsimu leyi Abrahama ingi a yi xavile eka Vahiti. Hi kona ku nga lahliwa Abrahama, swin'we na Sara, nsati wa yena. 11Kuteloko Abrahama a file, Xikwembu xi katekisa Isaka, n'wana wa yena; Isaka a tshama ekusuhi ni xihlovo xa Berilahayi-Royi.
Rixaka ra Iximaele.
12Hi vona volavo vatukulu va Iximaele, n'wana Abrahama, yeloyi Hagara, wa Muegipta, nandza wa Sara, i ngi a velekerile Abrahama. 13Hi wona lawo mavito ya vana va Iximaele, hi mavito ya vona ni tinxaka ta vona: Lowa mativula wa Iximaele a a ri Nebayoto; na Kedari, na Adibiele, na Mibisama, 14Mixima, Duma, na Masa, 15Hadada, Tema, Yeturu, Nafixi, na Kedema. 16Hi volavo vana va Iximaele, ni mavito ya vona hi walawo hi miti ya vona ni mindyangu ya vona; ti ri tihosi ta khume na timbirhi ta matiko ya vona. 17Malembe ya ku hanya ka Iximaele hi wolawo, a ma ri 137. 18Kutani a nyiketa moya, a fa a amukeriwa eka varikwavo. Kutani vana va yena va aka ku suka eka Havhila ku fika eka Xuru, hi ku vandzakana na Egipta, loko ku yiwa Asiriya; va tshamile kona va lavana ni vamakwavo hinkwavo va vona.
Timhaka ta Isaka.
19Rixaka ra Isaka, n'wana Abrahama, hi leri: Abrahama a veleka Isaka. 20Kuteloko Isaka a ri munhu wa malembe ya mune wa makume, a teka Rhaveka, n'wana Betuwele wa Muaramu, wa le Padani-Aramu, ni makwavo wa Labani, wa Muaramu, a va nsati wa yena. 21Kutani Isaka a khongelela nsati wa yena eka Yehovha, hikuva a a ri mhika; kutani Yehovha a amukela ku khongela ka yena; kavaloko Rhaveka, nsati wa yena, a tika nyimba. 22Kambe vana a va susumetana endzeni ka yena, kutani a ku: “Loko swi ri tano, ndzi xurhele yini-ke nyimba leyi?” Kutani a ya vutisisa Yehovha.
23Yehovha a ku eka yena: “Matiko mambirhi ma le khwirini ra wena. Tinxaka timbirhi ti ta avana siku ti humaka eka wena. Rixaka rin'wana ri ta hlula lerin'wana, ni lonkulu u ta tirhela ndzisana.”
24Nkarhi wa ku veleka wu fika, kutani maswivo, a ku ri ni mahahlwa enyimbeni ya yena. 25Kutani lowo rhanga la humeke a tshwukile, a fana ni xifunengelo xa voya hinkwako, kutani va n'wi thya vito ra Esawu (hileswaku n'wa-voya). 26Endzhaku, ku huma ndzisana a khomile xirhendze xa Esawu; yena va n'wi thya vito ra Yakobo (hileswaku muhlungi). Isaka a a ri munhu wa malembe ya 60 loko vana va velekiwa.
27Kutani varisanyana lavo va tshama va kula. Esawu a endla muhloti lowo tlhariha, a ri munhu wa nhova, kasi Yakobo a a ri munhu wo rhula, la tshamaka emitsongeni. 28Isaka a a rhandza Esawu, hikuva a a n'wi hlotela tinyama, kambe Rhaveka a a rhandza Yakobo.
Ta Esawu loko a xavisa vukulu byakwe.
29Kutani kuteloko Yakobo a sweka matsavu, Esawu a vuya emasin'wini, a karhele ngopfu. 30Kutani Esawu a ku eka Yakobo: “Ndzi nyike ndzi dya leswo tshwuka, leswo tshwuka leswi, hikuva ndzi karhele.” Hilaha va nga thya vito ra yena Edomu (hileswaku swo tshwuka).
31Yakobo a ku: “Rhanga u ndzi xavisela vukulukumba bya wena.”
32Esawu a ku: “Leswi ndzi lavaka ku fa, byi nga ndzi pfunisa ku yini vukulukumba lebyi?”
33Yakobo a ku: “Rhanga u ndzi hlambanyela.”
A n'wi hlambanyela; a xavisa sweswo vukulukumba bya yena eka Yakobo. 34Kavaloko Yakobo a nyika Esawu vuswa, ni murhu wa tinyawa; kutani a dya a nwa, a suka a famba. Esawu u sandzise sweswo vukulukumba bya yena.
Currently Selected:
GENESA 25: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.
