Génesis 7
7
Jun Miman Yaax Nabꞌ
1Jaꞌ yet jix aapnoj scꞌual xin, jix yalon Jehová tet naj Noé: Ocantoj yul teꞌ barco yetoj ix ja wistil, cꞌal ebꞌ ja cꞌaal, cꞌal yetoj yistil ebꞌ ja cꞌaal tuꞌ, yutol asanne jaach jijem jaach ey jin xol masanil ebꞌ ánima yet jun tiempoal tiꞌ. 2Cha wiꞌon octoj jujebꞌoj moan noꞌ noꞌ chi skeꞌ yoc yin xaambꞌal, jal pax masanil noꞌ comon xin, junjun moan noꞌ cha wiꞌoctoj. 3Catuꞌ cha wiꞌon octoj jujebꞌoj moan noꞌ tzꞌiquin chi skeꞌ yoc yin xaambꞌal, yet watxꞌ cꞌam chi qꞌueyel yinatil noꞌ. 4Yet jujubꞌix tinaniꞌ, catuꞌ chi waon eytej jun miman yaax nabꞌ bꞌey yul yibꞌankꞌinal tiꞌ, cawinaj cꞌu, cawinaj akꞌbꞌal oj yakꞌa. Queywal tuꞌ oj yun jin qꞌueyon el masanil tzet jix jin pitzcꞌune a bꞌey sat txꞌotxꞌ txꞌotxꞌ tiꞌ, ẍi Jehová. 5Jaxca ton tuꞌ jix yun sjijen Noé masanil tzet jix yal Jehová.
6Jaꞌ yet jix yakꞌon jun miman yaax nabꞌ tuꞌ, ey 600 abꞌil skꞌinal naj Noé tuꞌ. 7Jix octoj naj Noé yul teꞌ barco tuꞌ yetoj yistil, yetoj ebꞌ scꞌaal cꞌal yetoj ebꞌ yalibꞌ, yu scolcha can el ebꞌ tet jun miman yaax nabꞌ tuꞌ. 8Queytuꞌ jix yun cꞌal pax noꞌ noꞌ, noꞌ chi skeꞌ yoc yin xaambꞌalil, noꞌ comon noꞌ, noꞌ tzꞌiquin, yetoj cꞌal noꞌ chi sjutx sbꞌa sat txꞌotxꞌ. 9Junjun moan jix yun yakꞌon jul sbꞌa noꞌ, noꞌ icham cꞌal noꞌ txutxe, yu yoctoj noꞌ yul teꞌ barco tuꞌ yetoj naj Noé, jaxca jix yun yalon Jehová. 10Jaꞌ yet sjuj cꞌual, catuꞌ jix tit secna jun miman yaax nabꞌ yibꞌan masanil txꞌotxꞌ txꞌotxꞌ tiꞌ. 11Cꞌuxan wal stzꞌajna yabꞌilal naj Noé yin 600 abꞌil skꞌinal, yet jujlajonebꞌ cꞌu yet scaabꞌ xꞌaaw, jix aol nicꞌna jaꞌ mimej jaꞌ yalan txꞌotxꞌ txꞌotxꞌ tiꞌ, catuꞌ jix tit secna mimej jaꞌ bꞌey satcan. 12Cawinaj cꞌu, cawinaj akꞌbꞌal jix yakꞌ nabꞌ yibꞌan txꞌotxꞌ txꞌotxꞌ tiꞌ.
13Jaꞌ yet jun scꞌual albꞌilcan yu Jehová tuꞌ, jix oc cantoj naj Noé yul teꞌ barco yetoj yistil cꞌal oxwan scꞌaal, jaꞌton Sem, Cam cꞌal Jafet, yetoj cꞌal ebꞌ ix oxwan alibꞌe. 14Yetoj cꞌal masanil junjun tujan noꞌ noꞌ jix octoj yetoj naj, noꞌ jobꞌbꞌeal noꞌ, noꞌ xol-laj teꞌal noꞌ, noꞌ chi sjutx sbꞌa cꞌal noꞌ tzꞌiquin. 15Masanil noꞌ noꞌ chi yiꞌ skaꞌeꞌ, jix octoj yetoj naj Noé yul barco tuꞌ, yin catajcꞌon jix yun yoctoj noꞌ. 16Jun noꞌ icham jun noꞌ txutxe, quey cꞌal tuꞌ jix yun yoctoj masanil junjun tujan noꞌ, jaxca cꞌal jix yun yalon Jehová tet naj Noé. Jix lawi tuꞌ, jaꞌcaw Jehová jix majchen can smajil teꞌ barco tuꞌ.
17-18Cawinajxa cꞌu yel yich yakꞌon nabꞌ tuꞌ, catuꞌ jix noel sat txꞌotxꞌ tiꞌ yu jaꞌ, catuꞌ jix iꞌle a jun barco tuꞌ yu yipal jaꞌ. 19Jix muji cantoj mimej wonan yu jaꞌ. 20Jix chꞌibꞌ cꞌal a jaꞌ, ey mi jujebꞌojxa metro jix ecꞌbꞌan jaꞌ yibꞌan mimej wonan. 21Jaxca ton tuꞌ jix yun scam masanil ánima ey bꞌey yul yibꞌankꞌinal tiꞌ, yetoj cꞌal masanil noꞌ noꞌ, noꞌ tzꞌiquin, noꞌ jobꞌbꞌeal noꞌ, noꞌ xol-laj teꞌal noꞌ, cꞌal noꞌ chi sjutx sbꞌa sat txꞌotxꞌ txꞌotxꞌ tiꞌ. 22Masanil tzet chi yiꞌ skaꞌeꞌ sat txꞌotxꞌ txꞌotxꞌ tiꞌ, pilan jix cami. 23Asanxane naj Noé yetoj ebꞌ eyoctoj yetoj yul barco tuꞌ, cꞌal noꞌ noꞌ eyoctoj yetoj, jix colcha eloj. Jal pax wanxa ebꞌ ánima tuꞌ xin, jix cam ebꞌ masanil. 24Joebꞌ xꞌaaw jix cancan lian jaꞌ yibꞌan txꞌotxꞌ txꞌotxꞌ tiꞌ.
Currently Selected:
Génesis 7: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
