GENESA 8
8
1Kutani Xikwembu xi tsundzuka Nowa ni swiharhi hinkwaswo, ni swifuwo hinkwaswo leswi ngi swi ri na yena engalaveni; kutani Xikwembu xi hungisa moya emisaveni, kutani mati ma hunguteka. 2Swihlovo swa mpfhuka lowukulu swi pfariwa, swin'we ni tinyangwa ta matilo, kutani mpfula ya tilo yi xa. 3Mati ma tlhela ma suka ehenhla ka misava, ma engeta ma tlhela, kutani mati ma hunguteka, loko ku hundze masiku ya dzana na ntlhanu wa makume. 4Kutani hi n'hweti ya ntlhanu na timbirhi, hi siku ra khume na ntlhanu na mambirhi ya n'hweti, ngalava yi yima etintshaveni ta Ararata. 5Kambe mati ma engeta ma hunguteka ku fika eka n'hweti ya khume. Hi n'hweti leya khume, hi siku ro rhanga, ku humelele tinhlohlorhi ta tintshava.
6Endzhaku ka masiku ya mune wa makume, Nowa a pfula fasitere leri a ri endleke engalaveni; 7kutani a tshiketa wukuwuku, kambe wukuwuku ri huma, ri suka ri tlhela ri vuya mati ma ko ma phya ehenhla ka misava. 8A engeta a tshiketa tuva a ta tiva leswaku xana mati ma phyile ehenhla ka misava. 9Kambe tuva a ri kumanga laha ri nga yimaka kona hi tincondzo ta rona kutani ri vuya eka yena engalaveni, hikuva mati a ma ri kona ehenhla ka misava hinkwayo; kutani a tshambuluta voko, a khoma tuva, a ri tlherisela eka yena engalaveni. 10A engeta a yimela masiku man'wana ya ntlhanu na mambirhi, kutani a engeta a tshiketa tuva ehandle ka ngalava. 11Kutani tuva ri vuya eka yena nimadyambu, ri tamele enon'wini wa rona tluka lerintshwa ra mutlhwari, hi kona Nowa a tivaka leswaku mati ma hungutekile emisaveni. 12A engeta a yimela kambe masiku man'wana ya ntlhanu na mambirhi, kutani a tshiketa tuva, kambe a ra ha tlhelelanga eka yena.
13Kutani hi lembe ra 601 ra Nowa, hi n'hweti yo rhanga, hi siku ro rhanga ra n'hweti, mati ma phya emisaveni. Nowa a susa lwangu ra ngalava, a languta, kutani waswivo, misava a yi omile ehenhla ka yona. 14Kutani hi n'hweti ya vumbirhi, hi siku ra 27, misava a yi omile.
15Kavaloko Xikwembu xi vulavula na Nowa, xi ku: 16“Huma engalaveni wena ni nsati wa wena, ni vana va wena, ni vasati va vana va wena swin'we na wena. 17Humesa ni swiharhi hinkwaswo leswi nga na wena, swa nyama yin'wana ni yin'wana, hambi ti ri tinyanyana, hambi swi ri swifuwo, ni swikokovi hinkwaswo leswi fambaka emisaveni, swi va swi tala emisaveni, swi tswalana ni ku engeteleka emisaveni.” 18Kutani Nowa a huma ni vana va yena, ni nsati, ni vasati va vana va yena. 19Swiharhi hinkwaswo, ni swikokovi hinkwaswo, ni tinyanyana hinkwato; hinkwaswo leswi fambaka emisaveni, swi huma engalaveni hi tinxaka ta swona.
20Kutani Nowa a akela Yehovha alitari, kutani a pambula exikarhi ka swifuwo hinkwaswo leswi tengeke, ni le xikarhi ka tinyanyana hinkwato leti tengeke, a humesa holokosta ealitarini. 21Kutani Yehovha a twa ku nun'hwela loku tsakisaka; Yehovha a ku embilwini ya yena: “A ndzi nga ha tlheli ndzi rhuketela misava hikwalaho ka vanhu, hikuva makungu ya timbilu ta vanhu ma bihile ku suka evuhlangini bya vona, kutani a ndzi nga ha tlheli ndzi ba hinkwaswo leswi hanyaka hilaha ndzi endleke hakona. 22Hi masiku hinkwawo ya misava, ku byala ni ku tshovela, xirhami ni mumu, ximumu ni vuxika, nhlekanhi ni vusiku, swi nga ka swi nga pfumaleki.”
Currently Selected:
GENESA 8: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.
