GENESA 7
7
1Kutani Xikwembu xi byela Nowa, xi ku: “Nghena engalaveni, wena ni yindlu ya wena hinkwayo, hikuva ndzi ku vonile u ri la lulameke emahlweni ka mina exikarhi ka rixaka leri. 2Eka swiharhi hinkwaswo leswi tengeke, u ta swi teka eka wena ha ntlhanu na swimbirhi, matsune ni nkati; ni ka swiharhi leswi nga tengangiki u teka swimbirhi, matsune ni nkati. 3Ni ka tinyanyana ta tilo, u teka ha ntlhanu na timbirhi, matsune ni nkati, rixaka ra swona ri va ri hlayiseka ri hanya ehenhla ka misava hinkwayo. 4Hikuva ka ha sele masiku ya ntlhanu na mambirhi, kutani ndzi ta nisa mpfula emisaveni hi masiku ya mune wa makume, ni vusiku bya mune wa makume, ndzi herisa ehenhla ka misava hinkwaswo leswi hanyaka leswi ndzi nga swi endla.” 5Kutani Nowa a endlisa sweswo, hilaha Yehovha a nga n'wi lerisa hinkwaswo hakona.
6Nowa a a ri munhu wa malembe ya 600, loko ndhambi ya mati yi humelela emisaveni. 7Kutani Nowa a nghena engalaveni, swin'we ni vana va yena, ni nsati wa yena, ni vasati va vana va yena swin'we na yena, hikwalaho ka mati ya ndhambi. 8Eka swiharhi leswi tengeke ni ka leswi nga tengangiki, ni ka tinyanyana, ni ka hinkwaswo leswi fambaka emisaveni, 9ku nghene eka Nowa engalaveni swimbirhi ha swimbirhi, matsune ni nkati, hilaha Xikwembu xi leriseke Nowa hakona. 10Kuteloko ku hundzile masiku lawa ya ntlhanu na mambirhi, mati ya ndhambi ma va kona emisaveni.
11Hi lembe ra 600 ra ku hanya ka Nowa, hi n'hweti ya vumbirhi, hi siku ra khume na ntlhanu na mambirhi, hi siku lero, swihlovo hinkwaswo swa mpfhuka lowukulu swi pfelela, ni tinyangwa ta mati ya tilo ti pfuleka. 12Kutani mpfula yi na emisaveni hi masiku ya mune wa makume ni vusiku bya mune wa makume. 13Hi siku rolero Nowa a nghena engalaveni, na Xeme, na Hamu, na Yafeta, vana va Nowa, ni nsati wa Nowa, ni vasati lavanharhu va vana va yena: 14ni swiharhi hinkwaswo hi tinxaka ta swona ni swifuwo hinkwaswo hi tinxaka ta swona ni swikokovi hinkwaswo leswi fambaka emisaveni hi tinxaka ta swona, ni tinyanyana hinkwato hi tinxaka ta tona, xinyanyana xin'wana ni xin'wana lexitsongo, ni hinkwaswo leswi nga ni timpapa. 15Exikarhi ka nyama hinkwayo leyi nga ni ku hefemula ka vutomi eka yona, swi nghena eka Nowa engalaveni, ha swimbirhi. 16Leswi nga nghena, a swi ri matsune ni nkati; ku nghene swona exikarhi ka nyama yin'wana ni yin'wana, hilaha Xikwembu xi nga n'wi lerisa hakona. Kutani Yehovha a n'wi pfalela.
17Ndambi yi va kona emisaveni hi masiku ya mune wa makume, kutani mati ma tlakuka, ma tlakusa ngalava, yi suka ehenhla ka misava. 18Kutani mati ma tala ma engeteleka ngopfu emisaveni, ni ngalava yi famba ehenhla ka mati. 19Kambe mati ma tala ngopfungopfu emisaveni, tintshava hinkwato leto leha leti nga ehansi ka matilo ti funengetiwa. 20Mati ma ti tlula hi swisungunhu swa khume na ntlhanu, tintshava ti va ti funengetiwa. 21Kutani nyama yin'wana ni yin'wana leyi fambaka emisaveni yi fa, hambi ti ri tinyanyana, hambi swi ri swifuwo, ni swiharhi, ni hinkwaswo leswi nga tala emisaveni, ni vanhu hinkwavo. 22Hinkwaswo leswi ngi swi ri ni ku yingisa ni ku hefemula ka vutomi etinhompfini ta swona, hinkwaswo leswi ngi swi ri emisaveni leyo oma, swi fa swi hela. 23Hinkwaswo leswi hanyeke emisaveni swi herisiwa, ku suka eka munhu, ku fika eka swifuwo, ku fika eka swikokovi ni le ka tinyanyana ta tilo, swi herisiwa emisaveni, ku sala ntsena Nowa ni leswi ngi a ri na swona engalaveni. 24Kutani mati ma tala ngopfu emisaveni hi masiku ya dzana na ntlhanu wa makume.
Currently Selected:
GENESA 7: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.
