San Lucas 19

Laj Zaqueo laj titzꞌol toj quixpa̱b li Jesús

1Nak quicuulac Jericó, li Jesús yo̱ chi numecꞌ saꞌ li tenamit. 2Aran cuan jun li cui̱nk biom aj Zaqueo xcꞌabaꞌ. Li cui̱nk aꞌan, aꞌan li nataklan saꞌ xbe̱neb laj titzꞌol toj. 3Ta̱raj xnaubal ani li Jesús. Abanan xban nak kꞌaxal nabaleb li tenamit, incꞌaꞌ quiru rilbal xban nak caꞌchꞌin rok. 4Joꞌcan nak co̱ saꞌ a̱nil chi ubej ut quitakeꞌ saꞌ ruꞌuj jun li cheꞌ sicómoro xcꞌabaꞌ re nak ta̱ru̱k ta̱ril li Jesús xban nak aran toxnumekꞌ. 5Nak yo̱ chi numecꞌ aran, li Jesús qui-iloc takecꞌ. Quiril laj Zaqueo ut quixye re: —At Zaqueo, cuben chak chi junpa̱t xban nak tento nak tinhila̱nk saꞌ la̱ cuochoch anakcuan, chan. 6Ut laj Zaqueo quicube saꞌ junpa̱t ut quixcꞌul li Jesús saꞌ rochoch chi sa saꞌ xchꞌo̱l. 7Nak li qꞌuila tenamit queꞌril nak li Jesús qui-oc saꞌ rochoch laj Zaqueo, queꞌpoꞌ ut queꞌxye: —X-oc chi hila̱nc saꞌ rochoch jun cui̱nk aj ma̱c, chanqueb. 8Nak yo̱queb chi cuaꞌac, laj Zaqueo quixakli chiru li Jesús ut quixye re: —Ka̱cuaꞌ, chalen anakcuan jalan chic tinba̱nu. Yijach lin jun cablal tinsi reheb li nebaꞌ. Ut cui cuan anihak xcuelkꞌa cꞌaꞌru re, ca̱hib cua chic xqꞌuial li re̱kaj tinqꞌue, chan. 9Ut li Jesús quixye: —Li cui̱nk aꞌin ralal xcꞌajol ajcuiꞌ laj Abraham. Anakcuan colbil chic li cui̱nk aꞌin. 10La̱in li Cꞌajolbej xincꞌulun chixsicꞌbal ut chixcolbal li sachenakeb, chan li Jesús.

Cui incꞌaꞌ nakaqꞌue chi cꞌanjelac li kama̱tan li qꞌuebil ke xban li Dios, ta̱makꞌekꞌ chiku

11Ut li Jesús quixye jun chic li jaljo̱quil ru a̱tin reheb li yo̱queb chi abi̱nc re, xban nak cuulaqueb re Jerusalén. Eb aꞌan queꞌxcꞌoxla nak li Jesús ac oc re chixxakabanquil lix nimajcual cuanquilal li Dios.#Saꞌ li versículo 19:11 aꞌin naxye “lix nimajcual cuanquilal li Dios”. Li tenamit queꞌxcꞌoxla nak li Cristo oc re xxakabanquil chokꞌ rey saꞌ ruchichꞌochꞌ. Saꞌ xchꞌo̱leb aꞌan nak lix cuanquilal li Cristo re saꞌ ruchichꞌochꞌ. Incꞌaꞌ queꞌxtau ru nak li ani napa̱ban re li Cristo ac cuan chic rubel xcuanquil. Incꞌaꞌ yo̱ chi a̱tinac chirix li cua̱nc arin joꞌ junak rey. 12Li Jesús quixye reheb: Quicuan jun xnimal ru cui̱nk. Li cui̱nk aꞌan quibokeꞌ saꞌ jun najtil tenamit re nak ta̱xakaba̱k chokꞌ rey ut ta̱sukꞌi̱k cuiꞌchic. 13Nak ac xic re li cui̱nk quixbokeb laje̱b lix mo̱s. Quixqꞌue laje̱b chi tumin re li junju̱nk ut quixye reheb: —Yaconkex chiru li tumin aꞌin tojaꞌ yal jokꞌe tana tinsukꞌi̱k chak la̱in, chan. 14Aban xicꞌ na-ileꞌ xbaneb lix tenamit ut nak ac xco̱ li cui̱nk, queꞌxtakla xtakl riqꞌuin li ta̱xakaba̱nk re chokꞌ rey chixyebal re: —La̱o incꞌaꞌ nakaj nak ta̱oc chokꞌ karey li cui̱nk aꞌin, chanqueb. 15Abanan li cui̱nk quixakaba̱c chokꞌ rey. Ut nak ac x-oc chokꞌ rey, li cui̱nk aꞌan quisukꞌi cuiꞌchic saꞌ xtenamit ut quixtakla xbokbaleb lix mo̱s li quixqꞌueheb xtumin re xnaubal li joꞌ nimal ac xtau li junju̱nk. 16Quicuulac li xbe̱n ut quixye re: —Ka̱cuaꞌ, laje̱b chic xrala la̱ tumin li xaqꞌue cue, chan. 17Li rey quixye re: —La̱at cha̱bil aj cꞌanjel. Us xaba̱nu. Xban nak ti̱c a̱chꞌo̱l riqꞌuin li caꞌchꞌin xinqꞌue a̱cue, joꞌcan nak tinqꞌue a̱cuanquil saꞌ xbe̱n laje̱b chi tenamit, chan li rey. 18Ut quicuulac li mo̱s jun chic ut quixye: —Ka̱cuaꞌ, o̱b chic xrala la̱ tumin li xaqꞌue cue, chan. 19Ut li rey quixye re: —Joꞌcan ajcuiꞌ la̱at. Cha̱bil xaba̱nu. Tinqꞌue a̱cuanquil saꞌ xbe̱n o̱b chi tenamit, chan. 20Ut quicuulac ajcuiꞌ li mo̱s jun chic ut quixye: —Ka̱cuaꞌ, cueꞌ la̱ tumin. Xincꞌu̱la saꞌ jun sut. 21Xinxucuac a̱ban xban nak ninnau nak joskꞌat. Nacacꞌul li tumin li incꞌaꞌ nacacꞌanjela ut nacatkꞌoloc bar cuiꞌ incꞌaꞌ nacat-au, chan. 22Quichakꞌoc li rey ut quixye: —La̱at ma̱cꞌaꞌ nacat-oc cuiꞌ. Riqꞌuin ajcuiꞌ li cꞌaꞌru xaye, tinrak a̱tin saꞌ a̱be̱n. Nacanau nak joskꞌin ut nacanau nak nincꞌul li tumin li incꞌaꞌ nincꞌanjela ut ninkꞌoloc bar cuiꞌ incꞌaꞌ nin-au. 23¿Cꞌaꞌut nak incꞌaꞌ xaqꞌue chi toꞌ lin tumin? Ut la̱in nak xinsukꞌi, xincꞌul raj lin tumin rochben li ral, chan li rey. 24Ut li rey quixye reheb li cuanqueb aran: —Isihomak li tumin chiru ut qꞌuehomak re li ac cuan laje̱b chi tumin riqꞌuin, chan. 25Eb aꞌan queꞌchakꞌoc ut queꞌxye: —At Ka̱cuaꞌ, aꞌan ac cuan ajcuiꞌ laje̱b chi tumin riqꞌuin, chanqueb. 26Li rey quixye reheb: —La̱in ninye e̱re nak li ani cuan nabal cꞌaꞌru re, ta̱qꞌuehekꞌ cuiꞌchic nabal re; ut li ani caꞌchꞌin ajcuiꞌ cꞌaꞌru re, ta̱isi̱k chiru, usta caꞌchꞌin ajcuiꞌ li cꞌaꞌru re. 27Ut cꞌamomakeb chak li xicꞌ nequeꞌiloc cue li incꞌaꞌ nequeꞌraj nak tin-oc chokꞌ xreyeb. Ut chicuu ajcuiꞌ, te̱camsiheb, chan li rey.

Li Jesús quiqꞌueheꞌ xlokꞌal nak qui-oc Jerusalén

28Nak ac xye li jaljo̱quil ru a̱tin aꞌin, li Jesús qui-oc cuiꞌchic chi xic Jerusalén. 29Cuulaqueb re saꞌ li cuib chi tenamit Betfagé ut Betania. Nachꞌ cuanqueb riqꞌuin li tzu̱l Olivos nak li Jesús quixtaklaheb cuib lix tzolom. 30Quixye reheb: —Ayukex saꞌ li chꞌina tenamit aꞌan li cuan chi nachꞌ. Ut nak texcuulak te̱tau jun li chꞌina bu̱r bacꞌbo. Li chꞌina bu̱r aꞌan toj ma̱ ani nabe̱c chirix. Te̱hit ut te̱cꞌam chak arin. 31Ut cui ani napatzꞌoc e̱re cꞌaꞌut nak yo̱quex chixhitbal, te̱ye re nak li Ka̱cuaꞌ ta̱ajok ru li chꞌina bu̱r, chaꞌakex, chan li Jesús. 32Queꞌco̱eb lix tzolom li Jesús cuib ut queꞌxtau chixjunil joꞌ quiyeheꞌ reheb. 33Nak yo̱queb chixhitbal li chꞌina bu̱r, eb laj e̱chal re queꞌxpatzꞌ reheb: —¿Cꞌaꞌut nak yo̱quex chixhitbal li kabu̱r? chanqueb. 34Eb lix tzolom li Jesús queꞌchakꞌoc ut queꞌxye: —Li Ka̱cuaꞌ ta̱ajok ru li bu̱r, chanqueb. 35Ut queꞌxcꞌam li chꞌina bu̱r riqꞌuin li Jesús. Queꞌxqꞌue li tꞌicr chirix ut queꞌxtenkꞌa li Jesús chi takecꞌ chirix. 36Nak yo̱ chi xic li Jesús, nabaleb li cristian queꞌxhel lix tꞌicreb saꞌ be bar ta̱numekꞌ cuiꞌ li Jesús joꞌ cꞌaynakeb xba̱nunquil nak nacuulac junak nim xcuanquil. 37Cuulaqueb re Jerusalén. Yo̱queb chak chi cubec saꞌ li tzu̱l Olivos ut chixjunileb li yo̱queb chixta̱kenquil li Jesús queꞌoc chixjapbal reheb xban xsahil xchꞌo̱leb. Ut queꞌxlokꞌoni li Dios xbaneb li milagro li quilajeꞌril. 38Queꞌxye: —Osobtesinbil taxak li rey li xchal saꞌ xcꞌabaꞌ li Ka̱cuaꞌ. Ut cua̱nk taxak li tuktu̱quilal saꞌ choxa. Lokꞌoninbil taxak li Ka̱cuaꞌ li cuan saꞌ choxa, chanqueb. 39Ut cuanqueb laj fariseo saꞌ xya̱nkeb li qꞌuila tenamit queꞌxye re: —At tzolonel kꞌuseb la̱ tzolom, ye reheb nak teꞌxcanab a̱tinac.— 40Li Jesús quichakꞌoc ut quixye reheb: —La̱in ninye e̱re nak cui eb lin tzolom teꞌxcanab xqꞌuebal inlokꞌal, aꞌ chic li pec teꞌxjap re chixqꞌuebal inlokꞌal, chan li Jesús.

Li Jesús quiyotꞌeꞌ xchꞌo̱l nak quiril li tenamit Jerusalén

41Nak cuulac re Jerusalén, li Jesús quiya̱bac chirilbal li tenamit. 42Ut quixye: —¡Cui ta la̱ex aj Jerusalén nequenau xqꞌuebal retal ani ta̱ru̱k ta̱qꞌuehok tuktu̱quil usilal saꞌ eb li cutan aꞌin, us raj! Aban anakcuan toj mukmu che̱ru. Joꞌcan nak incꞌaꞌ nequetau xya̱lal. 43Ta̱cuulak xkꞌehil nak eb li xicꞌ nequeꞌiloc e̱re teꞌcha̱lk chi pletic e̱riqꞌuin. Teꞌxsut rix le̱ tenamit. Teꞌxqꞌue ribeb chi xjun sutam le̱ tenamit ut la̱ex ma̱ bar chic ta̱ru̱k te̱col e̱rib. 44Teꞌxjuqꞌui le̱ tenamit ut teꞌxtꞌan, joꞌqueb ajcuiꞌ chixjunileb li cuanqueb aran. Ma̱ jun chic li pec ta̱cana̱k saꞌ xnaꞌaj. Te̱cꞌul chi joꞌcan xban nak la̱ex incꞌaꞌ xeqꞌue retal nak li Dios xcꞌulun e̱riqꞌuin che̱colbal, chan li Jesús.

Li Jesús quirisiheb laj cꞌay saꞌ li templo

45Nak qui-oc saꞌ li templo, li Jesús qui-oc chixyolesinquileb chirix cab li yo̱queb chi cꞌayi̱nc ut li yo̱queb chi lokꞌoc aran. 46Quixye reheb: —Tzꞌi̱banbil retalil saꞌ li Santil Hu chi joꞌcaꞌin: Li cuochoch aꞌin re teꞌtijok cuiꞌ li tenamit. Abanan la̱ex xeqꞌue li templo chokꞌ xnaꞌajeb laj e̱lkꞌ, chan li Jesús. 47Ut rajlal cutan yo̱ chixchꞌolobanquil xya̱lal saꞌ li templo. Eb li xbe̱nil aj tij, ut eb laj tzꞌi̱b ut eb li nequeꞌtaklan saꞌ xya̱nkeb laj judío yo̱queb chixcꞌu̱banquil chanru nak teꞌxcamsi. 48Abanan incꞌaꞌ queꞌxtau chanru teꞌxba̱nu xban nak chixjunileb li tenamit yo̱queb chixqꞌuebal xchꞌo̱leb chirabinquil li cꞌaꞌru yo̱ chixyebal li Jesús.

Currently Selected:

San Lucas 19: kek

Highlight

Copy